ମୁମ୍ବାଇ: ମଦର୍ସ ଡେ’ ସମସ୍ତ ମାଆ ଓ ପିଲାମାନଙ୍କ ପାଇଁ ସ୍ୱତନ୍ତ୍ର ହୋଇଥାଏ । ହେଲେ ଚଳିତ ବର୍ଷ ଏହି ଦିନ ବଲିଉଡ ଅଭିନେତ୍ରୀ ପ୍ରିୟଙ୍କା ଚୋପ୍ରାଙ୍କ ପାଇଁ ଏକ ଭିନ୍ନ ଅନୁଭୁତି ଆଣି ଦେଇଛି । ଝିଅ ମାଳତୀ ମେରି ଚୋପ୍ରା ଜୋନସଙ୍କୁ ମଦର୍ସ ଡେ’ରେ ହିଁ ଆଲିଙ୍ଗନ କରିଛନ୍ତି ପିସି । ୮ ମେ ୨୦୨୨ରେ ସାରା ବିଶ୍ୱ ପାଳନ କରିଛି ମଦର୍ସ ଡେ । ଏହି ଅବସରରେ ପ୍ରିୟଙ୍କା ଚୋପ୍ରା ଓ ନିକ ଜୋନାସ ତାଙ୍କ ଝିଅର ଫାଷ୍ଟ ଲୁକ ଶେୟାର କରିଛନ୍ତି ।
ନିକ ଓ ପ୍ରିୟଙ୍କା କହିଛନ୍ତି ତାଙ୍କ ଝିଅ ୧୦୦ ଦିନ ହସ୍ପିଟାଲରେ ଏନଆଇସିୟୁରେ ରହିବା ପରେ ଶେଷରେ ଘରକୁ ଆସିଛି । ସେ ଯେଉଁ ଫଟୋ ଶେୟାର କରିଛନ୍ତି ସେଥିରେ ପିସି ଝିଅ ମାଳତିକୁ ଛାତିରେ ଜାବୁଡି ଧରିଥିବା ବେଳେ ନିକ ତାଙ୍କ ନିକଟରେ ରହିଛନ୍ତି । ହେଲେ ଏମାନେ ଝିଅର ମୁହଁକୁ ହ୍ୱାଇଟ ହାର୍ଟ ଇମୋଜିରେ ଲୁଚାଇ ଦେଇଛନ୍ତି ।
ଫଟୋ ଶେୟାର କରି କପଲ ବିଗତ ଦିନର କିଛି ଦୁଃଖ କଥା କହିଛନ୍ତି । ଯାହା କିଛି ପରିବାରରେ ଦେଖାଯାଏ ବୋଲି ବି ସେମାନେ ଉଲ୍ଲେଖ କରିଛନ୍ତି । କ୍ୟାପଶନରେ ପିସି ଲେଖିଛନ୍ତି, ପ୍ରତ୍ୟେକ ପରିବାରର ଯାତ୍ରା ଭିନ୍ନ ହୋଇଥାଏ । ହେଲେ ଏଥିରେ ବିଶ୍ୱାସ ରଖିବା ଜରୁରୀ । ଆମ ପାଇଁ ଗତ କିଛି ମାସ ଚ୍ୟାଲେଞ୍ଜ ଭରା ଥିଲା । ହେଲେ ଏବେ ଜଣାପଡିଛି କି ପ୍ରତ୍ୟେକ ମୁହୂର୍ତ୍ତ ପରଫେକ୍ଟ ଓ ମୂଲ୍ୟବାନ ହୋଇଥାଏ । ଆମେ ବହୁତ ଖୁସି ଯେ ଶେଷରେ ଆମ ଝିଅ ଘରକୁ ଆସିଛି । ଆମେ ଲସ ଆଞ୍ଜେଲସର ରାଡି ଚିଲଡ୍ରେନ୍ସ ଲା ଜୋଲା ଆଣ୍ଡ କେଡାର ସିନାଇ ହସ୍ପିଟାଲର ସମସ୍ତ ଡାକ୍ତର, ନର୍ସ ଓ ସ୍ପେଶାଲିଷ୍ଟଙ୍କୁ ଧନ୍ୟବାଦ ଦେଉଛୁ । ଯେଉଁମାନେ ନିଶ୍ୱାର୍ଥପର ଭବେ ଆମକୁ ସାହାଯ୍ୟ କରିଛନ୍ତି । ଆମ ଜୀବନର ନୂଆ ଅଧ୍ୟାୟ ଆରମ୍ଭ ହେଲା । ଏମ, ମମ୍ମି ଓ ଡାଡି ତୁମକୁ ବହୁତ ଭଲ ପାଆନ୍ତି ।
ଏହି ଖୁସିରେ ନିକ ବି ପ୍ରିୟଙ୍କାଙ୍କ ଜୀବନର ପ୍ରଥମ ମଦର୍ସ ଡେ’ ୱିଶ କରିବା ସହ ତାଙ୍କର ଖୁବ୍ ପ୍ରଶଂସା କରିଛନ୍ତି ।
