କଟକ ଅଫିସ,୩।୫: ରାଜ୍ୟ ପୋଲିସ ବିଭାଗ ବିଭିନ୍ନ ସମୟରେ ନିଜସ୍ବ କାର୍ଯ୍ୟଶୈଳୀକୁ ନେଇ ସମାଲୋଚନା ଘେରକୁ ଆସିଛି। କେତେବେଳେ ପୋଲିସ କର୍ମଚାରୀ ନିଜ କ୍ଷମତାର ଦୂରୁପଯୋଗ କରି ତ ଆଉ କେବେ ଅପରାଧ ସହ ଯୋଡ଼ି ହେବା ଯୋଗୁ ଖାକିରେ ଦାଗ ଲାଗିଛି। ଏଭଳିି ଏକ ଘଟଣା ଦୃଷ୍ଟିକୁ ଆସିଛି। ରାଜ୍ୟ ପୋଲିସ ବିଭାଗର ଜଣେ ଇନ୍ସପେକ୍ଟର ଛୁଟିରେ ଥାଇ ମଧ୍ୟ ପଦୋନ୍ନତି ପାଇଛନ୍ତିି। ୧୯୯୩ ବ୍ୟାଚ୍ର ଜଣେ ଇନ୍ସପେକ୍ଟର ବ୍ରହ୍ମପୁରରେ କାର୍ଯ୍ୟରତ ଥିବା ବେଳେ ୨୦୧୭ ଜୁଲାଇରୁ ଶାରୀରିକ ଅସୁସ୍ଥତା ଦେଖାଇ ଛୁଟିରେ ଥିଲେ। ୨୦୧୭ ଡିସେମ୍ବରରେ ତାଙ୍କୁ ଡିଏସ୍ପି ଇନ୍ଚାର୍ଜ ପଦକୁ ପଦୋନ୍ନତି ସହ କନ୍ଧମାଳକୁ ବଦଳି କରାଯାଇଥିଲା। ମାତ୍ର ସେ ସେଠାକୁ ନ ଯାଇ ଛୁଟିରେ ରହିଥିଲେ। ଦୀର୍ଘ ୩ବର୍ଷ କାଳ ଅସୁସ୍ଥତାଜନିତ ଛୁଟିରେ ଥିବାବେଳେ ପୁଣି ଅଫିସ ଅର୍ଡର ନଂ. ୬୨୯ ତାରିଖ ୧୩ା୨ା୨୧ରେ ତାଙ୍କୁ ଡିଏସ୍ପି ଇନ୍ଚାର୍ଜ ପଦରୁ ଡିଏସ୍ପି ପଦକୁ ପଦୋନ୍ନତି ଦିଆଯାଇ ଏସ୍ପି ପିସିଆର୍ ସେଲ୍ କନ୍ଧମାଳକୁ ବଦଳି କରାଯାଇଥିଲା। ତେବେ ତତ୍କାଳୀନ ବ୍ରହ୍ମପୁର ଏସ୍ପି ଆଶିଷ ସିଂଙ୍କ ଅନୁମୋଦନ ବିନା କିପରି ତାଙ୍କର ପଦୋନ୍ନତି ହେଲା ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଏପରି ସ୍ଥଳେ ଗୃହ ସଚିବଙ୍କ ଅଧ୍ୟକ୍ଷତାରେ ବସିଥିବା ବିଭାଗୀୟ ପଦୋନ୍ନତି କମିଟି(ଡିପିସି) କିପରି ତାଙ୍କ ପଦୋନ୍ନତିକୁ ଅନୁମୋଦନ କଲା ତାହା ପ୍ରଶ୍ନବାଚୀ ସୃଷ୍ଟି ହୋଇଛି। ତେବେ ପୋଲିସ ଡିଜି ଏପରି ଘଟଣା ଜାଣିବା ପରେ ବିଭାଗୀୟସ୍ତରରେ ଖୋଳତାଡ଼ କରି ଏକ ରିପୋର୍ଟ ଗୃହ ବିଭାଗକୁ ପଠାଇଛନ୍ତି ବୋଲି ବିଶ୍ୱସ୍ତ ସୂତ୍ରରୁ ଜଣାପଡ଼ିଛି। ଏବେ ଡିଜିପିଙ୍କ ରିପୋର୍ଟ ଉପରେ ଗୃହ ବିଭାଗ କି କାର୍ଯ୍ୟାନୁଷ୍ଠାନ ଗ୍ରହଣ କରୁଛି ତାହା ଦେଖିବାକୁ ବାକି ରହିଲା। ସୂଚନାଯୋଗ୍ୟ, ଅତୀତରେ ଯେଉଁ ପୋଲିସ ଅଫିସରଙ୍କ ବିରୋଧରେ ଭିଜିଲାନ୍ସ ବିଭାଗ ଚଢ଼ାଉ କରି କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା ସେମାନେ ଏବେ ଭିଜିଲାନ୍ସ ବିଭାଗରେ କାର୍ଯ୍ୟରତ। ଏପରିକି ଭିଜିଲାନ୍ସ ଜାଲରେ ପଡ଼ି ମାମଲାରେ ଛନ୍ଦି ହୋଇଥିବା ପୋଲିସ ଅଫିସରଙ୍କୁ ପଦୋନ୍ନତି ମିଳିବା ସହ ଡିଜିପି ଡିସ୍କ ମିଳିଥିବାର ନଜିର ମଧ୍ୟ ରହିଛି।