ଜେନେଭା, ୭।୬ : ମହାପୁରୁଷ ମହମ୍ମଦଙ୍କ ବିବାଦ ଏବେ ଜାତିସଂଘରେ ପହଞ୍ଚିଛି। ବହୁ ମୁସଲମାନ ଦେଶରୁ ମହମ୍ମଦଙ୍କ ଉପରେ ଭାଜପା ନେତାଙ୍କ ବିବାଦୀୟ ମନ୍ତବ୍ୟକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପରେ ଏନେଇ ଜାତିସଂଘର ସେକ୍ରେଟେରୀ ଜେନେରାଲ ଆଣ୍ଟୋନିଓ ଗୁଟେରସଙ୍କ ମୁଖପାତ୍ରଙ୍କ ବିବୃତ୍ତି ପ୍ରକାଶ ପାଇଛି। ସେ କହିଛନ୍ତି ଯେ ଅନ୍ତର୍ଜାତୀୟ ସଂଗଠନ ସମସ୍ତ ଧର୍ମ ପ୍ରତି ସମ୍ମାନ ଏବଂ ସହନଶୀଳତାକୁ ଦୃଢ଼ ଭାବରେ ସମର୍ଥନ କରିଥାଏ।
ଜଣେ ପାକିସ୍ତାନୀ ଗଣମାଧ୍ୟମ ପ୍ରତିନିଧି ମହମ୍ମଦଙ୍କ ବିରୋଧରେ ପୂର୍ବତନ ଭାଜପା ରାଷ୍ଟ୍ରୀୟ ମୁଖପାତ୍ର ନୁପୁର ଶର୍ମା ଏବଂ ଦଳର ଦିଲ୍ଲୀ ୟୁନିଟର ମିଡିଆ ମୁଖ୍ୟ ନବୀନ କୁମାର ଜିନ୍ଦଲଙ୍କ ମନ୍ତବ୍ୟ ପ୍ରସଙ୍ଗ ଉଠାଇଥିଲେ। ଏନେଇ ସେ ଜାତିସଂଘର ସେକ୍ରେଟେରୀ ଜେନେରାଲଙ୍କ ପ୍ରତିକ୍ରିୟା ସମ୍ପର୍କରେ ଜବାବ ଲୋଡିଥିଲେ।
ସେ କହିଥିଲେ ଯେ ଅନେକ ମୁସଲମାନ ଦେଶ ଏହାକୁ ନିନ୍ଦା କରିଛନ୍ତି। ଏହାର ଉତ୍ତରରେ ସେକ୍ରେଟେରୀ ଜେନେରାଲଙ୍କ ମୁଖପାତ୍ର ଷ୍ଟିଫନ ଦୁଜାରିକ କହିଛନ୍ତି ଯେ, ମୁଁ ଏହି ସମ୍ବନ୍ଧୀୟ ଖବର ଦେଖିଛି। ମୁଁ ମନ୍ତବ୍ୟଗୁଡିକ ମଧ୍ୟ ଦେଖିଛି। ମୁଁ ଆପଣଙ୍କୁ କହିପାରେ ଯେ ଆମେ ସମସ୍ତ ଧର୍ମ ପ୍ରତି ସମ୍ମାନ ଏବଂ ସହନଶୀଳତାକୁ ଦୃଢ଼ ଭାବେ ସମର୍ଥନ କରୁଛୁ। ଏହା ଜଣା ଯେ ମହମ୍ମଦଙ୍କ ବିରୋଧରେ ବିବାଦୀୟ ମନ୍ତବ୍ୟକୁ ଅନେକ ମୁସଲମାନ ଦେଶ ବିରୋଧ କରିଛନ୍ତି। ଏହାକୁ ନେଇ ଭାଜପା ପକ୍ଷରୁ ରବିବାର ଶର୍ମା ଏବଂ ଜିନ୍ଦଲଙ୍କୁ ବହିଷ୍କାର କରାଯାଇଛି।
ସୂଚନାଯୋଗ୍ୟ, ଇରାନ ସମେତ କେତେକ ଦେଶ ଏନେଇ ଭାରତୀୟ ରାଷ୍ଟ୍ରଦୂତଙ୍କୁ ଡକାଇ ଉତ୍ତର ଲୋଡିଥିଲେ। ଏହାପୂର୍ବରୁ କାତାର, ଇରାନ ଏବଂ କୁଏତ ରବିବାର ଭାରତୀୟ ରାଷ୍ଟ୍ରଦୂତମାନଙ୍କୁ ଡକାଇ ଭାଜପା ନେତାଙ୍କ ମହାପୁରୁଷ ମହମ୍ମଦଙ୍କ ଉପରେ ଦିଆଯାଇଥିବା ବିବାଦୀୟ ମନ୍ତବ୍ୟ ଉପରେ ଜବାବ ତଲବ କରିଥିଲେ। ରାଷ୍ଟ୍ରଦୂତମାନେ ଏହା ସ୍ପଷ୍ଟ କରଥିଲେ ଯେ ଏହି ଟୁଇଟ ଗୁଡ଼ିକ କୌଣସି ପ୍ରକାରେ ଭାରତ ସରକାରଙ୍କ ମତକୁ ପ୍ରତିଫଳିତ କରୁନାହିଁ।
ସେହିପରି ସୋମବାର ଇଣ୍ଡୋନେସିଆ, ସୌଦି ଆରବ, ସଂଯୁକ୍ତ ଆରବ ଏମିରେଟ୍ସ (ୟୁଏଇ), ବାହାରିନ ଏବଂ ଆଫଗାନିସ୍ତାନ ମଧ୍ୟ ମୁସଲିମ ଦେଶମାନଙ୍କ ସହିତ ଯୋଗ ଦେଇ ମହାପୁରୁଷ ମହମ୍ମଦଙ୍କ ବିରୋଧରେ ଦିଆଯାଇଥିବା ବିବାଦୀୟ ମନ୍ତବ୍ୟକୁ ନିନ୍ଦା କରି ସମସ୍ତ ଧାର୍ମିକ ବିଶ୍ୱାସକୁ ସମ୍ମାନ ଦେବା ଉପରେ ଗୁରୁତ୍ୱାରୋପ କରିଥିଲେ।