ଲଣ୍ଡନ,୧୬ା୧୧: ବ୍ରିଟେନ କିଙ୍ଗ୍ ଚାଲର୍ସ ୩ୟ ତାଙ୍କ ଭଉଣୀ ପ୍ରିନ୍ସେସ୍ ଏନି (ରୟାଲ ପ୍ରିନ୍ସେସ୍) ଏବଂ ଭାଇ ପ୍ରିନ୍ସ ଏଡ୍ଓ୍ବାର୍ଡ (ଓ୍ବେସେକ୍ସ)ଙ୍କୁ ଡେପୁଟି ଭୂମିକା ଦେଇଛନ୍ତି। ଉଭୟେ ତାଙ୍କ ପକ୍ଷରୁ ରାଜକୀୟ ଦାୟିତ୍ୱ ନିର୍ବାହ କରିପାରିବେ। ଏନେଇ ବ୍ରିଟେନ ପାର୍ଲାମେଣ୍ଟରେ ଥିବା ତାଲିକାରେ ଦୁହିଁଙ୍କ ନାମ ଯୋଡ଼ିବା ପାଇଁ ଚାଲର୍ସ ବ୍ୟକ୍ତିଗତ ଭାବେ ଅନୁରୋଧ କରିଛନ୍ତି। ସୋମବାର ଚାଲର୍ସ ନିଜ ୭୪ତମ ଜନ୍ମଦିନ ପାଳନ କରିବା ଅବସରରେ ଏକ ବିବୃତି ଜାରି କରିଛନ୍ତି। ଏଥିରେ ସେ ତାଙ୍କ ଭଉଣୀ ଓ ଭାଇଙ୍କୁ ‘କାଉନ୍ସେଲର୍ସ ଅଫ୍ ଷ୍ଟେଟ୍’ ସାମିଲ କରିବା ସମ୍ପର୍କରେ ଉଲ୍ଲେଖ କରିଛନ୍ତି। ବ୍ରିଟେନ୍ର ରିଜେନ୍ସି ଆକ୍ଟ ଅନୁସାରେ ବର୍ତ୍ତମାନ ଯାଏ ସମ୍ରାଟଙ୍କ ସ୍ତ୍ରୀ ଏବଂ ସିଂହାସନର ପରବର୍ତ୍ତୀ ୪ ଜଣ ୨୧ ବର୍ଷରୁ ଊର୍ଦ୍ଧ୍ୱ ବୟସ୍କ ଉତ୍ତରାଧିକାରୀଙ୍କୁ କାଉନ୍ସେଲର୍ସ ମାନ୍ୟତା ଦିଆଯାଉଥିଲା। ସେମାନେ ହେଲେ କିଙ୍ଗ୍ ଚାଲର୍ସଙ୍କ ସ୍ତ୍ରୀ କାମିଲା(କୁଇନ୍ କନ୍ସର୍ଟ), ପ୍ରିନ୍ସ ଓ୍ବିଲିୟମ୍ (ପ୍ରିନ୍ସ ଅଫ୍ ଓ୍ବେଲ୍ସ)। ରାଜାଙ୍କ ସାନପୁଅ ପ୍ରିନ୍ସ ହ୍ୟାରି (ଡ୍ୟୁକ୍ ଅଫ୍ ସସେକ୍ସ) ରାଜ କାର୍ଯ୍ୟରୁ ଅବ୍ୟାହତି ନେଇଥିବାବେଳେ ସାନଭାଇ ପ୍ରିନ୍ସ ଆଣ୍ଡ୍ର୍ୟୁ (ଡ୍ୟୁକ୍ ଅଫ୍ ୟର୍କ) ଏକ ସେକ୍ସ ସ୍କାଣ୍ଡାଲ ମାମଲାରେ ଛନ୍ଦିହେବା ପରେ ନିଜ ରୟାଲ ଡ୍ୟୁଟି ପରିତ୍ୟାଗ କରିଛନ୍ତି। ଚାଲର୍ସ ଦୁହିଁଙ୍କ ନାମକୁ ବାଦ୍ ଦେବା ପରିବର୍ତ୍ତେ କାଉନ୍ସେଲର୍ସ ଅଫ୍ ଷ୍ଟେଟ୍ ତାଲିକାକୁ ପ୍ରଶସ୍ତ କରିଛନ୍ତି। ରାଜାଙ୍କ ଏହି ନିଷ୍ପତ୍ତି ପରେ ଉକ୍ତ ଆଇନରେ ପରିବର୍ତ୍ତନ ଆଣିବାକୁ ପଡ଼ିବ। ଏଥି ସକାଶେ ସରକାର ହାଉସ୍ ଅଫ୍ କମନ୍ସରେ ଏକ ବିଧେୟକ ଆଣିବେ। ରାଜା ବିଦେଶ ଯାତ୍ରା କରିଥିଲେ କିମ୍ବା ଅସୁସ୍ଥ ହୋଇପଡ଼ିଲେ ତାଙ୍କ ପକ୍ଷରୁ କାଉନ୍ସେଲରମାନେ ରାଜକୀୟ ଉତ୍ତରଦାୟିତ୍ୱ ନିର୍ବାହ କରିଥାଆନ୍ତି।