ଭୁବନେଶ୍ୱର,୧୧।୭(ସତ୍ୟଜିତ୍ ରାଉତ):ଭୁବନେଶ୍ୱର ମଞ୍ଚେଶ୍ୱର ଶିଳ୍ପାଞ୍ଚଳସ୍ଥିତ ସରକାରୀ ଔଷଧ ଭର୍ତ୍ତି ଗୋଦାମ ଜଳିଯିବା ଘଟଣାକୁ ନେଇ ଏବେ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି। ଅବହେଳାରୁ ବହୁ କୋଟିର ସରକାରୀ ସମ୍ପତ୍ତି ନଷ୍ଟ ହୋଇଥିବା ଆଲୋଚନା ଚାଲିଛି। ବହୁ ପୁରୁଣା ଭଙ୍ଗା ଦଦରା କୋଠାରେ ସ୍ବାସ୍ଥ୍ୟ ଓ ଚିକିତ୍ସା ସାମଗ୍ରୀକୁ ଦୟନୀୟ ଅବସ୍ଥାରେ ରଖାଯାଇଥିଲା। ପର୍ଯ୍ୟାପ୍ତ ପରିମାଣରେ ଅଗ୍ନି ନିରାପତ୍ତା ବ୍ୟବସ୍ଥା ନ ଥିବାବେଳେ ଇନ୍ସ୍ୟୁରାନ୍ସ ଥିବା ଦର୍ଶାଇ ଏହି ଘଟଣାକୁ ସ୍ବାସ୍ଥ୍ୟ ବିଭାଗ ବେଶ୍ ଖାମଖିଆଲ ଭାବେ ନେଇଥିବା ଜଣାପଡୁଛି। ଏତେ ବଡ଼ ଅଗ୍ନିକାଣ୍ଡରେ ହୋଇଥିବା ବଡ଼ ସରକାରୀ କ୍ଷତିକୁ ତର୍ଜମା କରି କାର୍ଯ୍ୟାନୁଷ୍ଠାନ ନେବାର ଆବଶ୍ୟକତା ରହିଥିବାବେଳେ ଘଟଣାର ୨୪ ଘଣ୍ଟା ପରେ ବି ସରକାରୀ ସ୍ତରରେ ସେପରି କିଛି ପଦକ୍ଷେପ ନାହିଁ।
ରବିବାର ରାତି ପ୍ରାୟ ୧୧ଟାରୁ ଲାଗିଥିବା ନିଆଁକୁ ଅଗ୍ନିଶମ ବାହିନୀ ୭ ଘଣ୍ଟାରୁ ଊର୍ଦ୍ଧ୍ୱ ସମୟର ଚେଷ୍ଟା ପରେ ସୋମବାର ସକାଳେ ଲିଭାଇବାରେ ସକ୍ଷମ ହୋଇଛି। ମାତ୍ର ଏହି ଅଗ୍ନିକାଣ୍ଡରେ କେତେ ସମ୍ପତ୍ତି ପୋଡ଼ିଯାଇଛି ତାହାର ହିସାବ ସରକାରଙ୍କ ପକ୍ଷରୁ ମିଳି ନ ଥିଲେ ମଧ୍ୟ ଗୋଦାମ ଘର ସହ ବହୁ କୋଟି ଟଙ୍କାର ସମ୍ପତ୍ତି ନଷ୍ଟ ହୋଇଥିବାବେଳେ ଏଥିରେ କୋଟିଏରୁ ଊର୍ଦ୍ଧ୍ୱ ଟଙ୍କାର ଔଷଧ ଓ ମେଡିକାଲ ସାମଗ୍ରୀ ରହିଥିବା କୁହାଯାଉଛି। ତେବେ ଏ ସମ୍ପର୍କରେ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଟୁଇଟ୍ ଯୋଗେ କୁହାଯାଇଛି ଯେ, ଅଗ୍ନିକାଣ୍ଡ ଘଟିଥିବା ଗୋଦାମରେ ପିପିଇ କିଟ୍ସ, ସାନିଟାଇଜର୍ସ ଓ ଖାଲି ସିଲିଣ୍ଡର ଗଚ୍ଛିତ ଥିଲା। ଉକ୍ତ ଗୋଦାମ ନଂ.୩ ଓଡ଼ିଶା ରାଜ୍ୟ ସମବାୟ ବାଣିଜ୍ୟ ମହାସଂଘ ଲିଃ(ମାର୍କେଫେଡ୍)ର ହୋଇଥିବାବେଳେ ଓଡ଼ିଶା ରାଜ୍ୟ ଔଷଧ ନିଗମ ପକ୍ଷରୁ ସେଠାରେ ଏସବୁ ସାମଗ୍ରୀ ଗଚ୍ଛିତ ରଖାଯାଇଥିଲା। ତେବେ ଅଗ୍ନିକାଣ୍ଡରେ ନଷ୍ଟ ହୋଇଥିବା ସମସ୍ତ ସାମଗ୍ରୀ ବୀମାଭୁକ୍ତ ଥିବା ନେଇ ବିଭାଗ ପକ୍ଷରୁ ଉଲ୍ଲେଖ କରାଯାଇଛି। କିନ୍ତୁ ପାଉଁଶଗଦା ଭିତରେ ମାସ୍କ, ସାଲାଇନ୍, ମଶାରି ସମେତ ଆହୁରି ଅନେକ ପ୍ରକାରର କୋଭିଡ୍ ସାମଗ୍ରୀ ଅଧାପୋଡ଼ା ଦେଖିବାକୁ ମିଳୁଛି। ଅନ୍ୟପକ୍ଷରେ ଉକ୍ତ ଗୋଦାମରେ ପର୍ଯ୍ୟାପ୍ତ ପରିମାଣରେ ଅଗ୍ନି ନିରାପତ୍ତା ଓ ଅନ୍ୟାନ୍ୟ ସୁରକ୍ଷା ବ୍ୟବସ୍ଥା ନ ଥିବା ନେଇ ଅଗ୍ନିଶମ ବିଭାଗର ଜଣେ ଅଧିକାରୀ ସୂଚନା ଦେଇଛନ୍ତି। ତେବେ ଏକ ସରକାରୀ ଗୋଦାମରେ ଏଭଳି ଅବ୍ୟବସ୍ଥାକୁ ନେଇ ନାନା ପ୍ରଶ୍ନବାଚୀ ସୃଷ୍ଟି ହୋଇଛି। ଔଷଧ ନିଗମ ପକ୍ଷରୁ ସ୍ବାସ୍ଥ୍ୟ ସାମଗ୍ରୀକୁ ଏଭଳି ଖାମଖିଆଲ ଭାବେ କାହିଁକି ରଖାଯାଇଥିଲା? ରାଜଧାନୀରେ ଭଲ ସରକାରୀ ଗୋଦାମ ନା ଥିଲା କି? କରୋନା ସମୟରେ କୋଭିଡ୍ ସାମଗ୍ରୀ କିଣାରେ ବ୍ୟାପକ ଦୁର୍ନୀତି ନେଇ ଅଭିଯୋଗ ହୋଇଥିଲା। ଏବେ କୋଭିଡ୍ ସାମଗ୍ରୀ ଜଳିଯିବା ନେଇ ସନ୍ଦେହ ପ୍ରକାଶ ପାଇଛି। ଜାଣିଶୁଣି ଏପରି କାଣ୍ଡ ଘଟାଯାଇଥିବା ସନ୍ଦେହ କରାଯାଉଛି। ପୁଣି ଏହି ଅଗ୍ନିକାଣ୍ଡ କେଉଁ କାରଣ ପାଇଁ ଘଟିଥିଲା ତାହା ଏପର୍ଯ୍ୟନ୍ତ ସ୍ପଷ୍ଟ କରାଯାଉନି। ଅଗ୍ନିକାଣ୍ଡର କାରଣ ଜାଣିବାକୁ ଅଧିକ ଅନୁସନ୍ଧାନ କରାଯାଉଥିବା ଡେପୁଟି ଫାୟାର ଅଫିସର ଅବନୀ ଚରଣ ସ୍ବାଇଁ କହିଛନ୍ତି। ନିଆଁ ଲାଗିବା ପୂର୍ବରୁ ସୁରକ୍ଷାକର୍ମୀମାନେ ଯେଉଁ ଶବ୍ଦ ଶୁଣିଥିଲେ ତାହା କେଉଁଠୁ ଆସିଲା? ତେବେ ଉକ୍ତ ଗୋଦାମରେ ନିଆଁ ଆୟତ୍ତ ହୋଇଥିବା କୁହାଯାଉଥିବାବେଳେ ଅପରାହ୍ନ ପର୍ଯ୍ୟନ୍ତ କିଛି କିଛି ସ୍ଥାନରେ ନିଆଁ କୁହୁଳୁଥିବା ଦେଖିବାକୁ ମିଳିଥିଲା।
ସୂଚନାଯୋଗ୍ୟ, ରବିବାର ରାତି ପ୍ରାୟ ୧୧ଟାରେ ୫ଜଣ ସୁରକ୍ଷାକର୍ମୀ ଗୋଦାମ ବାହାରେ କାର୍ଯ୍ୟରତ ଥିବାବେଳେ ଭୟଙ୍କର ଶବ୍ଦ ଶୁଣିବାକୁ ପାଇଥିଲେ। ତା’ପରେ ହଠାତ୍ ଗୋଦାମ ହୁତୁହୁତୁ ହୋଇ ଜଳିବା ଦେଖି ସେମାନେ ଉପରିସ୍ତ ଅଧିକାରୀ ଓ ଅଗ୍ନିଶମ ବିଭାଗକୁ ଖବର ଦେଇଥିଲେ। ଅଗ୍ନିଶମ ଟିମ୍ ୨ଟି ଇକ୍ୱିପ୍ମେଣ୍ଟ ଗାଡ଼ି ଓ ୭ଟି ପାଣି ଗାଡ଼ି ଆଣି ନିଆଁ ଲିଭା କାର୍ଯ୍ୟକୁ ତ୍ୱରାନ୍ବିତ କରିଥିଲା। ଏପରିକି ନିଆଁ ନ ଲିଭିବାରୁ କାନ୍ଥ ଭାଙ୍ଗି ପାଣି ପକାଇବାକୁ ଜେସିବି ଓ ହାଇଡ୍ରାର ସହାୟତା ନିଆଯାଇଥିଲା। ଏନେଇ ରାଜ୍ୟ ଔଷଧ ନିଗମ ସହ ଯୋଗାଯୋଗ କରାଯାଇଥିଲେ ମଧ୍ୟ ପ୍ରତିକ୍ରିୟା ମିଳିପାରିନାହିଁ।