ସିର୍ସା, ୨୭।୬- ହରିୟାଣାର ସିର୍ସାରେ ଜଣେ ପ୍ରିନ୍ସପାଲ ନିୟମକୁ ଉଲ୍ଲଘଂନ କରି ନିଜ ସ୍ତ୍ରୀଙ୍କୁ ସ୍କୁଲରେ ଅତିଥି ଅଧ୍ୟାପିକା ନିଯୁକ୍ତ କରିଥିଲେ। କିନ୍ତୁ ଦୀର୍ଘ ୧୫ ବର୍ଷ ପରେ ପ୍ରିନ୍ସପାଲଙ୍କ ଏହି କାରସାଦି ଏବେ ଲୋକଲୋଚନକୁ ଆସିଛି। ସେହିଭଳି ପ୍ରିନ୍ସପାଲଙ୍କ ସ୍ତ୍ରୀଙ୍କୁ ୧୫ ବର୍ଷର ଦରମା ବାବଦକୁ ୩୨ ଲକ୍ଷ ଟଙ୍କା ଫେରସ୍ତ ପାଇଁ ମାସେ ସମୟ ଦିଆଯାଇଛି। ଘଟଣାରୁ ଜଣାପଡ଼ିଛି ଯେ, ୨୦୦୫ ଡିସେମ୍ବର ୨୧ରେ ସିର୍ସାର ଏକ ସରକାରୀ ସ୍କୁଲରେ ଏହି ମହିଳା ଜଣଙ୍କ ଅତିଥି ଅଧ୍ୟାପିକା ଭାବେ ନିଯୁକ୍ତ ହୋଇଥିଲେ। ଯେତେବେଳେ କି ମହିଳାଙ୍କ ସ୍ବାମୀ ସେହି ସମୟରେ ସ୍କୁଲରେ ପ୍ରିନ୍ସପାଲ ଏବଂ ଡେପୁଟି ଡିଇଓ ଭାବେ ଅତିରିକ୍ତ ଦାୟିତ୍ୱରେ ରହିଥିଲେ। ନିୟମ ମୁତାବକ ସ୍କୁଲ ଯେଉଁଠି ଅବସ୍ଥିତ କେବଳ ସେହି ଅଞ୍ଚଳର ସ୍ଥାନୀୟ ବାସିନ୍ଦାଙ୍କୁ ଅତିଥି ଅଧ୍ୟାପକ ଭାବେ ନିଯୁକ୍ତି ମିଳିବ। ଏହି ଅତିଥି ହିନ୍ଦୀ ଅଧ୍ୟାପକ ପଦବୀ ପାଇଁ ମୋଟ୍ ୪ ଜଣ ଆବେଦନ କରିଥିଲେ। କିନ୍ତୁ ପ୍ରିନ୍ସପାଲ ଦ୍ୱାରା ଗଠିତ ଏକ ୩ ଜଣିଆ କମିଟି ଅଧ୍ୟାପକ ପଦ ପାଇଁ ଆଶାୟୀ ଥିବା ୩ ଜଣଙ୍କ ଆବେଦନକୁ ଖାରଜ କରିଦେଇଥିଲେ। ସେମାନେ ସ୍ଥାନୀୟ ଅଞ୍ଚଳର ବାସିନ୍ଦା ହୋଇ ନ ଥିବା ଦର୍ଶାଇ ଆବେଦନକୁ ଖାରଜ କରି ଦିଆଯାଇଥିଲା। କିନ୍ତୁ ଏହି କମିଟି ଶେଷରେ ପ୍ରିନ୍ସପାଲଙ୍କ ସ୍ତ୍ରୀଙ୍କୁ ଅତିଥି ଅଧ୍ୟାପିକା ଭାବେ ନିଯୁକ୍ତି ଦେଇଥିଲେ। ଯେତେବେଳେ କି ପ୍ରିନ୍ସପାଲଙ୍କ ସ୍ତ୍ରୀ’ଙ୍କର ସ୍ଥାନୀୟ ବାସିନ୍ଦା ନେଇ କୌଣସି ପ୍ରମାଣପତ୍ର ନ ଥିଲା। ଏହି ଘଟଣାର ୧୫ ବର୍ଷ ପରେ ଯେତେବେଳେ ଏହି ଅତିଥି ଅଧ୍ୟାପିକାଜଣଙ୍କ ଶିକ୍ଷା ନିର୍ଦ୍ଦେଶାଳୟର ଏମ୍ଆଇଏସ୍ ପୋର୍ଟାଲରେ ତଥ୍ୟ ଅପ୍ଲୋଡ୍ କରିଥିଲେ ସେତେବେଳେ ଏହି ଘଟଣା ସାମ୍ନାକୁ ଆସିଲା। ବର୍ତ୍ତମାନ ପ୍ରିନ୍ସପାଲ ଥିବା କର୍ତ୍ତାର ସିଂ ଏହି ଘଟଣାର ତଦନ୍ତ ନିର୍ଦ୍ଦେଶ ଦେଇଥିଲେ। ଏହାପରେ ସେତେବେଳେ ପ୍ରିନ୍ସପାଲ ଥିବା ମହିଳାଙ୍କ ସ୍ବାମୀଙ୍କ କାରସାଦି ସାମ୍ନାକୁ ଆସିଥିଲା। ୧୫ ବର୍ଷର ଦରମା ବାବଦକୁ ୩୨ ଲକ୍ଷ ଟଙ୍କା ଜୁଲାଇ ୨୧ ମଧ୍ୟରେ ଫେରସ୍ତ କରିବାକୁ ମହିଳାଙ୍କୁ ନୋଟିସ ଦିଆଯାଇଛି।
