ପାରଳାଖେମୁଣ୍ଡି,୯।୧୧(ଡି.ଏନ୍.ଏ.): ପାରଳାଖେମୁଣ୍ଡି ସହର ଉପକଣ୍ଠରେ ଥିବା ରାମସାଗର ରାସ୍ତାରେ ଅବାଧ ପାର୍କିଂ ଯୋଗୁ ସମସ୍ୟା ସୃଷ୍ଟି ହୋଇଛି। ଦିନରେ ସହର ମଧ୍ୟକୁ ଭାରିଜାନବାହାନ ପ୍ରବେଶ ପାଇଁ ସମୟ ନିର୍ଦ୍ଧଷ୍ଟ ରହିଛି । ସକାଳ ୮ରୁ ମଧ୍ୟାହ୍ନ ୧ଟା ଏବଂ ଅପରାହ୍ନ ୩ରୁ ରାତି ୮ଟା ପର୍ଯ୍ୟନ୍ତ ସହର ମଧ୍ୟକୁ ଭାରୀଯାନ ପ୍ରବେଶ ଉପରେ କଟକଣା ରହିଛି। ଏଥି ଯୋଗୁ ପାରଳାଖେମୁଣ୍ଡି ସହରକୁ ଆସୁଥିବା ଭାରୀଯାନ ତଥା ଟ୍ରକ ଗୁଡିକ ସହର ବାହାରେ ରହୁଛି। ଏମାନଙ୍କ ଲାଗି କୌଣସି ପାର୍କିଂ ବ୍ୟବସ୍ଥା ହୋଇ ନଥିବାରୁ ରାସ୍ତାର ଉଭୟ ପାର୍ଶ୍ୱରେ ଟ୍ରକ ଗୁଡିକୁ ପାର୍କିଂ କରୁଛନ୍ତି। ଏହି ପାର୍କିଂ ଯୋଗୁ ଉଭୟ ପଟର ରସ୍ତା ଠିକ ଭାବେ ଦେଖା ଦେଉ ନଥିବା ବେଳେ ଏହି ପାର୍କିଂ ବୁଲାଣିଆ ରାସ୍ତାର ଠିକ ପୂର୍ବରୁ କରାଯାଉଛି। ଫଳରେ ଉଭୟ ପଟରୁ ଯାଆସ କରୁଥିବା ଗାଡି ଗୁଡିକ ବହୁ ସମସ୍ୟାର ସମ୍ମୁଖୀନ ହେଉଛନ୍ତି । ଉକ୍ତ ରାସ୍ତା ଓଡିଶାର ବିଭିନ୍ନ ଗ୍ରାମ ତଥା ସହର ଯଥା ଗାରବନ୍ଧ, ଲାବଣ୍ୟଗଡ, ବ୍ରହ୍ମପୁର, ଭୁବନେଶ୍ୱର ଆଦି ସମେତ ଆନ୍ଧ୍ରର ଚାପରା, ପଲାସା ଆଦିକୁ ସଂଯୋଗ କରୁଥିବାରୁ ଖୁବ ବ୍ୟସ୍ଥ ବହୁଳ ରାସ୍ତା ଅଟେ। ଦୈନନ୍ଦିନ ଶହଶହ ମୋଟର ଯାନ ଯାତାୟାତ କରୁଛି । ବୁଲାଣୀଆ ଓ ରାସ୍ତାର ଉଭୟ ପାର୍ଶ୍ୱରେ ଟ୍ରକ ଗୁଡିକ ପାର୍କିଂ କରିଦେଉଥିବାରୁ କେତେ ବେଳେ କୌଣସି ଅଘଟଣ ଘଟିବ ତାହା ସହଜେ ଅନୁମେୟ। ତେଣୁ ରାସ୍ତାର ଉଭୟ ପାର୍ଶ୍ୱରେ ରହୁଥିବା ଟ୍ରକ ବା ଭାରିଯାନ ଗୁଡିକୁ ଏହି ଅଞ୍ଚଳରେ ନ ରଖିବା ପାଇଁ କଟକଣା ଜାରି କରିବା ଆବଶ୍ୟକ ବୋଲି ଅଞ୍ଚଳବାସୀଙ୍କ ପକ୍ଷରୁ ଦାବି ହୋଇଛି ।