ପରଜଙ୍ଗ, ,୧୨।୨(ଡି.ଏନ୍.ଏ.) ଧସିଯାଇଛି ପୋଲକୁ ଲାଗିଥିବା ଆପ୍ରୋଚ୍ ରୋଡ୍। ସାମାନ୍ୟ ଅସାବଧାନ ହେଲେ ବ୍ରିଜ୍ ତଳକୁ ଖସିପଡ଼ିବ ଯାନବାହନ। ଚାଲିଯିବ ମୂଲ୍ୟବାନ ଜୀବନ। ହେଲେ ମୁଖ୍ୟରାସ୍ତା ଉପରେ ଥିବା ଏଭଳି ବିପଦ ପ୍ରତି ସତେଯେମିତି ଆଖି ବୁଜି ଦେଇଛନ୍ତି ଜାତୀୟ ରାଜପଥ ପ୍ରାଧିକରଣ କର୍ତ୍ତୃପକ୍ଷ (ଏନ୍ଏଚ୍ଏଆଇ)। ଜୀବନ-ମୃତ୍ୟୁ ମଧ୍ୟରେ ମାତ୍ର କେଇଫୁଟର ବ୍ୟବଧାନ ଥିବାବେଳେ ବାଲିବସ୍ତାରେ ଦୁଇଖଣ୍ଡ ବାଉଁଶ ପୋତି ଏବଂ ବ୍ୟାରିକେଟିଂ ଟ୍ୟାପ୍ ବାନ୍ଧି ଦାୟିତ୍ୱ ସାରିଦେଇଛନ୍ତି ବିଭାଗୀୟ ଅଧିକାରୀ। ଢେଙ୍କାନାଳ ଜିଲା ପରଜଙ୍ଗ ବ୍ଲକ ହାତୀଲୁଚାଣି ଛକ ନିକଟରେ ଥିବା ବିପଦସଙ୍କୁଳ ଘୋଡାଡିଆଁ ବ୍ରିଜ୍ରେ ଜୀବନକୁ ବାଜି ଲଗାଇ ଦୈନିକ ଶହ ଶହ ଭାରିଯାନ ଚଳାଚଳ କରୁଥିବାବେଳେ ଏଭଳି ପ୍ରଶାସନିକ ଅଣଦେଖାକୁ ନେଇ ଜନଅସନ୍ତୋଷ ବଢ଼ିବାରେ ଲାଗିଛି।
ପରଜଙ୍ଗ ବ୍ଲକ ଦେଇ ଯାଇଥିବା ବ୍ୟସ୍ତବହୁଳ ୫୩ନଂ. ଜାତୀୟ ରାଜପଥକୁ ୪ ଲେନ୍ କରାଯାଉଛି। ତାଳଚେର-ପରଜଙ୍ଗ ରାସ୍ତାର ହାତୀଲୁଚାଣି ଛକ ନିକଟ ଘୋଡାଡିଆଁ ନାଳ ଉପରେ ଥିବା ପୁରୁଣା ବ୍ରିଜ୍ ଗମନାଗମନର ପ୍ରମୁଖ ମାଧ୍ୟମ ହୋଇଥିବାବେଳେ ଏହି ରାସ୍ତା ଦେଇ ଦୈନିକ ଶତାଧିକ ଭାରିଯାନ ଚଳାଚଳ କରୁଛି। ଫଳରେ ବ୍ରିଜ୍ ନିକଟ ଆପ୍ରୋଚ୍ ରୋଡ୍ର ଗୋଟିଏ ପାର୍ଶ୍ୱ ଅତଡ଼ା ଧସିଯାଇଛି। ଏନ୍ଏଚ୍ଏଆଇ ପକ୍ଷରୁ ଏହାର ବିକଳ୍ପ ବ୍ରିଜ୍ ନିର୍ମାଣ ଚାଲିଥିବାବେଳେ କାର୍ଯ୍ୟରେ ଅହେତୁକ ବିଳମ୍ବ ହେଉଛି। ଫଳରେ ଅନ୍ୟ ପନ୍ଥା ନ ଥିବାରୁ ଯାତ୍ରୀମାନେ ବିପଦସଙ୍କୁଳ ବ୍ରିଜ୍ରେ ଜୀବନକୁ ବିପଦରେ ପକାଇ ଯାତ୍ରା କରିବାକୁ ବାଧ୍ୟ ହେଉଛନ୍ତି।
ହାତୀଲୁଚାଣି ଛକରୁ ବାରିହାପୁର ଦୁର୍ଗା ମନ୍ଦିରକୁ ବାଇପାସ୍ ରାସ୍ତା ନିର୍ମାଣ କରାଯାଇଛି। ତେବେ ହାତୀଲୁଚାଣି ଛକରୁ ପରଜଙ୍ଗ ବଜାର ଦେଇ ବାରିହାପୁର ଦୁର୍ଗା ମନ୍ଦିରକୁ ଯୋଡୁଥିବା ମୁଖ୍ୟରାସ୍ତାକୁ ଜନସାଧାରଣ ବହୁଳ ବ୍ୟବହାର କରୁଛନ୍ତି। କାରଣ ଏହି ରାସ୍ତା ପାର୍ଶ୍ୱରେ ପ୍ରମୁଖ ସରକାରୀ, ବେସରକାରୀ କାର୍ଯ୍ୟାଳୟ, ଶିକ୍ଷାନୁଷ୍ଠାନ ଆଦି ରହିଛି। ହେଲେ ମରାମତି ଅଭାବରୁ ଏହି ରାସ୍ତା ଖାଲଖମାରେ ଭର୍ତ୍ତି ହୋଇଛି। ଏଥିଲାଗି ଦୈନିକ ଦୁର୍ଘଟଣା ଘଟୁଛି। ଶୋଚନୀୟ ହୋଇପଡ଼ିଥିବା ମୁଖ୍ୟରାସ୍ତା ସମେତ ଧସିଯାଇଥିବା ଆପ୍ରୋଚ୍ ରୋଡ୍କୁ ତୁରନ୍ତ ମରାମତି ନ କଲେ ଆନ୍ଦୋଳନ କରାଯିବ ବୋଲି ଅଞ୍ଚଳବାସୀ ଚେତାବନୀ ଦେଇଛନ୍ତି।