ଲକ୍ଷ୍ନୌ,୨୧ା୮: ରକ୍ଷାବନ୍ଧନ ହେଉଛି ଭଉଣୀ-ଭାଇଙ୍କ ପବିତ୍ର ଉତ୍ସବ। ଏହିଦିନ ଭଉଣୀ ନିଜ ଭାଇମାନଙ୍କ ଦୀର୍ଘଜୀବନ କାମନା କରି ରାଖୀ ବାନ୍ଧିଥାନ୍ତି। ଭାଇ ମଧ୍ୟ ଭଉଣୀଙ୍କର ରକ୍ଷା କରିବା ପାଇଁ ବଜ୍ର ଶପଥ ନେଇଥାନ୍ତି। ଏହା ସହିତ ଉପହାର ମଧ୍ୟ ଦେଇଥାନ୍ତି।
ଉତ୍ତରପ୍ରଦେଶର ବରେଲି ଜିଲା ଜେଲ୍ରେ ଥିବା କଏଦୀମାନେ ଏଥର ନିଆରା ଢଙ୍ଗରେ ରକ୍ଷାବନ୍ଧନ ପାଳନ କରିବେ। ଜେଲ୍ରେ ଥାଇ ସେମାନେ ଭଉଣୀମାନଙ୍କ ସୁରକ୍ଷା କରିବେ। କଏଦୀ ଭାଇଙ୍କୁ ରାଖୀ ବାନ୍ଧିବା ପାଇଁ ଭଉଣୀମାନେ ବି ଜେଲ୍କୁ ଆସିବେ। ଏଥର କଏଦୀ ଭାଇମାନେ ଭଉଣୀମାନଙ୍କୁ ମାସ୍କ ଉପହାର ଦେବେ। ଏଥିପାଇଁ ଜେଲ୍ରେ ଥାଇ ମାସ୍କ ତିଆରିରେ ବ୍ୟସ୍ତ ରହିଛନ୍ତି କଏଦୀ ଭାଇମାନେ।
ବରେଲି ଜେଲ୍ କର୍ତ୍ତୃପକ୍ଷ କଏଦୀମାନଙ୍କ ସହିତ ଭାବନାତ୍ମକ ରୂପରେ ଯୋଡ଼ି ହେବାକୁ ଏପରି ପ୍ରୟାସ ଆରମ୍ଭ କରିଛନ୍ତି। ଚାରିଆଡ଼େ କରୋନା ମହାମାରୀ ବ୍ୟାପିଥିବାରୁ ଜେଲ୍ରେ ମଧ୍ୟ ସଂକ୍ରମଣ ବ୍ୟାପିବାର ଭୟ ରହିଛି। ପରିବାର ସହିତ କଏଦୀମାନଙ୍କର ଦେଖାସାକ୍ଷାତ ବନ୍ଦ ରହିଛି। ଏହି ସମୟରେ ସେମାନଙ୍କୁ ଅବସାଦରୁ ମୁକ୍ତ କରିବା ପାଇଁ ଜେଲ ଏସ୍ପି ବିଜୟ ବିକ୍ରମ ସିଂହ ମହାଭାରତ ଏବଂ ରାମାୟଣ ପାଠ କରାଉଛନ୍ତି। ଖାଲି ଏତିକି ନୁହେଁ, ଗୀତ ମଧ୍ୟ ଶିଖୁଛନ୍ତି କଏଦୀ। ଜେଲ୍ରେ ଥାଇ କିଛି ନା କିଛି କାମ କରୁଛନ୍ତି। ଏହା ଦ୍ୱାରା ସେମାନେ ମାନସିକସ୍ତରରେ ଦୃଢ଼ ହେବେ ବୋଲି ଜେଲ୍ କର୍ତ୍ତୃପକ୍ଷ କହିଛନ୍ତି।