ସମ୍ବଲପୁର,୧୪ା୫(ବ୍ୟୁରୋ): ସମ୍ବଲପୁର ମଣ୍ଡଳ କାରାଗାରର ଜଣେ କଏଦୀ ରବିବାର ପାଇଖାନାକୁ ଶୌଚ ହେବାକୁ ଯାଇ ବେକରେ ଗାମୁଛା ବାନ୍ଧି ଆତ୍ମହତ୍ୟା କରିଛନ୍ତି। ସେ ହେଲେ ସଦର ଥାନା ତକବା ଗ୍ରାମର ଧରଣୀଧର ମହାନନ୍ଦ(୪୫)। ଏ ନେଇ ଧନୁପାଲି ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି। ଏହି ଘଟଣା ପରେ ମଣ୍ଡଳ କାରାଗାର କଏଦୀମାନଙ୍କ ପାଇଁ ଅସୁରକ୍ଷିତ ହୋଇପଡିଛି। କାର୍ଯ୍ୟରତ କର୍ମଚାରୀ ଓ ଦାୟିତ୍ୱରେ ଥିବା ଅଧିକାରୀଙ୍କ ଅବହେଳା ଯୋଗୁ ଜଣେ କଏଦୀ ଆତ୍ମହତ୍ୟା କରିବାରେ ସକ୍ଷମ ହେଲେ ବୋଲି ଆଲୋଚନା ହେଉଛି।
ମିଳିଥିବା ସୂଚନା ଅନୁସାରେ, ତକବା ଗ୍ରାମର ଧରଣୀଧରଙ୍କ ପାରିବାରିକ ସମ୍ପର୍କ ଭଲ ନ ଥିଲା। ଧରଣୀଧର ଛୋଟ ଛୋଟ କଥାକୁ ନେଇ ସ୍ତ୍ରୀଙ୍କ ସହିତ ବାରମ୍ବାର ଝଗଡ଼ା କରୁଥିଲେ। କିଛିଦିନ ତଳେ ସେ ଡାକ୍ତରଖାନା ଯିବାକୁ କହି ସ୍ତ୍ରୀଙ୍କ ପାଖରୁ ୫ ଶହ ଟଙ୍କା ନେଇଥିଲେ। ହେଲେ ଡାକ୍ତରଙ୍କ ପାଖକୁ ନ ଯାଇ ଉକ୍ତ ଟଙ୍କା ନିଶାଦ୍ରବ୍ୟ ସେବନରେ ଖର୍ଚ୍ଚ କରିଥିଲେ। ପରେ ପୁଣିଥରେ ସ୍ତ୍ରୀଙ୍କୁ ଟଙ୍କା ମାଗିଥିଲେ। ଟଙ୍କା ନ ଦେବାରୁ ଧରଣୀଧର ତାଙ୍କୁ ଟାଙ୍ଗିଆରେ ଆକ୍ରମଣ କରିଥିଲେ। ମେଡିକାଲରେ ଚିକିତ୍ସିତ ହୋଇ ସୁସ୍ଥ ହେବା ପରେ ତାଙ୍କ ସ୍ତ୍ରୀ ଥାନାରେ ଅଭିଯୋଗ କରିଥିଲେ। ଏନେଇ ପୋଲିସ ଏକ ମାମଲା ରୁଜୁ କରି ଶନିବାର ଧରଣୀଧରଙ୍କୁ କୋର୍ଟ ଚାଲାଣ କରିଥିଲା। ସ୍ବାସ୍ଥ୍ୟ ପରୀକ୍ଷା ଓ ସମସ୍ତ କାଗଜପତ୍ର ପ୍ରକ୍ରିୟା ସରିବା ପରେ ରାତି ୧୦ଟାରେ ତାଙ୍କୁ ମଣ୍ଡଳ କାରାଗାରକୁ ପଠାଇ ଦିଆଯାଇଥିଲା। କାରାଗାରର ଗୋଟିଏ ହଲରେ ପ୍ରାୟ ୩୦ଜଣ କଏଦୀ ଏକାଠି ରାତିରେ ରହିଥିଲେ। ସକାଳେ ଧରଣୀଧର ଶୌଚ ପାଇଁ ପାଇଖାନାକୁ ଯାଇଥିଲେ। ଫେରିବାରେ ବିଳମ୍ବ ହେବାରୁ ଅନ୍ୟ ଜଣେ କଏଦୀ ପାଇଖାନା ପାଖକୁ ଯିବା ପରେ ସେ ବେକରେ ଗାମୁଛା ଲଗାଇ ସ୍କାଏଲାଇଟରେ ଝୁଲିପଡିଥିବା ଦେଖିବାକୁ ପାଇଥିଲେ। ପରେ ଜେଲ କର୍ମଚାରୀ ତାଙ୍କୁ ଜିଲା ସଦର ଡାକ୍ତରଖାନାକୁ ନେଇଥିଲେ। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏ ସମ୍ପର୍କରେ ଜେଲ ଅଧୀକ୍ଷକ ସନ୍ତୋଷ କୁମାର ବାରିକ କହିଛନ୍ତି, ଶନିବାର ରାତିରେ ଧରଣୀଧର ଜେଲକୁ ଆସିଥିଲେ। ସକାଳେ ଶୌଚଯିବା ସମୟରେ ଏଭଳି ଘଟଣା ଘଟିଛି। ମେଡିକାଲ ନିଆଯାଇଥିବାବେଳେ ଡାକ୍ତର ମୃତ ଘୋଷଣା କରିଥିବା ସେ କହିଛନ୍ତି।