ଜୟପୁର, ୧୩।୧୧ (ନି.ପ୍ର.)-ଗଞ୍ଜେଇ ଚୋରାଚାଲାଣରେ ଗିରଫ ଅଭିଯୁକ୍ତଙ୍କ ସମ୍ପତ୍ତି ବାଜ୍ୟାପ୍ତି ନେଇ ନିର୍ଦ୍ଦେଶ ଆସିଥିବା ଏସ୍ଡିପିଓ ଅରୂପ ଅଭିଷେକ ବେହେରା ଶନିବାର କହିଛନ୍ତି ା ଏନେଇ ସେ କହିଛନ୍ତି, ଜୟପୁର ସଦର ଥାନା ପୋଲିସ ୨୦୨୧ ଜୁନ୍ ୧୧ରେ ଏକ ଗଞ୍ଜେଇ ବୋଝେଇ ଟ୍ରକ୍ ଉପରେ ଚଢ଼ାଉ କରିଥିଲା। ଏହି ସମୟରେ ପଞ୍ଜାବ ଲୁଧିଆନାର ଲକ୍ଷ୍ମୀନ୍ଦର ସିଂ ଓ ଜଶ୍ପାଲଙ୍କୁ ଗିରଫ କରିଥିଲା। ଏମାନଙ୍କଠାରୁ ୧୨୭୭ କେଜି ଗଞ୍ଜେଇ ଜବତ ହୋଇଥିଲା। ଏନେଇ ପୋଲିସ ୧୦୪/୨୧ର ଏକ ମାମଲା ରୁଜୁ କରିଥିଲା। ଏହି ସମୟରେ ଫେରାର ହୋଇଯାଇଥିବା ଅଭିଯୁକ୍ତ ଜୟପୁର ହାଇଦ୍ରାବାଦ ଲାଇନର ଆକବର ଏଲିୟସ ମୁରାଦ ଖାନଙ୍କୁ ପୋଲିସ ପରେ ଗିରଫ କରିଥିଲା। ସେ ଏହି କାରବାର କରି ୧ କୋଟି ୩୦ ଲକ୍ଷ ଟଙ୍କା ଜମା କରିଥିଲେ। ଖାନ୍ଙ୍କ ଆୟର କିଛି ମାଧ୍ୟମ ନ ଥିବା ବେଳେ ସେ ଏତେ ସମ୍ପତ୍ତି କିପରି କଲେ ତା’ର ଖୋଳତାଡ଼ ସଦର ଥାନା ଅଧିକାରୀ ଈଶ୍ୱର ତାଣ୍ଡି ଓ ବେହେରା କରିଥିଲେ। ୨୦୨୦ରୁ ସେ ଗଞ୍ଜେଇ କାରବାରରେ ଲିପ୍ତ ରହି ଏତେ ପରିମାଣରେ ଟଙ୍କା ଠୁଳ କରିଥିଲେ। କୋଲକାତାର ଏନ୍ଡିପିଏସ୍ କମ୍ପିଟେଣ୍ଟ ଅଥରଟି ମୁରାଦଖାନଙ୍କ ସମ୍ପତ୍ତି ବାଜ୍ୟାପ୍ତି ନେଇ ନିର୍ଦ୍ଦେଶ ଦେଇଥିବା ଏସ୍ଡିପିଓ ବେହେରା ପ୍ରକାଶ କରିଛନ୍ତି। ମୁରାଦଖାନଙ୍କ ଜମିବାଡ଼ି, ବୁଲେଟ ଗାଡ଼ି , ସ୍କୁଟି ଓ ଜୟପୁର ହାଇଦ୍ରାବାଦ ଲାଇନରେ ୩ ମହାଲ ବିଶିଷ୍ଟ କୋଠା ରହିଛି।
