କଲମ୍ବୋ,୩୦।୪: ଗମ୍ଭୀର ଆର୍ଥିକ ସଙ୍କଟର ସମ୍ମୁଖୀନ ହୋଇଥିବା ଶ୍ରୀଲଙ୍କାରେ ସୃଷ୍ଟ ରାଜନୈତିକ ଅଚଳାବସ୍ଥାର ସମାଧାନ ଲାଗି ରାଷ୍ଟ୍ରପତି ଗୋଟାବାୟା ରାଜପାକ୍ସେ ପ୍ରଧାନମନ୍ତ୍ରୀ ପଦରୁ ତାଙ୍କ ବଡ଼ଭାଇ ମହିନ୍ଦା ରାଜପାକ୍ସେଙ୍କୁ ହଟାଇବା ପାଇଁ ଶୁକ୍ରବାର ରାଜି ହୋଇଛନ୍ତି। ପାର୍ଲାମେଣ୍ଟର ସବୁ ଦଳକୁ ନେଇ ଏକ ଅନ୍ତରୀଣ ସରକାର ଗଠନ କରାଯିବ। ନୂଆ ପ୍ରଧାନମନ୍ତ୍ରୀ ଓ ମନ୍ତ୍ରୀମାନଙ୍କୁ ଚୟନ କରିବା ଲାଗି ଏକ ଜାତୀୟ ପରିଷଦ ଗଢ଼ାଯିବ। ରାଷ୍ଟ୍ରପତିଙ୍କ ସହ ବୈଠକ ପରେ ସାଂସଦ ମୈତ୍ରୀପାଲ ସିରିସେନା ଗଣମାଧ୍ୟମକୁ ଏହି ସୂଚନା ଦେଇଛନ୍ତି। ସରକାରୀ ଦଳର ଏମ୍ପି ଥିବା ସିରିସେନା ଚଳିତ ମାସରେ ପାଖାପାଖି ୪୦ ଏମ୍ପିଙ୍କ ସହ ଦଳ ବଦଳାଇଥିଲେ।
ଶ୍ରୀଲଙ୍କାରେ ଆର୍ଥିକ ସଙ୍କଟ ଗମ୍ଭୀର ସ୍ଥିତିରେ ପହଞ୍ଚିଥିବାବେଳେ ଅତ୍ୟାବଶ୍ୟକ ସାମଗ୍ରୀ ଅଭାବ ଓ ଆକାଶଛୁଆଁ ଦରଦାମ୍ ବୃଦ୍ଧିକୁ ନେଇ ଲୋକେ ଅତିଷ୍ଠ ହୋଇପଡ଼ିଲେଣି। ରାଷ୍ଟ୍ରପତି ଗୋଟାବାୟା ଓ ପ୍ରଧାନମନ୍ତ୍ରୀ ମହିନ୍ଦାଙ୍କ ସମେତ ରାଜପାକ୍ସେ ପରିବାରର ସମସ୍ତ ସଦସ୍ୟଙ୍କୁ ସରକାରରୁ ବହିଷ୍କାର କରିବା ଲାଗି ଦୁଇମାସ ହେଲା ସେଠାରେ ଆନ୍ଦୋଳନ ଜାରି ରହିଛି। ଅତ୍ୟଧିକ ବିଦେଶୀ ଋଣ ବୋଝ, କ୍ରମାଗତ ଲକ୍ଡାଉନ, ଇନ୍ଧନ ଅଭାବ, ବିଦେଶୀ ବିନିମୟ ଭଣ୍ଡାର ହ୍ରାସ ଏବଂ ମୁଦ୍ରା ଅବମୂଲ୍ୟାୟନକୁ ନେଇ ଆର୍ଥିକ ସଙ୍କଟ ଜଟିଳ ହୋଇଛି। ଏଥିପାଇଁ ରାଜପାକ୍ସେ ପରିବାରକୁ ଦାୟୀ କରାଯାଇଆସୁଛି। ଉକ୍ତ ପରିବାର ରାଜନୀତି ଛାଡ଼ନ୍ତୁ ବୋଲି ୯୦ ପ୍ରତିଶତ ଶ୍ରୀଲଙ୍କାବାସୀ ଚାହୁଁଥିତ୍ବା ଏକ ସର୍ଭେରୁ ଜଣାପଡ଼ିଛି।
