ଭଣ୍ଡାରିପୋଖରୀ,୧୬ା୭(ରାଜେନ୍ଦ୍ର ଶତପଥୀ):ବିଦ୍ୟାଳୟ ପରିସରରେ ଏକ ବିବାହ ଉତ୍ସବକୁ ଅନୁମତି ଦେଇ ଅଡ଼ୁଆରେ ପଡ଼ିଛନ୍ତି ପ୍ରଧାନ ଶିକ୍ଷକ। ଏନେଇ ଅଭିଯୋଗ ପରେ ବ୍ଲକ ଶିକ୍ଷା ଅଧିକାରୀ ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି। ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ଅଧୀନ ବନ୍ଦାଳୋ-ମଢ଼ିଆଳି ପଞ୍ଚାୟତର ବଳିପୁର ସରକାରୀ ପ୍ରାଥମିକ ଓ ସୁବର୍ଣ୍ଣମୁଖୀ ଉ.ପ୍ରା. ବିଦ୍ୟାଳୟରେ ଏଭଳି ଘଟଣା ଦେଖିବାକୁ ମିଳିଛି।
ସୂଚନା ଅନୁଯାୟୀ, ଏହି ପଞ୍ଚାୟତ ଅଧୀନ ଖପୁରିଆପଦା ଗ୍ରାମର ଜଣେ ବ୍ୟକ୍ତିଙ୍କ ପୁଅ ବାହାଘର ରବିବାର ଥିଲା। କନ୍ୟାଙ୍କ ମାମୁଘର ବଳିପୁର ଗ୍ରାମରେ ହୋଇଥିବାରୁ ବରଯାତ୍ରୀ ଏଠାକୁ ଆସିଥିଲେ। ରବିବାର ଛୁଟି ଥିବାରୁ ଫାଟକ ଓ ଶ୍ରେଣୀଗୃହ ଚାବି ନେଇ ବିଦ୍ୟାଳୟ ପରିସରରେ ବିବାହ ବେଦି ସହ ଭୋଜିଭାତ ହୋଇଥିଲା। ସୋମବାର ସକାଳୁ ବରକନ୍ୟା ବିଦା ହେବା ପରେ ସ୍କୁଲ ପରିସରରେ କୁଢ଼ କୁଢ଼ ଅଳିଆ ଆବର୍ଜନା ଜମା ହୋଇଥିଲା। ଏହା ସ୍ଥାନୀୟ ଲୋକଙ୍କ ଦୃଷ୍ଟିକୁ ଆସିବା ପରେ ବ୍ଲକ ଶିକ୍ଷା ଅଧିକାରୀଙ୍କ ନିକଟରେ ଏନେଇ ଅଭିଯୋଗ କରାଯାଇଛି। ଏଭଳି କାର୍ଯ୍ୟ ଗ୍ରହଣୀୟ ନୁହେଁ ବୋଲି କହିବା ସହ ବିଇଓ ଅଧୀର କୁମାର ତରାଇ ସାତଶୋଳା ଶିକ୍ଷା ସଂଯୋଜକଙ୍କଠାରୁ ରିପୋର୍ଟ ତଲବ କରିଛନ୍ତି। ବିଦ୍ୟାଳୟ ଫାଟକ ଚାବି ପରିଚାଳନା ପରିଷଦ ସଭାପତିଙ୍କ ପାଖରେ ରହୁଥିବାରୁ ଗ୍ରାମବାସୀ ବିବାହ ଉତ୍ସବ ପାଇଁ ନେଇଥାଇପାରନ୍ତି ବୋଲି ପ୍ରଧାନ ଶିକ୍ଷକ କୃଷ୍ଣଚନ୍ଦ୍ର ବାରିକ କହିଛନ୍ତି। କିନ୍ତୁ ବିବାହ ଉତ୍ସବରେ ବିଦ୍ୟାଳୟ ଶ୍ରେଣୀଗୃହ ବ୍ୟବହାର ହୋଇଥିବାରୁ ଏହାର ଚାବିି ପ୍ରଧାନ ଶିକ୍ଷକଙ୍କ ବିନା ଅନୁମତିରେ କିପରି ହସ୍ତାନ୍ତର କଲେ ବୋଲି ଅଭିଯୋଗକାରୀ ପ୍ରଶ୍ନ ଉଠାଇଛନ୍ତି। ସୋମବାର ବାହୁଡ଼ାଯାତ୍ରା ଛୁଟି ଥିବାରୁ ମଙ୍ଗଳବାର ବିଦ୍ୟାଳୟକୁ ଯାଇ ତଦନ୍ତ କରିବେ ବୋଲି ଶିକ୍ଷା ସଂଯୋଜିକା କୁସୁମଲତା ମହାପାତ୍ର କହିଛନ୍ତି।
