ନୂଆଦିଲ୍ଲୀ,୨୩।୮: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କ ବାସଭବନରେ କିପରି ମୟୂର ସହ ସମୟ କଟାଉଛନ୍ତି ତାହା ଏବେ ଦେଖିବାକୁ ମିଳିଛି। ଇନଷ୍ଟାଗ୍ରାମରେ ଏବେ ଏକ ଭିଡିଓ ଦର୍ଶାଉଛି ମୋଦିଙ୍କ ମୟୂର ପ୍ରତି ଥିବା ପ୍ରେମ। ଉକ୍ତ ଭିଡିଓରେ ମୋଦି କିପରି ମୟୂରଙ୍କୁ ଦାନା ଖାଇବାକୁ ଦେଉଛନ୍ତି ମର୍ଣ୍ଣିଂ ଓ୍ବାକରେ ତାଙ୍କ ସହ ଚାଲୁଛନ୍ତି ଏହା ଦେଖିବାକୁ ମିଳିଛି।
ପ୍ରଧାନମନ୍ତ୍ରୀଙ୍କ ବାସଭବନର ଏହି ଭିଡିଓରେ ନୀଳ ମୟୂର ଦେଖିବାକୁ ମିଳିଛି ଯାହା ଦେଶର ରାଷ୍ଟ୍ରୀୟ ପକ୍ଷୀ। ମୋଦି ଯେତେବେଳେ ମର୍ଣ୍ଣିଂ ଓ୍ବାକରେ ଯାଉଛନ୍ତି ସେତେବେଳେ ମୟୂରମାନେ ତାଙ୍କ କଡେ କଡେ ଚାଲୁଛନ୍ତି। ଏମିତିକି ମନ ନ ଭରିଲେ ଏମାନେ ଘର ଭିତରକୁ ମଧ୍ୟ ଚାଲିଯାଇ ପ୍ରଧାନମନ୍ତ୍ରୀଙ୍କ ହାତରୁ ଦାନା ଖାଉଥିବା ଦେଖାଯାଇଛି।
ଏହି ଭିଡିଓକୁ ଦେଖି ଅନୁମାନ କରାଯାଇଛି କି ଲକ୍ଡାଉନ ସମୟରେ ଏହା ବୋଧହୁଏ ମୋଦିଙ୍କର ଡେଲି ରୁଟିନ ଥିଲା। ହାତରେ ପ୍ଲେଟ ଧରି ମୟୁରମାନଙ୍କୁ ଖାଇବାକୁ ଦେଉଥିଲେ ମୋଦି। ପ୍ରଧାନମନ୍ତ୍ରୀ ଜଳବାୟୁ ଓ ବନ ସଂରକ୍ଷଣ ଉପରେ ଗୁରୁତ୍ୱ ଦେଇଥାଆନ୍ତି। ସେ ‘Convenient Action: Gujarat’s Response to Challenges of Climate Change’ ଓ ‘Convenient Action- Continuity for Change’ ନାମକ ଦୁଇଟି ପୁସ୍ତକ ମଧ୍ୟ ରଚନା କରିଛନ୍ତି ଯେଉଁଥିରେ ସେ ତାଙ୍କ ଚିନ୍ତାଧାରାକୁ ବ୍ୟକ୍ତ କରିଛନ୍ତି।
ପ୍ରଧାନମନ୍ତ୍ରୀଙ୍କ ବାସଭବନରେ ଏମିତି ଗାଁ ପରିବେଶ ସୃଷ୍ଟି କରାଯାଇଛି ଯେଉଁଠି ପକ୍ଷୀମାନେ ବସା ବାନ୍ଧି ରହିପାରିବାର ସୁବିଧା ରହିଛି। ତେଣୁ ମୟୂରମାନେ ବିନା କୌଣସି ଶଙ୍କାରେ ବିଚରଣ କରୁଥିବା କୁହାଯାଏ। ଏହାଦ୍ୱାରା ମୋଦି ପ୍ରକୃତି ପ୍ରେମର ବାର୍ତ୍ତା ଦେଇଥିବା ଆଲୋଚନା ହେଉଛି।