ରାଉରକେଲା ଅଫିସ,୧୫।୧୨: ହକି ବିଶ୍ୱକପ୍ ପେରେ ବିସ୍ଥାପିତଙ୍କ ସମସ୍ୟା ସମାଧାନ କରାଯିବ ବୋଲି ବୁଧବାର ରାଉରକେଲା ଏଡିଏମ୍ ଡ. ଶୁଭଙ୍କର ମହାପାତ୍ର ପ୍ରତିଶ୍ରୁତି ଦେଇଛନ୍ତି। ଅନ୍ୟପକ୍ଷେ ବିର୍ସାମୁଣ୍ଡା ହକି ଷ୍ଟାଡିୟମ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରୁଥିବା ବେଳେ ବିସ୍ଥାପିତଙ୍କୁ ପୋଲିସ ରିଜର୍ଭ ପଡିଆରେ ଅଟକ ରଖିଥିଲା। ବୁଧବାର ବିଳମ୍ବିତ ରାତିରେ ସେମାନଙ୍କୁ ଛାଡି ଦେଇଛି।
ଏହାପୂର୍ବରୁ ବିସ୍ଥାପିତମାନେ ଆର୍ଏସ୍ପିରରେ ନିଯୁକ୍ତି ପାଇଁ ୮ ଦିନ ଧରି ଏଡିଏମ୍ଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ସହ ଗତ ୧୨ ତାରିଖରେ ଆରଏମ୍ସି ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ। ସେତେବେଳେ ଆରଏମ୍ସି କମିଶନର ତଥା ଏଡିଏମ୍ ଡ. ମହାପାତ୍ର ଉକ୍ତ ସମସ୍ୟାର ସମାଧାନ ଦିନକ ଭିତରେ କରିବେ ବୋଲି କହିଥିଲେ। ଫଳରେ ବିସ୍ଥାପିତମାନେ ଆରଏମ୍ସି ସମ୍ମୁଖରେ ବିକ୍ଷୋଭ ପ୍ରଦର୍ଶନ ନ କରି ଏଡିଏମଙ୍କ କାର୍ଯ୍ୟାଳୟ ସମ୍ମୁଖ ଧାରଣାସ୍ଥଳକୁ ଫେରିଥିଲେ। ଏଥିସହ ପ୍ରଶାସନ ଯେ ପର୍ଯ୍ୟନ୍ତ ଦାବି ପୂରଣ ନ କରିଛି ସେ ପର୍ଯ୍ୟନ୍ତ ଧାରଣା ଦିଆଯିବ ବୋଲି ବିସ୍ଥାପିତମାନେ ଜିଦ୍ ଧରିଥିଲେ। ବୁଧବାର ସନ୍ଧ୍ୟାରେ ସେମାନେ ଛେଣ୍ଡ କଳିଙ୍ଗ ବିହାର ସ୍ଥିତ ବିର୍ସାମୁଣ୍ଡା ହକି ଷ୍ଟାଡିୟମ ସମ୍ମୁଖକୁ ଯାଇ ବିକ୍ଷୋଭ ପ୍ରଦର୍ଶନ କରିଥିଲେ। ଫଳରେ ନିର୍ମାଣାଧୀନ ବିର୍ସାମୁଣ୍ଡା ହକି ଷ୍ଟାଡିୟମ କାର୍ଯ୍ୟରେ ବାଧା ସୃଷ୍ଟି ହୋଇଥିଲା। ବିସ୍ଥାପିତମାନେ ଷ୍ଟାଡିୟମ ଭିତରେ ପଶିବାକୁ ଉଦ୍ୟମ କରୁଥିବାବେଳେ ପୋଲିସ ସେମାନଙ୍କୁ ଗିରଫ କରି ରିଜର୍ଭ ପଡିଆରେ ଅଟକ ରଖିଥିଲା। ଶେଷରେ ହକି ବିଶ୍ୱକପ୍ ପରେ ବିସ୍ଥାପିତମାନଙ୍କ ସମସ୍ୟାର ସମାଧାନ କରିବେ ବୋଲି ରାଉରକେଲା ଏଡିଏମ୍ ମହାପାତ୍ର ପ୍ରତିଶ୍ରୁତି ଦେଇଥିଲେ।