ନୂଆଦିଲ୍ଲୀ,୧୯।୧୧: କୋଭିଡ୍ ସଂକ୍ରମଣ ପରଠାରୁ କ୍ରମାଗତ ଭାବେ ଡଲାର ତୁଳନାରେ ଭାରତୀୟ ମୁଦ୍ରାର ମୂଲ୍ୟ ହ୍ରାସ ପାଇଚାଲିଛି। ଫଳରେ ଭାରତୀୟ ଟଙ୍କାର ମୂଲ୍ୟ ହ୍ରାସ ଯୋଗୁ ଉଭୟ ପରୋକ୍ଷ ଓ ପ୍ରତ୍ୟକ୍ଷ ପ୍ରଭାବ ଭାରତ ବଜାର ଉପରେ ପଡ଼ିଛି। ଏପରିକି ଟଙ୍କାର ମୂଲ୍ୟ ହ୍ରାସ ଯୋଗୁ ସମସ୍ତ ଅତ୍ୟାବଶ୍ୟକ ସାମଗ୍ରୀର ଦର ଉଚ୍ଚା ରହିଛି। ବିଶେଷକରି ଭାରତରେ ଦରଦାମ ବୃଦ୍ଧି ସହ ମୁଦ୍ରାସ୍ଫୀତି ମଧ୍ୟ ଅଣାୟତ୍ତ ହୋଇପଡ଼ିଛି। ହେଲେ ଭାରତୀୟ ମୁଦ୍ରା ମୂଲ୍ୟ ହ୍ରାସର ପ୍ରଭାବ ଭାରତୀୟ କମ୍ପାନୀଗୁଡିକ ପାଇଁ ବରଦାନ ପାଲଟିଛି ବୋଲି ଗ୍ଲୋବାଲ ରେଟିଂସ୍ ଏଜେନ୍ସି ‘ଷ୍ଟାଣ୍ଡାର୍ଡ ଆଣ୍ଡ ପୁଅର୍ସ’ (ଏସ୍ ଆଣ୍ଡ ପି) ପକ୍ଷରୁ ମତପ୍ରକାଶ ପାଇଛି। ଏପରିକି ଉକ୍ତ ସଂସ୍ଥାର ସର୍ଭେ (ଆକଳନ) ଅନୁଯାୟୀ ଭାରତୀୟ ଟଙ୍କାର ମୂଲ୍ୟ ହ୍ରାସ ଯୋଗୁ ବିଦେଶରେ ସେବା ଯୋଗାଉଥିବା ବିଭିନ୍ନ ବର୍ଗର ଭାରତୀୟ କମ୍ପାନୀ ବେଶ୍ ଲାଭବାନ୍ ହୋଇଛନ୍ତି। ବିଶେଷକରି ରେଟିଂ ସଂସ୍ଥାର ସର୍ଭେ ଅନୁସାରେ ଅଧାରୁ ଅଧିକ ଭାରତୀୟ କମ୍ପାନୀଙ୍କ ମୂଳ ଲାଭ ଗତ କିଛି ମାସ (୧୫ରୁ ୧୮ ମାସ) ମଧ୍ୟରେ ୧୫ରୁ ୧୮% ବଢ଼ିଯାଇଥିବା ଜଣାପଡ଼ିଛି। ସେହିଭଳି ଆମେରିକୀୟ ରେଟିଂ ଏଜେନ୍ସିର ଏକ ରିପୋର୍ଟ ଅନୁସାରେ ଯେଉଁ କମ୍ପାନୀଗୁଡ଼ିକର ରେଟିଂ ଆମେ କରୁଛୁ, ସେମାନଙ୍କ ମଧ୍ୟରୁ ଅଧିକାଂଶ ଭାରତୀୟ କମ୍ପାନୀର ରାଜସ୍ବର ଏକ ବଡ ଅଂଶ ଆମେରିକୀୟ ଡଲାର ସହ ଜଡ଼ିତ ରହିଛି। ଫଳରେ ଭାରତୀୟ ମୁଦ୍ରା (ଟଙ୍କା)ର ମୂଲ୍ୟ କ୍ରମାଗତ ଭାବେ ହ୍ରାସ ପାଉଛି। ଏହାର ଫାଇଦା ଆମେରିକୀୟ ଡଲାରରେ କାରବାର କରୁଥିବା ଭାରତୀୟ କମ୍ପାନୀଗୁଡ଼ିକ ପାଉଛନ୍ତି। ବିଶେଷକରି ଭାରତୀୟ ଟଙ୍କା ମୂଲ୍ୟ ହ୍ରାସର ପ୍ରଭାବ ସେହି ସମସ୍ତ କମ୍ପାନୀଙ୍କ ଉପରେ ପଡିନାହିଁ। ସେହିପରି ସୂଚନା ଓ ପ୍ରଯୁକ୍ତି କ୍ଷେତ୍ର, ଧାତୁ ଓ ରସାୟନ କ୍ଷେତ୍ରର କମ୍ପାନୀ ପୂର୍ବ ଆୟ (ଇବିଆଇଟିଡିଏ) ଭାରତୀୟ ଟଙ୍କାର ମୂଲ୍ୟ ହ୍ରାସ ଯୋଗୁ କ୍ରମାଗତ ଭାବେ ବୃଦ୍ଧି ପାଇଚାଲିଛି। ଡଲାର ଆଧାରିତ ରପ୍ତାନିକାରୀ ସୂଚନା ଓ ପ୍ରଯୁକ୍ତି କମ୍ପାନୀ ଯଥା ୱିପ୍ରୋ, ଇନ୍ଫୋସିସ୍ ଓ ଏଚ୍ସିଏଲ୍ ଭଳି ପ୍ରମୁଖ ଆଇଟି କମ୍ପାନୀ ବେଶ୍ ଲାଭାନ୍ବିତ ହୋଇଛନ୍ତି, ଯେଉଁମାନଙ୍କର ନିବେଶ ଟଙ୍କାରେ ଆସେ ଓ ସେମାନେ ବିଶେଷ ଲାଭବା୍ନ ହୋଇଛନ୍ତି। ଉଲ୍ଲେଖଯୋଗ୍ୟ, ଯେତେବେଳେ ଭାରତୀୟ ଟଙ୍କା ଆମେରିକୀୟ ଡଲାର ତୁଳନାରେ ୧ଟଙ୍କା ହ୍ରାସ ଘଟେ ସେତେବେଳେ ଉପରୋକ୍ତ କମ୍ପାନୀଗୁଡିକର ଇବିଆଇଟିଡିଏ ପାଖାପାଖି ୫କୋଟି ଡଲାର ବୃଦ୍ଧି ଘଟିଥାଏ। ସୂଚନାଯୋଗ୍ୟ, ଶନିବାର ଡଲାର ତୁଳନାରେ ଭାରତୀୟ ମୁଦ୍ରା ମୂଲ୍ୟ ପ୍ରାୟ ୮୧.୬୦ ଟଙ୍କା ରହିଛି। ଗତ ମାସକ ମଧ୍ୟରେ ପ୍ରାୟ ୨ ଟଙ୍କା ଭାରତୀୟ ମୁଦ୍ରା ମୂଲ୍ୟ ବୃଦ୍ଧି ପାଇଥିଲେ ସୁଦ୍ଧା ଡଲାର ତୁଳନାରେ ଭାରତୀୟ ମୁଦ୍ରାର ମୂଲ୍ୟ ବର୍ତ୍ତମାନ ମଧ୍ୟ ରେକର୍ଡ ସ୍ତରରେ ରହିଛି।