ଲକ୍ଷ୍ନୌ,୨୧।୧୦: ଉତ୍ତରପ୍ରଦେଶରେ ଆସନ୍ତା ୨୦୨୨ ଫେବୃୟାରୀ-ମାର୍ଚ୍ଚରେ ବିଧାନସଭା ନିର୍ବାଚନ ଅନୁଷ୍ଠିତ ହେବ। ରାଜ୍ୟେjରଗତ ୩ ଦଶନ୍ଧି ଧରି କଂଗ୍ରେସ କ୍ଷମତାଠାରୁ ଦୂରରେ ରହି ବନବାସ କାଟୁଛି। ଏପରି ସ୍ଥଳେ ମିଶନ-୨୦୨୨ ଅନ୍ତର୍ଗତ ପୁଣି ଥରେ କ୍ଷମତା ଦଖଲ ପାଇଁ କଂଗ୍ରେସ ପକ୍ଷରୁ ଉଦ୍ୟମ ଆରମ୍ଭ ହୋଇଛି। ଏହି ମର୍ମରେ କଂଗ୍ରେସ ରାଷ୍ଟ୍ରୀୟ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା ରାଜ୍ୟରେ କଂଗ୍ରେସ କ୍ଷମତାକୁ ଆସିଲେ ଝିଅଙ୍କୁ ଇଲୋକ୍ଟ୍ରୋନିକ୍ସ୍ ସ୍କୁଟି ଏବଂ ସ୍ମାର୍ଟଫୋନ୍ ପ୍ରଦାନ କରିବାକୁ ପ୍ରତିଶ୍ରୁତି ଦେଇଛନ୍ତି।
କଂଗ୍ରେସ ରାଜ୍ୟରେ ମହିଳାଙ୍କ ସହିତ ଯୁବବର୍ଗ ଭୋଟରଙ୍କୁ ହାତେଇବାର ଯୋଜନା କରୁଛି। ଏହା ଅନ୍ତର୍ଗତ ପ୍ରିୟଙ୍କା ପୂର୍ବରୁ ରାଜ୍ୟରେ ୪୦ ପ୍ରତିଶତ ମହିଳା ପ୍ରାର୍ଥୀଙ୍କୁ ଟିକଟ ଦେବାକୁ ଘୋଷଣା କରିଥିବାବେଳେ ଏବେ ଏଭଳି ପ୍ରତିଶ୍ରୁତି ଦେଇଛନ୍ତି।
ଗୁରୁବାର ପ୍ରିୟଙ୍କା ନିଜ ଟୁଇଟର ହ୍ୟାଣ୍ଡେଲରେ ଟୁଇଟ୍ କରି କହିଛନ୍ତି ଯେ, ଇତିମଧ୍ୟରେ ମୁଁ କେତେକ ଛାତ୍ରୀଙ୍କୁ ଭେଟିଛି। ସେମାନଙ୍କ ଅଭାବ ଅସୁବିଧା ଏବଂ ଘରୁ କଲେଜ ଯିବା ପାଇଁ ହେଉଥିବା ସମସ୍ୟା ସମ୍ପର୍କରେ ପଚାରି ବୁଝିଛି।
ଇଣ୍ଟର ମିଡ଼ିଏଟ୍ ପାସ୍ କରିଥିବା ଛାତ୍ରୀଙ୍କୁ ସ୍ମାର୍ଟଫୋନ୍ ଏବଂ ସ୍ନାତକ ଛାତ୍ରୀଙ୍କୁ ଇଲୋକ୍ଟ୍ରୋନିକ୍ସ୍ ସ୍କୁଟି ପ୍ରଦାନ କରାଯିବ। ରାଜ୍ୟରେ ପ୍ରିୟଙ୍କା ଏଭଳି ନୂଆ ନୂଆ ଘୋଷଣା ମାଧ୍ୟମରେ ଏବେ ମହିଳା କାର୍ଡ ଖେଳିବା ଆରମ୍ଭ କରିଥିବା ରାଜନୈତିକ ସମୀକ୍ଷକ ମତପୋଷଣ କରିଛନ୍ତି।