ଯାଜପୁରରୋଡ୍,୮ା୧(ପବିତ୍ର ରଞ୍ଜନ ମହାନ୍ତି): ଆଗକୁ ବିଧାନସଭା ନିର୍ବାଚନ। ଏହାକୁ ନେଇ ପ୍ରମୁଖ ରାଜନୈତିକ ଦଳର ଆଶାୟୀମାନଙ୍କ ମଧ୍ୟରେ ନୂତନ ବର୍ଷର ଅଭିନନ୍ଦନ ଜଣାଇବା ପାଇଁ ପୋଷ୍ଟର ଯୁଦ୍ଧ ଦେଖିବାକୁ ମିଳୁଛି। କୋରେଇ ବିଧାନସଭା ନିର୍ବାଚନମଣ୍ଡଳୀର ସହରଠୁ ଗାଁ ଯାଏ ବିଭିନ୍ନ ଛକରେ ବଡ଼ବଡ଼ ହୋର୍ଡିଂମାନ ଛାଇ ହୋଇଯାଇଛି। ବିଶେଷକରି ଶାସକ ବିଜେଡିର ବିଧାୟକ ଟିକେଟ ପାଇବା ପାଇଁ ହୋର୍ଡିଂ ମାଧ୍ୟମରେ ଶୀତଳ ଯୁଦ୍ଧ ଆରମ୍ଭ ହୋଇଥିବା ଦେଖିବାକୁ ମିଳିଛି। ଏଥିରୁ ଭାଜପା ମଧ୍ୟ ବାଦ୍ ପଡ଼ିନାହିଁ। ଅନ୍ୟପଟେ ଏହି ଦୌଡ଼ରେ କଂଗ୍ରେସ ଦଳ ବହୁ ପଛରେ ପଡ଼ିଛି।
ସ୍ଥାନରେ ଏହି ହୋର୍ଡିଂମରାକୁ ନେଇ ଦଳୀୟ ସମର୍ଥକମାନଙ୍କ ମଧ୍ୟରେ ହାତାହାତି ହେବାର ଦେଖାଯାଉଛି। ବିଜେଡି ବିଧାୟକ ଅଶୋକ କୁମାର ବଳ ଓ ପୂର୍ବତନ ବିଧାୟକ ଆକାଶ ଦାସନାୟକଙ୍କ ସମର୍ଥକମାନେ ହୋର୍ଡିଂ ମାରିବା କୋରେଇବାସୀଙ୍କୁ ଦ୍ବନ୍ଦ୍ୱରେ ପକାଇଛି। ସେହିପରି ଭାଜପା ପକ୍ଷରୁ ବିଶ୍ୱଜିତ୍ ନାୟକ ଓ ଯୁବନେତା ଆଲେକଜାଣ୍ଡର ଦାସଙ୍କ ପୃଥକ୍ ଭାବେ କର୍ମୀ ସମ୍ମିଳନୀ ଓ ହୋର୍ଡିଂମରାକୁ ନେଇ ଦଳର ଅନ୍ତଃକନ୍ଦଳ ଦାଣ୍ଡରେ ପଡ଼ି ହାଟରେ ଗଡୁଛି। ତେବେ କୋରେଇ ତଥା ରାଜ୍ୟ କଂଗ୍ରେସର ନେତ୍ରୀ ବନ୍ଦିତା ପରିଡ଼ାଙ୍କ ହୋର୍ଡିଂ କାଁଭାଁ ଦେଖିବାକୁ ମିଳୁଛି। କାରଣ ତାଙ୍କର ବିଜେଡି ଓ ଭାଜପାର ପ୍ରମୁଖ ନେତାଙ୍କ ସହ ଯୋଗସୂତ୍ର ରଖିଥିବା ଚର୍ଚ୍ଚା ଜୋର ଧରିଛି। ଶୁଣିବାକୁ ମିଳୁଛି ବିଜେଡି କୁଆଡ଼େ ଏହି ଆସନରେ ମହିଳା କାର୍ଡ ଖେଳିପାରେ।
ଆଲୋଚନା ହେଉଛି ଯେଉଁ ଦଳ ଯୋଗ୍ୟତମ ପ୍ରାର୍ଥୀ ଚୟନ କରିବ କୋରେଇବାସୀ ସେହି ଦଳ ଉପରେ ଆସ୍ଥାପ୍ରକଟ କରିବେ।