ଭୁବନେଶ୍ୱର,୯।୯ (ବ୍ୟୁରୋ): ଗବେଷକ, ସମାଲୋଚକ ତଥା ସାହିତି୍ୟକ ପ୍ରଫେସର ଉଦୟନାଥ ସାହୁ ଇଣ୍ଡିଆ ବୁକ୍ ଅଫ୍ ରେକର୍ଡସ୍ରେ ସ୍ଥାନ ପାଇଛନ୍ତି। ଓଡ଼ିଆ, ବଙ୍ଗଳା ଓ ଅସମୀୟା ଭାଷାରେ ଲିଖିତ ମହାଭାରତ ଓ ଶ୍ରୀମଦ୍ ଭାଗବତର ତୁଳାତ୍ମକ ଅଧ୍ୟୟନ ନିମିତ୍ତ ସେ ଏହି ଗୌରବ ଲାଭ କରିଛନ୍ତି। ଚଳିତ ମାସ ୭ ତାରିଖରେ ପ୍ରଫେସର ସାହୁଙ୍କୁ ଇଣ୍ଡିଆ ବୁକ୍ ଅଫ୍ ରେକର୍ଡସ୍ ପକ୍ଷରୁ ଫଳକ ଓ ପ୍ରଶଂସାପତ୍ର ମିଳିଛି। ଏହି ସ୍ବିକୃତି ହାସଲ କରିବାରେ ସେ ହେଉଛନ୍ତି ପ୍ରଥମ ଓଡ଼ିଆ ସାହିତି୍ୟକ। ପ୍ରଫେସର ସାହୁ ହେଉଛନ୍ତି ନୟାଗଡ଼ ଜିଲା ରଣପୁର ବ୍ଲକ୍ ସାନକିଲୋ ଗ୍ରାମର ପୂର୍ଣ୍ଣଚନ୍ଦ୍ର ସାହୁ ଓ ତାରା ଦେଈଙ୍କର ଜ୍ୟେଷ୍ଠପୁତ୍ର। ସେ ଏବେ ନୂଆଦିଲ୍ଲୀର ଜବାହାରଲାଲ୍ ନେହେରୁ ବିଶ୍ୱବିଦ୍ୟାଳୟର ଭାରତୀୟ ଭାଷା କେନ୍ଦ୍ରରେ ଆଦିକବି ସାରଳା ଦାସ ଚେୟାରର ପ୍ରଥମ ପ୍ରଫେସର ଭାବେ ଦାୟିତ୍ୱ ତୁଲାଉଛନ୍ତି। କେବଳ ପ୍ରାଚୀନ କିମ୍ବା ମଧ୍ୟଯୁଗୀୟ ଓଡ଼ିଆ ସାହିତ୍ୟ ନୁହେଁ, ବରଂ ଆଧୁନିକ ସାହିତ୍ୟ, ଫକୀରମୋହନ ସାହିତ୍ୟ ସମ୍ପର୍କରେ ରଚିତ ତାଙ୍କର ଗବେଷଣା ପୁସ୍ତକ ଓଡ଼ିଆ ସାହିତ୍ୟକୁ ସମୃଦ୍ଧ କରିଛି। ତାଙ୍କ ଦ୍ୱାରା ରଚିତ ଗ୍ରନ୍ଥଗୁଡିକ ମଧ୍ୟରେ ପୂର୍ବ-ଭାରତୀୟ ମହାଭାରତ ପରମ୍ପରା, ସାରଳା ମହାଭାରତ ସୃଷ୍ଟିର ଭୂମିପର୍ବ, ପୂର୍ବ-ଭାରତୀୟ ଭାଗବତ ପରମ୍ପରା ଓ ଭକ୍ତି ଆନ୍ଦୋଳନ, ସାରଳା ମହାଭାରତର ମନ୍ତ୍ରୀ ଓ ସେନାପତି, ଭାଗବତର ଭାବଭୂମି, ଭାଗବତର ସୃଷ୍ଟି ସୌରଭ ଆଦି ରହିଛି।
