ପାରାଦୀପ,୨ା୬(ସ୍ବ.ପ୍ର.): ଆଉ ମାତ୍ର ୩ ଦିନ ପରେ ବିଶ୍ୱ ପରିବେଶ ଦିବସ ପାଳନ ହେବାକୁ ଯାଉଛି। ଏହି ଦିନ ଜଙ୍ଗଲ ଓ ପରିବେଶ ବିଭାଗ ପକ୍ଷରୁ ବିଭିନ୍ନ ପରିବେଶୀୟ ସୁରକ୍ଷା କାର୍ଯ୍ୟକ୍ରମ ହେବ। ଏହାପରେ ପୁଣି ଜୁଲାଇରେ ବନ ସଂରକ୍ଷଣ ମାସ ପାଳନ କରାଯିବ। କିନ୍ତୁ ଜଗତ୍ସିଂହପୁର ଜିଲା ପାରାଦୀପ ସମୁଦ୍ର ଉପକୂଳରେ ଏହାର କୌଣସି ପ୍ରକାର ପ୍ରଭାବ ପଡୁନାହିଁ ବୋଲି ଅଭିଯୋଗ ହେଉଛି। କାରଣ ଷଣ୍ଢକୁଦ ମୌଜା ସଂରକ୍ଷିତ ଜଙ୍ଗଲକୁ ଏବେ ଦିବାଲୋକରେ ଝାଉଁ ଜଙ୍ଗଲରୁ ସ୍ଥାନୀୟ ଲୋକେ ଅବାଧରେ ଗଛ କାଟି ନେଉଛନ୍ତି। ଯେଉଁଭଳି ଭାବେ ଗଛ କଟା ଚାଲିଛି ଅଳ୍ପ ଦିନ ମଧ୍ୟରେ ଝାଉଁ ଜଙ୍ଗଲ ଧ୍ୱଂସ ପାଇଯିବ ବୋଲି ପରିବେଶବିତ୍ମାନେ କହିଛନ୍ତି। ୫୦୦ ବର୍ଗମିଟର ସଂରକ୍ଷିତ ଜଙ୍ଗଲ ସୁରକ୍ଷା ପାଇଁ ସେଠାରେ ଫରେଷ୍ଟ ବିଟ୍ ହାଉସ ରହିଛି। ୨ ଜଣ ଜଗୁଆଳି ମଧ୍ୟ ଅଛନ୍ତି। କିନ୍ତୁ ତାହା କୌଣସି କାମରେ ଲାଗୁ ନ ଥିବା ଅଭିଯୋଗ କରିଛନ୍ତି ସ୍ବେଚ୍ଛାସେବୀ ସଙ୍ଗଠନ ଆହ୍ବାନ କମ୍ବାଇନ୍ସ ସଭାପତି ସାଗର ବିଶ୍ୱାଳ। ଏଥିପାଇଁ ତାଙ୍କ ସଙ୍ଗଠନ ୪ ବର୍ଷ ହେଲା ଲଗାତାର ଲିଖିତ ଅଭିଯୋଗ କରିସାରିଲେଣି। ଉକ୍ତ ଅଭିଯୋଗ ଆଧାରରେ ୨ଥର ଅଧିକାରୀମାନେ ଆସି ତଦନ୍ତ ମଧ୍ୟ କରିଛନ୍ତି, କିନ୍ତୁ ଫଳ ଶୂନ୍ୟ ବୋଲି ବିଶ୍ୱାଳ କୁହନ୍ତି।
ସୂଚନାଯୋଗ୍ୟ, ପାରାଦୀପ ସମୁଦ୍ର ବେଳାଭୂମିରେ ରାଜନଗର ବନଖଣ୍ଡ ପକ୍ଷରୁ ପ୍ରତିବର୍ଷ ଝାଉଁଚାରା ରୋପଣ କରାଯାଉଛି। ଗଛ ବଡ଼ ହେବା ପରେ ତାକୁ କାଟି ନେଉଛନ୍ତି ଷଣ୍ଢକୁଦ ବାସିନ୍ଦା। କେତେଜଣ ଘର କରିବାକୁ ନେଉଥିବା ବେଳେ ଅନ୍ୟମାନେ ଝାଉଁ ଗଛଗୁଡ଼ିକୁ କାଠ ଗୋଲାରେ ବିକ୍ରି କରୁଛନ୍ତି। ଯେଉଁ ଜାଗାରେ ଗଛଗୁଡ଼ିକ ଖାଲି ହୋଇଯାଉଛି ସେଠାରେ ବନ ବିଭାଗ ପୁଣି ଚାରା ରୋପଣ କରୁଛନ୍ତି। ଏପରିକି ପର୍ଯ୍ୟାପ୍ତ ପରିମାଣର ଗଛ କେତେଜଣ ଲୋକ କାଟି ନେଇଛନ୍ତି। ତ୍ରିଲୋଚନପୁର ଗ୍ରାମ ସୀମା ତୈଳ ବିଶୋଧନାଗାର ସାଉଥ ଗେଟ୍ ପାଖରେ ଏବେ ବହୁଳ ଭାବେ ଝାଉଁ ଗଛ ନିର୍ଦ୍ଦିଷ୍ଟ କେତେଜଣ ଲୋକ କାଟୁଛନ୍ତି। ସେମାନଙ୍କ ଯୁକ୍ତି ହେଲା ସେ ଜାଗା ତାଙ୍କର। ଭୁଲବଶତଃ ବନ ବିଭାଗ ସେଠାରେ ଝାଉଁଗଛ ଲଗେଇ ଦେଇଥିଲା। ସେଥିପାଇଁ ଆମେ ଗଛ କାଟି ଘରବାଡ଼ି କରିବୁ। ଏ ସମ୍ପର୍କରେ କୁଜଙ୍ଗ ବନାଞ୍ଚଳ ଅଧିକାରୀ ରଞ୍ଜନ ମିଶ୍ରଙ୍କୁ ପଚାରିବାରେ, ସେମିତି କାହା ଜାଗା ଉପରେ ଗଛ ଲାଗିନାହିଁ। ଯେଉଁମାନେ ଏପରି ଗଛ କାଟୁଛନ୍ତି, ସେମାନଙ୍କ ଉପରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଷଣ୍ଢକୁଦ ପାଖ ବେଳାଭୂମିରୁ ଗଛ କାଟିବା ସମ୍ପର୍କରେ କୁହନ୍ତି, ଆମର ମାନବ ସମ୍ବଳ କମ୍ଥିବାରୁ ଉପଯୁକ୍ତ ତଦାରଖ ନାହିଁ। ଆସନ୍ତା ୫ ରୁ ୬ ମାସ ମଧ୍ୟରେ ନୂଆ ଘର ହେବ ଏବଂ ଅଧିକ ଷ୍ଟାଫ୍ ରହିବେ।