କେସିଙ୍ଗା,୨୦ା୧୦(ତୁମେଶ୍ୱର ସାହୁ): କଳାହାଣ୍ଡି ଜିଲା ରେଳଯାତ୍ରୀ ସଂଘର ପ୍ରଥମ ବୈଠକ ସଭାପତି ସୁଭାଷ ଜୈନଙ୍କ ଅଧ୍ୟକ୍ଷତାରେ ୟଙ୍ଗ୍ ବ୍ଲଡ୍ ପବ୍ଲିକ ସ୍କୁଲର ସଭାଗୃହରେ ଅନୁଷ୍ଠିତ ହୋଇଯାଇଛି। କେସିଙ୍ଗାରୁ ଭୁବନେଶ୍ୱରକୁ ସିଧାସଳଖ ଏକ ଟ୍ରେନ ଚଳାଚଳ କରିବା ସହ ଟିଟିଲାଗଡ଼ରୁ କେସିଙ୍ଗା, ଜୁନାଗଡ଼ ପର୍ଯ୍ୟନ୍ତ ଦ୍ରୁତଗାମୀ ଇସ୍ପାତ ଟ୍ରେନ୍କୁ ସମ୍ପ୍ରସାରଣ ପାଇଁ ପ୍ରସ୍ତାବ କରାଯାଇଛି। ପ୍ଲାଟ୍ଫର୍ମ ଏକରେ ଏକ ଟିକେଟ୍ କାଉଣ୍ଟର ଖୋଲିବା ଉକ୍ତ ବୈଠକରେ ଆଲୋଚନା କରାଯାଇଥିଲା। ପାନୀୟଜଳ, ଦୁଇ, ତିନି ଓ ଚାରି ନମ୍ବର ପ୍ଲାଟଫର୍ମରେ ଶୌଚାଳୟ ସ୍ଥାପିତ କରିବା ପାଇଁ ବିଭାଗୀୟ ଅଧିକାରୀଙ୍କୁ ଦୃଷ୍ଟି ଆକର୍ଷଣ କରିବା ପାଇଁ ନିଷ୍ପତ୍ତି ନିଆଯାଇଛି।
କେସିଙ୍ଗା ରେଳ ଷ୍ଟେଶନରେ ରହିଥିବା ବିଭିନ୍ନ ସମସ୍ୟା ଉପରେ ସମ୍ବଲପୁର ଡିଭିଜନାଲ ମ୍ୟାନେଜର ଓ ରେଳ ବିଭାଗର ଉଚ୍ଚ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିବା ପାଇଁ ନିଷ୍ପତ୍ତି ନିଆଯାଇଥିଲା। ଜୁନାଗଡ଼ରୁ ଭୁବନେଶ୍ୱର ଯାଉଥିବା ସୁପରଫାଷ୍ଟ୍ ଟ୍ରେନ୍କୁ କେସିଙ୍ଗା, ଟିଟିଲାଗଡ଼ ଦେଇ ଭୁବନେଶ୍ୱର ଯିବା ପାଇଁ ଡିଆର୍ଏମଙ୍କୁ ଦାବି ପତ୍ର ଦେବା ପାଇଁ ନିଷ୍ପତ୍ତି ନିଆଯାଇଛି।
ଏହି ବୈଠକରେ ମୁଖ୍ୟ ଉପଦେଷ୍ଟା ଡ. ହେମସାଗର ସାହା, ହିମାଂଶୁ ଦାଶ,ରାମ କୁମାର ଜୈନ,ବି.ଚନ୍ଦ୍ର ଶେଖର ଆଚାରୀଙ୍କ ସମେତ ଉପସଭାପତି ପ୍ରଶାନ୍ତ ବାନାର୍ଜୀ, ସାଧାରଣ ସମ୍ପାଦକ ଡମ୍ବରୁଧର ଭୋଇ, କୋଷାଧ୍ୟକ୍ଷ ଆନନ୍ଦ ଅଗ୍ରଓ୍ବାଲ ସମସ୍ତ ସଦସ୍ୟ ବୃନ୍ଦ ଉପସ୍ଥିତ ହୋଇଥିଲେ।
