ମୁମ୍ବାଇ: ବଲିଉଡ୍ରୁ ହଲିଉଡ୍ ପର୍ଯ୍ୟନ୍ତ ଅଭିନୟରେ ସମସ୍ତଙ୍କୁ ଆକର୍ଷିତ କରିଥିବା ଅଭିନେତ୍ରୀ ତଥା ଦେଶୀ ଗର୍ଲ ପ୍ରିୟଙ୍କା ଚୋପ୍ରା ଏମିତି ଜଣେ ବ୍ୟକ୍ତିତ୍ୱ, ଯାହାଙ୍କ ପ୍ରତ୍ୟେକ ଗତିବିଧିକୁ ସମସ୍ତେ ଦେଖନ୍ତି। ପ୍ରିୟଙ୍କା ଯାହା ବି କରନ୍ତି, ତୁରନ୍ତ ନଜରକୁ ଚାଲିଆସନ୍ତି। ସୋସିଆଲ ମିଡିଆରେ ଦେଶୀ ଗର୍ଲଙ୍କର ବହୁତ ପ୍ରଶଂସକ ଅଛନ୍ତି। ବର୍ତ୍ତମାନ ପ୍ରିୟଙ୍କା ତାଙ୍କ ଇନ୍ଷ୍ଟାଗ୍ରାମ ପ୍ରୋଫାଇଲ ପରିବର୍ତ୍ତନ କରିଛନ୍ତି, ଯାହା ଚର୍ଚ୍ଚାର ବିଷୟ ପାଲଟିଛି।
ତାଙ୍କ ପ୍ରୋଜେକ୍ଟ ବ୍ୟତୀତ ଗ୍ଲୋବାଲ ଆଇକନ ପ୍ରିୟଙ୍କା ଆଜିକାଲି ତାଙ୍କ ଝିଅ ମାଳତୀ ମେରୀ ଚୋପ୍ରା ଜୋନାସଙ୍କ ସହ ଅଧିକାଂଶ ସମୟ ବିତାଉଥିବାର ନଜର ଆସିଛନ୍ତି। ପ୍ରିୟଙ୍କା ସୋସିଆଲ ମିଡିଆରେ ମାଳତୀଙ୍କ ସହ ଅନେକ ଫଟୋ ଶେୟାର କରିଛନ୍ତି, କିନ୍ତୁ ଏପର୍ଯ୍ୟନ୍ତ ତାଙ୍କ ଚେହେରା ଦେଖାଇ ନାହାନ୍ତି। ପ୍ରିୟଙ୍କା ତାଙ୍କ ଇନ୍ଷ୍ଟାଗ୍ରାମ ପ୍ରୋଫାଇଲ ଏଡିଟ କରି ଏକ ନୂଆ ଫଟୋ ପୋଷ୍ଟ କରିଛନ୍ତି। ସେ ତାଙ୍କ ଝିଅ ମାଳତୀ ମେରୀଙ୍କ ସହ ନୂଆ ଫଟୋ ଶେୟାର କରିଛନ୍ତି।
ପ୍ରିୟଙ୍କା ଏଥର ମଧ୍ୟ ଝିଅର ଯେଉଁ ଫଟୋ ପ୍ରୋଫାଇଲରେ ରଖିଛନ୍ତି, ସେଥିରେ ବି ମୁହଁ ଦେଖାଇ ନାହାନ୍ତି।ପ୍ରିୟଙ୍କା ଇନ୍ଷ୍ଟାଗ୍ରାମ ଷ୍ଟୋରୀରେ ତାଙ୍କ ଭାଇ ସିଦ୍ଧାର୍ଥ ଚୋପ୍ରାଙ୍କ ସହ ଝିଅର ଏକ ଫଟୋ ଶେୟାର କରିଛନ୍ତି। ସେଥିରେ ବି ଝିଅର ଚେହେରା ଦେଖାଯାଉନାହିଁ। ପ୍ରିୟଙ୍କା ତାଙ୍କ ଭାଇ ଏବଂ ଝିଅର ଏହି ଫଟୋ ଶେୟାର କରି ‘ମାଇ ହାର୍ଟ’ ଲେଖି ଭାଇ ସିଦ୍ଧାର୍ଥଙ୍କୁ ଟ୍ୟାଗ କରିଛନ୍ତି।
ଚଳିତ ବର୍ଷ ଜାନୁୟାରୀରେ ପ୍ରିୟଙ୍କା ଏବଂ ନିକ୍ ଜୋନାସ ସରୋଗେସି ମାଧ୍ୟମରେ ମାତାପିତା ହେବାର ସୌଭାଗ୍ୟ ଅର୍ଜନ କରିଛନ୍ତି। ଯେତେବେଳେ ପ୍ରିୟଙ୍କା ଘରେ ଥାଆନ୍ତି, ସେତେବେଳେ ସେ ତାଙ୍କ ଝିଅ ସହିତ ମଜା କରୁଥିବା ଦେଖାଯାଏ। ଫଟୋଗୁଡ଼ିକ ଶେୟାର କରନ୍ତି ସତ କିନ୍ତୁ ସେ ଝିଅର ଚେହେରା ଆଜି ଯାଏ ଲୁଚାଇ ଆସିଛନ୍ତି। ତେବେ ଦେଖାଯାଉ କେବେ ପୂରା ଚେହେରା ଦେଖାଉଛନ୍ତି।
