ରାମପୁର, ୩୧।୮: ଉତ୍ତର ପ୍ରଦେଶ ରାମପୁର ଜିଲାର କୋଭିଡ୍ ଆଇସୋଲେଶନ ସେଣ୍ଟରରୁ ଜଣେ କଏଦୀ ଫେରାର୍ ହୋଇଯାଇଛି। କିଛିଦିନ ତଳେ ଜେଲରେ ଥିବା କିଛି କଏଦୀଙ୍କ ନିକଟରେ କରୋନା ଲକ୍ଷଣ ପ୍ରକାଶ ପାଇଥିଲା। ଏହାପରେ ସେହି କଏଦୀମାନଙ୍କୁ ରାମପୁର ଜୋହର ବିଶ୍ୱବିଦ୍ୟାଳୟ ଆଇସୋଲେଶନ ସେଣ୍ଟରେ ଭର୍ତ୍ତି କରାଯାଇଥିଲା। ସୋମବାର ଏହି କଏଦୀମାନଙ୍କୁ ପୁନର୍ବାର ଜେଲ୍କୁ ପଠାଯାଉଥିଲା। କୋଭିଡ୍ ସେଣ୍ଟର ବାହାରେ କଏଦୀଙ୍କୁ ନେବା ପାଇଁ ଗାଡ଼ି ଠିଆ ହୋଇଥିଲା। କଏଦୀଙ୍କୁ ଜଣ ଜଣକରି ଗାଡ଼ିକୁ ନିଆଯାଉଥିଲା। ଏହି ସମୟରେ ଜଣେ କଏଦୀ କହିଥିଲା ଯେ, ଓ୍ବାର୍ଡରେ ତା‘ର କିଛି ଜିନିଷ ରହିଯାଇଛି। ଏହାପରେ ସେ ଭିତରକୁ ଯାଉ ଫେରାର୍ ହୋଇଯାଇଥିଲା। ବିଶ୍ୱବିଦ୍ୟାଳୟ ପରିସରରେ ଅସ୍ଥାୟୀ ଭାବେ କରାଯାଇଥିବା ଏହି ଆଇସୋଲେଶନ ଓ୍ବାର୍ଡଟି ଆକାରରେ ବହୁତ ବଡ଼। ଏଠାରେ ପୋଲିସ ବ୍ୟତୀତ ଅନ୍ୟକୌଣସି ସୁରକ୍ଷା ବ୍ୟବସ୍ଥା ନାହିଁ। ତେଣୁ କଏଦୀଜଣଙ୍କ ଖସିଯିବାର ସୁଯୋଗ ପାଇଥିଲା ବୋଲି ମୁଖ୍ୟ ଚିକିତ୍ସା ଅଧିକାରୀ କହିଛନ୍ତି। ପୋଲିସ ପକ୍ଷରୁ ଫେରାର୍ କଏଦୀକୁ ଧରିବା ପାଇଁ ଉଦ୍ୟମ ଚାଲିଛି।
