କାମାକ୍ଷାନଗର, ୨୧।୭(ସୁଧୀର ପରିଡ଼ା): ଢେଙ୍କାନାଳ ଜିଲାର ଅନ୍ୟତମ ପ୍ରମୁଖ ସହର କାମାକ୍ଷାନଗର ଏନ୍ଏସିରେ ବୁଲାଗୋରୁଙ୍କୁ ନେଇ ସମସ୍ୟା ବଢ଼ିବାରେ ଲାଗିଛି। ସହରାଞ୍ଚଳର ଅଧିକାଂଶ ବ୍ୟସ୍ତବହୁଳ ସଡ଼କରେ ଗାଈ, ବଳଦ, ଷଣ୍ଢ ନିର୍ବିଘ୍ନରେ ବିଚରଣ କରୁଛନ୍ତି। ବ୍ୟବସାୟିକ ପ୍ରତିଷ୍ଠାନ, ବିଦ୍ୟାଳୟ ସମ୍ମୁଖ ସମେତ ଗୁରୁତ୍ୱପୂର୍ଣ୍ଣ ସ୍ଥାନଗୁଡ଼ିକରେ ଦଳବଦ୍ଧ ଭାବେ ରହୁଛନ୍ତି। ଏହାକୁ ନେଇ ସହରରେ ଅସ୍ବାଭାବିକ ସ୍ଥିତି ସୃଷ୍ଟି ହୋଇଛି। ସମସ୍ୟା ସମ୍ପର୍କରେ ଏନ୍ଏସି କର୍ତ୍ତୃପକ୍ଷ ଅବଗତ ଥିବା ସତ୍ତ୍ୱେ ଏହାର ସମାଧାନ ଦିଗରେ ପଦକ୍ଷେପ ନେଉନାହାନ୍ତି। ତେଣୁ ଦୁର୍ଘଟଣାର ବଢ଼ୁଛି ବୋଲି ବୁଦ୍ଧିଜୀବୀ ମତବ୍ୟକ୍ତ କରିଛନ୍ତି।
କାମାକ୍ଷାନଗର ଏନ୍ଏସିର ହନୁମାନ ଛକ, ବସ୍ଷ୍ଟାଣ୍ଡ, ହସ୍ପିଟାଲ ସମେତ ଉପଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବୁଲାଗୋରୁ ସମସ୍ୟା ଜଟିଳ ରୂପ ଧାରଣ କରିଛି। ବିଭିନ୍ନ ସରକାରୀ, ବେସରକାରୀ କାର୍ଯ୍ୟାଳୟ ପରିସରରେ ସେମାନେ ଅବାଧ ପ୍ରବେଶ କରୁଛନ୍ତି। ରାସ୍ତାରେ ଦୀର୍ଘ ସମୟ ଧରି ଛିଡ଼ାହୋଇ ରହିବା କାରଣରୁ ଟ୍ରାଫିକ୍ ଜାମ୍ ହେଉଛି। ଆମ୍ବୁଲାନ୍ସ, ଅଗ୍ନିଶମ ଗାଡ଼ି ମଧ୍ୟ ଅଟକି ରହୁଛି। ଡାକ୍ତରଖାନାରେ ରୋଗୀ, ସମ୍ପର୍କୀୟ, ବସ୍ଷ୍ଟାଣ୍ଡରେ ଯାତ୍ରୀ ଏବଂ ବ୍ୟବସାୟିକ ପ୍ରତିଷ୍ଠାନରେ ଗ୍ରାହକମାନେ ସେମାନଙ୍କ ଦୌରାତ୍ମ୍ୟରୁ ବାଦ୍ ପଡୁନାହାନ୍ତି। ସ୍କୁଲ ଯିବା ସମୟରେ ଛାତ୍ରୀଛାତ୍ରମାନେ ମାରଣା ଷଣ୍ଢ ଆକ୍ରମଣରେ ଖଣ୍ଡିଆଖାବରା ହେଉଥିବା ନଜିର ରହିଛି। ସେହିପରି ରାତିରେ ବ୍ୟବସାୟିକ ପ୍ରତିଷ୍ଠାନ ବାରଣ୍ଡା, ସଡ଼କରେ ଶୋଇ ରହୁଥିବା ଗାଈ, ଷଣ୍ଢ ମଳମୂତ୍ର ତ୍ୟାଗ କରି ସମସ୍ୟା ବଢ଼ାଉଛନ୍ତି। ବାରମ୍ବାର ଦାବି ସତ୍ତ୍ୱେ ଗୋରୁଙ୍କୁ ଜବତ ଦିଗରେ କୌଣସି ପଦକ୍ଷେପ ନିଆଯାଉ ନ ଥିବାରୁ ଏହାକୁ ନେଇ ଅସନ୍ତୋଷ ବଢ଼ିବାରେ ଲାଗିଛି।
ଏ ସମ୍ପର୍କରେ ଏନ୍ଏସି ନିର୍ବାହୀ ଅଧିକାରୀ ଯତିନ୍ଦ୍ର ନାଥ ମିଶ୍ର କୁହନ୍ତି, ଖାଲି କାମାକ୍ଷାନଗର ନୁହେଁ, ଅନେକ ସହରରେ ଏଭଳି ଅବ୍ୟବସ୍ଥା ଦେଖିବାକୁ ମିଳୁଛି। ଗୋରୁଙ୍କୁ ଜବତ କରିବା, କାଞ୍ଜିଆହୁଦାରେ ସେମାନଙ୍କ ଲାଗି ଆନୁଷଙ୍ଗିକ ବ୍ୟବସ୍ଥା କରିବା କଷ୍ଟକର ବ୍ୟାପାର। ଏଥିପାଇଁ ବଡ଼ ଜାଗା ମଧ୍ୟ ଦରକାର। ଆଗାମୀ ପରିଷଦ ବୈଠକରେ ଏଥିଲାଗି ପ୍ରସ୍ତାବ ଦିଆଯିବ। ସମସ୍ୟାର ସମାଧାନ ପାଇଁ ଆଲୋଚନା କରି ପଦକ୍ଷେପ ନିଆଯିବ।