ଭବାନୀପାଟଣା,୨୭।୧୨(ସ୍ବ.ପ୍ର.): ଭବାନୀପାଟଣା ପୁରୁଣା ସିନେମା ହଲ ଛକଠାରେ ସମଗ୍ର ଶିକ୍ଷା କଳାହାଣ୍ଡି ପକ୍ଷରୁ ନିର୍ମିତ ଜନଜାତି ସାଧନ କେନ୍ଦ୍ର ସୋମବାର ୟୁନିଭରସିଟି ଅଫ ଆୟର୍ଲାଣ୍ଡର ପ୍ରଫେସର ଲେଡିଆ ଗୁଜି ପରିଦର୍ଶନ କରିଛନ୍ତି। ନୃତତ୍ତ୍ୱ ବିଭାଗରେ କାର୍ଯ୍ୟରତ ପ୍ରଫେସର ଗୁଜି ଜନଜାତି ସାଧନ କେନ୍ଦ୍ରରେ ଥିବା ବିଭିନ୍ନ ଅଳଙ୍କାର, ଖାଦ୍ୟଶସ୍ୟ, କୃଷି ଉପକରଣ, ହସ୍ତଶିଳ୍ପ ସାମଗ୍ରୀ, ଅସ୍ତ୍ରଶସ୍ତ୍ର, ବାଦ୍ୟଯନ୍ତ୍ର ଆଦି ବୁଲି ଦେଖିବା ସହ ସେ ସମ୍ପର୍କରେ ପଚାରିବୁଝିଥିଲେ। ଏଥିସହ କଳାହାଣ୍ଡିର ଆଦିବାସୀ ସଂସ୍କୃତି ଓ ପରମ୍ପରା ଉପରେ କେନ୍ଦ୍ରର ଗାଇଡ ଡିଲେଶ୍ୱର ରଣାଙ୍କ ସହ ଆଲୋଚନା କରିଥିଲେ। ଏହି ଅବସରରେ ପ୍ରଫେସର ଗୁଜିଙ୍କ ସହଯୋଗୀ ନିକୋଲାସ ପାପତ୍ରିଓ, କଳାହାଣ୍ଡି ବିଶ୍ବବିଦ୍ୟାଳୟ ନୃତତ୍ତ ବିଭାଗ ମୁଖ୍ୟ, ସହକାରୀ ପ୍ରଫେସର ଓ ଅଧ୍ୟାପକମାନଙ୍କ ସମେତ ଯୁବ ଗାଳ୍ପିକ ତଥା ସରିଆଁ ସିଆରସିସି ସୁଧୀର କୁମାର ଧଙ୍ଗଡ଼ାମାଝି, ଉଛଲା ସିଆରସିସି ଅଜିତ କୁମାର ପଧାନ ପ୍ରମୁଖ ଉପସ୍ଥିତ ରହିଥିଲେ। ଜିଲା ଶିକ୍ଷା ବିଭାଗ ଦ୍ୱାରା କରାଯାଇଥିବା ଏହି ଉଦ୍ୟମ ପାଇଁ ଜିଲା ଶିକ୍ଷାଧିକାରୀ ସୁଶାନ୍ତ କୁମାର ଚୋପଦାର ଓ ଜନଜାତି ସଂଯୋଜିକା ଶ୍ରଦ୍ଧାଞ୍ଜଳି ଦାଶଙ୍କୁ ପ୍ରଫେସର ଗୁଜି ସାଧୁବାଦ ଜଣାଇଥିଲେ।