ପାରାଦୀପ,୨୪।୭(ଶରତ ରାଉତ): ପାରାଦୀପ ପୌରାଞ୍ଚଳର ଅଠରବାଙ୍କୀ ପାରାଦୀପ ପୌରାଞ୍ଚଳର ଅଠରବାଙ୍କୀ ଲକ୍ପଡା ସରକାରୀ ବିଦ୍ୟାଳୟରେ ଏକ୍ସପାଏରି ଔଷଧ ଖାଇ ଛାତ୍ରୀଛାତ୍ର ଅସୁସ୍ଥ ହେବା ଘଟଣାରେ ମଙ୍ଗଳବାର ବିଭାଗ ପକ୍ଷରୁ ଯାଞ୍ଚ ପରେ ୨ ଜଣ ଶିକ୍ଷୟିତ୍ରୀଙ୍କୁ ନିଲମ୍ବିତ କରାଯାଇଛି। ସେମାନେ ହେଲେ ପ୍ରଧାନ ଶିକ୍ଷୟିତ୍ରୀ ମଞ୍ଜୁଲତା ସାମଲ, ସହକାରୀ ଶିକ୍ଷୟିତ୍ରୀ ଦିପ୍ତୀକୁମାରୀ ସ୍ବାଇଁ। ଏନେଇ କୁଜଙ୍ଗ ମଣ୍ଡଳ ଶିକ୍ଷାଧିକାରୀ(ବିଇଓ) ମନୋଜ କୁମାର ବେହେରା ସୂଚନା ଦେଇଛନ୍ତି। ଯାଞ୍ଚ ବେଳେ ବିଦ୍ୟାଳୟ ମଧ୍ୟରୁ ଏକ୍ସପାଏରି ହୋଇଥିବା ହଜାରରୁ ଅଧିକ ଟାବ୍ଲେଟ୍ ଷ୍ଟ୍ରିପ ଶିକ୍ଷା ବିଭାଗ ଓ ସ୍ବାସ୍ଥ୍ୟ ବିଭାଗ ପକ୍ଷରୁ ଜବତ କରାଯାଇଛି। ଏତେ ମାତ୍ରାରେ ପୁରୁଣା ଔଷଧ କିପରି ଷ୍ଟକ ରହିଛି ସେନେଇ ଦିନ ତମାମ ଖୋଳତାଡ କରାଯାଇଥିଲା। ଉକ୍ତ ଘଟଣାର ସବିଶେଷ ରିପୋର୍ଟ ଉପରିସ୍ଥ ଅଧିକାରୀମାନଙ୍କୁ ପଠାଯିବ ବୋଲି ଯାଞ୍ଚ ଅଧିକାରୀମାନେ କହିଛନ୍ତି। ପ୍ରାଥମିକ ରିପୋର୍ଟ ଆଧାରରେ ୨ଜଣ ଶିକ୍ଷୟିତ୍ରୀଙ୍କକ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯାଇଛି ତଦନ୍ତ ପରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ବିଇଓ ମନୋଜ କୁମାର ବେହେରା କହିଛନ୍ତି। ସେହିପରି ସ୍ବାସ୍ଥ୍ୟ ବିଭାଗର ଅତିରିକ୍ତ ଜିଲା ଜନସ୍ବାସ୍ଥ୍ୟ ଅଧିକାରୀ(ଏଡିପିଏଚଓ)ଡାକ୍ତର ପ୍ରମୋଦ କୁମାର ବାରିକ କହିଛନ୍ତି,ଏହା ଉପରେ ମୂଳରୁ ଚୂଳ ଯାଏ ତଦନ୍ତ କରାଯିବ। ସେହି ଆଧାରରେ ପଦକ୍ଷେପ ନିଆଯିବ। ମଙ୍ଗଳବାର ଦିନ ତମାମ ଦୁଇ ବିଭାଗର ଅଧିକାରୀମାନେ ଯାଞ୍ଚ କରିଥିଲେ। ତେଣୁ ପାଠପଢ଼ା ବନ୍ଦ ରହିଥିଲା। ଅଧିକାରୀମାନେ ପ୍ରଥମେ ଔଷଧ ଖାଇଥିବା ୮୭ ଜଣ ପିଲାଙ୍କ ଘରକୁ ଯାଇ ସେମାନଙ୍କ ସ୍ବାସ୍ଥ୍ୟ ପରୀକ୍ଷା କରିଥିଲେ। ସମସ୍ତ ପିଲାଙ୍କ ଅବସ୍ଥା ଭଲ ଥିବା ଡାକ୍ତରୀ ଟିମ୍ କହିଛି। ପରେ ସ୍ଥାନୀୟ ଅଭିଭାବକମାନଙ୍କ ଉପସ୍ଥିତିରେ ବିଦ୍ୟାଳୟ ଖୋଲା ଯାଇଥିଲା। ଆଲମାରୀ ଖୋଲିବା ପରେ ସେଥିରେ ଏକ୍ସପାଏରି ଔଷଧ ଥିବା ଟିମ୍ ଦେଖିଥିଲେ। ଏନେଇ ଶିକ୍ଷୟିତ୍ରୀମାନଙ୍କ ବୟାନ ରେକର୍ଡ କରାଯାଇଥିଲା। ଏ ସମ୍ପର୍କରେ ବିଇଓ ବେହେରା କୁହନ୍ତି, ଜୁନରେ ଔଷଧ ଷ୍ଟକ ନ ଥିଲା। ଜୁନ ୨ ରେ ଔଷଧ ଯୋଗାଣ କରାଯାଇଥିଲା ବୋଲି ଖାତାରେ ଉଲ୍ଲେଖ ଅଛି। କିନ୍ତୁ ୨ରୁ୩ ବର୍ଷ ତଳର ଔଷଧ ଆଲମାରୀ ଭିତରେ ଅଛି। ଦୁଇ ସପ୍ତାହ ପିଲାଙ୍କୁ ଔଷଧ ଦିଆଯାଇନାହିଁ। ଗତ ସୋମବାର ଔଷଧ ଦେଇଥିଲେ। ଦେବା ପୂର୍ବରୁ ଶିକ୍ଷୟିତ୍ରୀମାନେ ଆଗେ ତାରିଖ ଯାଞ୍ଚ କରି ନିଜେ ଖାଇବା ପରେ ପିଲାଙ୍କୁ ଦେବା କଥା। କିନ୍ତୁ ତାହା କରାଯାଇନାହିଁ। ସମସ୍ତ ଘଟଣା ଉପରେ ବିଭାଗ ପକ୍ଷରୁ କଠୋର ପଦକ୍ଷେପ ନିଆଯିବ ବୋଲି ବିଇଓ ବେହେରା କହିଛନ୍ତି। ଏଡିପିଏଚ୍ଓ ଡାକ୍ତର ବାରିକ କୁହନ୍ତି, ପାରାଦୀପର ସବୁ ବିଦ୍ୟାଳୟ ପାଇଁ ଚଳିତ ମାସ ଗତ୧୬ରେ ଔଷଧ ଯୋଗାଇ ଦିଆଯାଇଛି। ଏ ସମ୍ପର୍କରେ ନିଲମ୍ବିତ ପ୍ରଧାନ ଶିକ୍ଷୟିତ୍ରୀ ମଞ୍ଜୁଲତା କୁହନ୍ତି, ୨୪।୬।୨୦୨୪ରେ ଔଷଧ ରିସିଭ କରିଛୁ। ସିଆର୍ସିସି ସୁକାନ୍ତ ସ୍ବାଇଁ କୁହନ୍ତି,ମାସେ ତଳେ ଔଷଧ ଦିଆଯାଇଛି। ଏମିତି କାହା କଥା ମଧ୍ୟରେ ତାଳମେଳ ନ ଥିଲା। ସେହିପରି ଛାତ୍ରୀଛାତ୍ରଙ୍କ ଉପସ୍ଥାନ ପ୍ରସଙ୍ଗରେ ସୋମବାର ୧୧୫ ଥିବା କୁହାଯାଇଥିଲା। ମଙ୍ଗଳବାର ଯାଞ୍ଚ ବେଳେ ରେକର୍ଡରେ ୯୮ଜଣ ଛାତ୍ରୀଛାତ୍ରଙ୍କ ନାମ ରହିଥିବା ଜଣାପଡ଼ିଛି।