ବେଙ୍ଗାଲୁରୁ,୪ା୮: କେନ୍ଦ୍ରୀୟ ଆଫ୍ରିକୀୟ ରାଷ୍ଟ୍ର କଙ୍ଗୋର ଜଣେ ନାଗରିକଙ୍କ ବେଙ୍ଗାଲୁରୁ ପୋଲିସ ହାଜତରେ ମୃତ୍ୟୁ ଘଟିଛି। ଏହାକୁ ନେଇ ମଙ୍ଗଳବାର ବିକ୍ଷୋଭ ଚାଲିଥିବାବେଳେ ପୋଲିସ ଲାଠିଚାର୍ଜ କରିଛି। ଏଥିରେ ଅନେକେ ଆହତ ହୋଇଛନ୍ତି। ହିଂସା ଭିଆଇବା ଅଭିଯୋଗରେ ପୋଲିସ ୫ ବିକ୍ଷୋଭକାରୀଙ୍କୁ ଗିରଫ କରିଛି।
ପୋଲିସର କହିବା ହେଉଛି, ୨୭ ବର୍ଷୀୟ କଙ୍ଗୋ ନାଗରିକ ଜୋଏଲ୍ ଶିଣ୍ଡାନି ମାଲୁ ଓରଫ ଜୋଆନ୍ ବଞ୍ଜାରା ଲେଆଉଟ୍ରେ ଡ୍ରଗ୍ସ ଡିଲ୍ ବେଳେ ରବିବାର ରାତିରେ ଧରାପଡ଼ିଥିଲେ। ଜୋଆନ୍ଙ୍କୁ ସ୍ଥାନୀୟ ଜେ.ସି. ନଗର ଥାନାକୁ ନିଆଯାଇଥିବାବେଳେ ସେ ଛାତିରେ ଯନ୍ତ୍ରଣା ଅନୁଭବ କରୁଥିବା କହିଥିଲେ। ହସ୍ପିଟାଲରେ ଭର୍ତ୍ତି କରାଯାଇଥିବାବେଳେ ସୋମବାର ସକାଳେ ହୃଦ୍ଘାତରେ ତାଙ୍କର ମୃତ୍ୟୁ ଘଟିଥିଲା। ତେବେ କଙ୍ଗୋ ସମୁଦାୟ ଏହାକୁ ହାଜତ ମୃତ୍ୟୁ ବୋଲି ଅଭିହିତ କରିଛନ୍ତି। ପୋଲିସ ମାଡ଼ରେ ତାଙ୍କର ମୃତ୍ୟୁ ଘଟିଥିବା ସେମାନେ ଅଭିଯୋଗ କରିଛନ୍ତି। ବିବାଦ ଘନେଇବାରୁ ଦିଲ୍ଲୀରେ ଥିବା କଙ୍ଗୋ ଦୂତାବାସ ଅଧିକାରୀମାନେ ମଙ୍ଗଳବାର ବେଙ୍ଗାଲୁରୁରେ ପହଞ୍ଚତ୍ ଘଟଣା ସମ୍ପର୍କରେ ଅନୁଧ୍ୟାନ କରିଛନ୍ତି। ସେମାନେ ଜୋଆନ୍ଙ୍କ ମୃତଦେହକୁ ଦେଖିବା ପରେ ବ୍ୟବଚ୍ଛେଦ କରାଯିବ ବୋଲି ବେଙ୍ଗାଲୁରୁ ପୋଲିସ କହିଛି। ଇତିମଧ୍ୟରେ ୩୦-୪୦ ଜଣ କଙ୍ଗୋ ନାଗରିକ ପୁଙ୍ଖାନୁପୁଙ୍ଖ ତଦନ୍ତ ଦାବିରେ ଜେ.ସି. ନଗର ଥାନା ଆଗରେ ବିକ୍ଷୋଭ କରିଥିଲେ। ବିକ୍ଷୋଭ ବେଳେ ପୋଲିସ ସେମାନଙ୍କ ଉପରେ ଲାଠିଚାର୍ଜ କରିଥିଲା। ଲାଠିମାଡ଼ ବେଳର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ଅଭିଯୋଗକୁ ଡେପୁଟି ପୋଲିସ କମିଶନର ଧର୍ମେନ୍ଦ୍ର ମୀନା ଖଣ୍ଡନ କରିଛନ୍ତି। ବିକ୍ଷୋଭକାରୀମାନେ ପୋଲିସକୁ କର୍ତ୍ତବ୍ୟ ସମ୍ପାଦନରେ ବାଧା ଦେବା ସହ ଜଣେ ମହିଳାଙ୍କୁ ଅସଦାଚରଣ କରିଥିଲେ। ଏହାସହ ସରକାରୀ ସମ୍ପତ୍ତି ଭଙ୍ଗାରୁଜା କରିଥିଲେ। ଫଳରେ ପୋଲିସ ବାଧ୍ୟହୋଇ କାର୍ଯ୍ୟାନୁଷ୍ଠାନ ନେଇଥିଲା ବୋଲି ଡିସିପି କହିଛନ୍ତି।
