ୱାଶିଂଟନ/ନୂଆଦିଲ୍ଲୀ,୨୧ ।୧: ଦେଶରେ ଗୋଟିଏ ପଟେ କରୋନା ମହାମାରୀର ତୃତୀୟ ଲହର ଚାଲିଥିବା ବେଳେ ପୁଣିଥରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିଶ୍ୱର ଲୋକପ୍ରିୟ ନେତା ତାଲିକାରେ ସବୁଠାରୁ ଆଗରେ ରହିଛନ୍ତି । ଆମେରିକା ଡାଟା ଇଣ୍ଟଲିଜେନ୍ସ ଫର୍ମ ’ଦ ମର୍ଣ୍ଣି କନସଲ୍ଟ’ର ସର୍ଭେ ଅନୁଯାୟ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆପ୍ରୁଭାଲ ରେଟିଂରେ ଆମେରିକା ରାଷ୍ଟ୍ରପତି ଜୋ ବାଇଡେନ ଓ ବ୍ରିଟିଶ ପ୍ରଧାନମନ୍ତ୍ରୀ ବୋରିସ ଜନସନ ସମେତ ବିଶ୍ୱର ୧୩ ରାଷ୍ଟ୍ରମୁଖ୍ୟଙ୍କୁ ପଛରେ ପକାଇ ଦେଇଛନ୍ତି । ସର୍ଭେରେ ମୋଦିଙ୍କ ଆପ୍ରୁଭାଲ ରେଟିଂ ୭୭% ରହିଛି । ୧୩-୧୯ ଜାନୁୟାରୀ ମଧ୍ୟରେ କରାଯାଇଥିବା ଏହି ସର୍ଭେରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିଶ୍ୱର ବହୁ ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କୁ ପଛରେ ପକାଇ ଦେଇଛନ୍ତି । ମୋଦି ମେକ୍ସିକୋ ରାଷ୍ଟ୍ରପତି ଆନ୍ଦ୍ରେ ମ୍ୟାନୁଏଲ ଲୋପେଜ ଓବ୍ରାଡୋର, ଇଟାଲୀର ପ୍ରଧାନମନ୍ତ୍ରୀ ମାରିୟା ଦ୍ରାଘି, ଜର୍ମାନ ଚାନସଲର ଓଲାଫ ଶୋଲ୍ଜ, ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ସମେତ ଅନେକ ବଡ ବଡ ନେତାଙ୍କୁ ଲୋକପ୍ରିୟତା ଗ୍ରାଫରେ ପଛରେ ପକାଇ ଦେଇଛନ୍ତି । ଏଥର ସର୍ଭେରେ ଆମେରିକା ରାଷ୍ଟ୍ରପତି ଜୋ ବାଇଡେନ ୬ ନମ୍ବରରେ ଥିବା ବେଳେ ବ୍ରିଟିଶ ପ୍ରଧାନମନ୍ତ୍ରୀ ୧୩ ନମ୍ବରରେ ରହିଛନ୍ତି ।
ସୂଚନାଯୋଗ୍ୟ ଆମେରିକା ଡାଟା ଇଣ୍ଟଲିଜେନ୍ସ ଫର୍ମ ଦ ମର୍ଣ୍ଣିଂ କନସଲ୍ଟ ପ୍ରତି ଦେଶର ବୟସ୍କ ଓ ପ୍ରତିଷ୍ଠିତ ବ୍ୟକ୍ତିଙ୍କୁ ନେଇ ସର୍ଭେ କରିବା ପରେ ର୍ୟାକିଙ୍ଗ ପ୍ରସ୍ତୁତ କରିଥାଏ । ନଭେମ୍ବରରେ କରାଯାଇଥିବା ସର୍ଭେରେ ବି ସବୁଠାରୁ ଅଧିକ ଲୋକପ୍ରିୟ ନେତା ଭାବେ ଆଗରେ ଥିଲେ ମୋଦି ।
