ନୂଆଦିଲ୍ଲୀ,୨୨ା୪: ଲୋକ ସଭା ସଦସ୍ୟତା ହରାଇଥିବା କଂଗ୍ରେସ ନେତା ରାହୁଲ ଗାନ୍ଧୀ ୧୨ ତୋଗଲକ୍ ଲେନରେ ଥିବା ସରକାରୀ ବାସଭବନ ଶନିବାର ଛାଡ଼ି ଦେଇଛନ୍ତି। ଗତ ୧୪ ତାରିଖରେ କାର୍ଯ୍ୟାଳୟ କାଗଜପତ୍ର ସହ ନିଜର କିଛି ସାମଗ୍ରୀ ମାଆ ସୋନିଆ ଗାନ୍ଧୀଙ୍କ ବାସଭବନକୁ ଶିଫ୍ଟ କରି ଦେଇଥିଲେ। ଶୁକ୍ରବାର ମଧ୍ୟ ରାହୁଲ ଆଉ କିଛି ଆସବାବପତ୍ର ନେଇଯାଇଥିଲେ। ତେବେ ଆଜି ବାସଭବନକୁ ପୂରା ଖାଲି କରିଛନ୍ତି। ପ୍ରାୟ ଦୁଇ ଦଶନ୍ଧି ଧରି ରାହୁଲ ଉକ୍ତ ବାସଭବନରେ ରହି ଆସୁଥିଲେ। ଯେଉଁ ବାସଭବନକୁ ଏମ୍ପି ଭାବେ ଦିଆଯାଇଥିଲା।
सच्चाई बोलने की कीमत है आज कल!
वो जो भी कीमत होगी, मैं चुकाता जाऊंगा। pic.twitter.com/1ZN6rbGFIu
— Rahul Gandhi (@RahulGandhi) April 22, 2023
ରାହୁଲ ବାସଭବନ ଛାଡ଼ିବା ସମୟର ଭିଡିଓ ନିଜେ ତାଙ୍କ ଟୁଇଟର ପେଜ୍ରେ ଶେୟାର କରିଛନ୍ତି। ଭିଡିଓରେ ଦେଖିବାକୁ ମିଳିଛି ରାହୁଲ ବାସଭବନ ଛାଡ଼ିବା ସମୟରେ ତାଙ୍କ ଭଉଣୀ ପ୍ରିୟଙ୍କା ମଧ୍ୟ ତାଙ୍କ ସାଙ୍ଗରେ ରହିଛନ୍ତି। ରାହୁଲ ଗୋଟିଏ ରୁମ୍ରୁ ଆଉ ଗୋଟିଏ ରୁମ୍କୁ ଯାଉଛନ୍ତି। ସବୁ ଲାଇଟ୍ ସୁଇଚ୍ ଅଫ୍ ବି କରୁଛନ୍ତି। ତାଲା ପକାଇ ଚାବି କର୍ମଚାରୀଙ୍କୁ ହସ୍ତାନ୍ତର କରୁଛନ୍ତି। ଏହି ସମୟରେ ଭଉଣୀ ପ୍ରିୟଙ୍କାଙ୍କ ଆଖିରେ ଲୁହ ଆସିଥିଲା। ସେ ଲୁହ ପୋଛୁଥିବାର ଭିଡିଓରେ ଦେଖିବାକୁ ମିଳିଛି। ଭିଡିଓରେ ରାହୁଲ କହିଛନ୍ତି, ଏହି ଘରକୁ ଭାରତର ଲୋକମାନେ ମୋତେ ୧୯ ବର୍ଷ ଧରି ଦେଇଥିଲେ। ମୁଁ ସେମାନଙ୍କୁ ଧନ୍ୟବାଦ ଦେବାକୁ ଚାହୁଁଛି। ଆଜିକାଲି ସତ କହିବାର ମୂଲ୍ୟ ବି ଅଛି। ମୂଲ୍ୟ ଯାହା ବି ହେଉ ମୁଁ ଦେବି।
ଅନ୍ୟପକ୍ଷରେ ପ୍ରିୟଙ୍କା କହିଛନ୍ତି, ମୋ’ ଭାଇ ସତ କହିଥିବାରୁ ତାକୁ ଦଣ୍ଡ ମିଳିଛି। ସଂଗ୍ରାମ ଜାରି ରହିବ ବୋଲି ସେ କହିଛନ୍ତି।
