ନୂଆଦିଲ୍ଲୀ, ୩ା୭- ଭାରତୀୟ ଟେଷ୍ଟ ସ୍ପେଶାଲିଷ୍ଟ ଚେତେଶ୍ୱର ପୂଜାରାଙ୍କ ସ୍ଥାନରେ ଖେଳିବା ପାଇଁ ଯୁବ ପୃଥ୍ବୀ ଶ’ ପୂରା ଫିଟ୍। ଜଣେ ଫ୍ୟାନଙ୍କ ପ୍ରଶ୍ନର ଉତ୍ତର ଦେଇ ଏହା କହିଛନ୍ତି ପୂର୍ବତନ ଅଷ୍ଟ୍ରେଲିଆନ ସ୍ପିନର ବ୍ରାଡ୍ ହଗ୍।
ଜଣେ ଫ୍ୟାନ ଟୁଇଟରରେ ହଗ୍ଙ୍କୁ ପ୍ରଶ୍ନ କରିଥିଲେ, ଇଂଲଣ୍ଡ ବିପକ୍ଷ ଟେଷ୍ଟ ସିରିଜ୍ରେ ପୂଜାରାଙ୍କ ସ୍ଥାନରେ ଲୋକେଶ ରାହୁଲ ଖେଳିବା ଉଚିତ ହେବ କି? ଉତ୍ତରରେ ହଗ୍ ଲେଖିଥିଲେ, ”ଯଦି କୌଣସି ଖେଳାଳି ପୂଜାରାଙ୍କ ସ୍ଥାନ ନେଇପାରିବେ, ତେବେ ସେ ହେଉଛନ୍ତି ପୃଥ୍ବୀ। ଓପନିଂ ଅପେକ୍ଷା ୩ ନଂରେ ଖେଳିବା ତାଙ୍କୁ ସୁବିଧା ହେବ। ତାଙ୍କ ପାଖରେ ପ୍ରତିଭା ଓ ଭବିଷ୍ୟତ ଭରି ରହିଛି। ତେବେ ଇଂଲଣ୍ଡ ଗସ୍ତ ଲାଗି ତାଙ୍କର ଚୟନ ହୋଇନାହିଁ। କିନ୍ତୁ ଓ୍ବାଇଲ୍ଡ କାର୍ଡ ଏଣ୍ଟ୍ରି ହୋଇପାରେ“।
ଗତମାସରେ ନ୍ୟୁଜିଲାଣ୍ଡ ବିପକ୍ଷରେ ଖେଳାଯାଇଥିବା ବିଶ୍ୱ ଟେଷ୍ଟ ଚାମ୍ପିୟନଶିପ୍ (ଡବ୍ଲ୍ୟୁଟିସି) ଫାଇନାଲରେ ସମ୍ପୂର୍ଣ୍ଣ ବିଫଳ ହୋଇଥିଲେ ପୂଜାରା। ଉଭୟ ଇନିଂସରେ ଯଥାକ୍ରମେ ୮ ଓ ୧୫ ରନ୍ କରିଥିଲେ। ଅନ୍ୟପକ୍ଷରେ ଦିନିକିଆ ଓ ଟି୨୦ ସିରିଜ୍ ଲାଗି ଟିମ୍ ଇଣ୍ଡିଆ ସହ ଶ୍ରୀଲଙ୍କା ଗସ୍ତ କରିଛନ୍ତି ଶ’।