ମାଲକାନଗିରି,୧୬ା୯(ଦୁର୍ଯ୍ୟୋଧନ ପାତ୍ର): ଆସନ୍ତା ୨୧ରୁ ମାଓବାଦୀ ସଙ୍ଗଠନ ନିଜର ପ୍ରତିଷ୍ଠା ଦିବସ ପାଳନ କରିବ। ଏନେଇ ଆନ୍ଧ୍ର ଓଡିଶା ସୀମା ସ୍ବତନ୍ତ୍ର ଜୋନାଲ କମିଟି ସମ୍ପାଦକ ଗଣେଶ ଏକ ପତ୍ର ମାଧ୍ୟମରେ ଜଣାଇଛନ୍ତି। ସେ ମାଓବାଦୀ ସଙ୍ଗଠନର ୧୯ତମ ପ୍ରତିଷ୍ଠା ଦିବସ ପାଳନ ଅବସରରେ ଫାସିବାଦ ସରକାରଙ୍କୁ ବିରୋଧ କରିବାକୁ ଏଥିରେ ଆହ୍ବାନ ଦେଇଛନ୍ତି। ମାଝୀଗୁଡା ଗ୍ରାନାଇଟି ଖଣିକୁ ବିରୋଧ କରାଯିବା ନେଇ ଏଥିରେ ଉଲ୍ଲେଖ ରହିଛି। ଗତ ୧୯ ବର୍ଷ ମଧ୍ୟରେ ପ୍ରାୟ ୯୦ ଜଣ ବିପ୍ଲବ ସାଥୀ ପୋଲିସ ଆକ୍ରମଣରେ ଶହୀଦ ହୋଇଥିବା ବେଳେ ଏହି ଶହୀଦଙ୍କୁ ଶ୍ରଦ୍ଧାଞ୍ଜଳି ଜଣାଇବାକୁ ପତ୍ରରେ ଉଲ୍ଲେଖ ରହିଛି। ବର୍ଷ ବର୍ଷ ଧରି ଜେଲରେ ବନ୍ଦୀ ରହିଥିବା ବିପ୍ଲବୀ ନେତା ଯେଉଁମାନେ ଖଣିି, ପାଣି, ଜଙ୍ଗଲ ଜମି ପାଇଁ ଆନ୍ଦୋଳନ କରିଥିଲେ ସେମାନଙ୍କୁ ବନ୍ଦୀ କରି ରଖାଯାଇଛି। ରାଜ୍ୟ ଓ କେନ୍ଦ୍ର ସରକାର ମାଓବାଦୀ ଦମନ ନାମରେ ଶହ ଶହ କୋଟି ଟଙ୍କା ଖର୍ଚ୍ଚ କରୁଛନ୍ତି। ଯଦି ଏହି ଟଙ୍କା ଗରିବଙ୍କ ବିକାଶ ପାଇଁ ଖର୍ଚ୍ଚ କରିଥାନ୍ତେ ଆଦିବାସୀମାନେ ଉପକୃତ ହୋଇ ପାରିଥାନ୍ତେ ବୋଲି ଏଥିରେ କୁହାଯାଇଛି। ତେବେ ମାଓବାଦୀ ସଙ୍ଗଠନ ଓଡିଶା ଓ ଆନ୍ଧ୍ରରେ ପୂର୍ବଭଳି ସକ୍ରିୟ ନାହିଁ। କିଛିଟା ଦୁର୍ବଳ ହୋଇଥିବା ଗଣେଶ ପତ୍ରରେ ସ୍ବୀକାର କରିଛନ୍ତି। ସଙ୍ଗଠନକୁ ପୁର୍ନଗଠନ କରିବାକୁ ଆନ୍ଧ୍ର ଓଡିଶା ସୀମା କମିଟି ପକ୍ଷରୁ ପୁର୍ନବାର ପ୍ରକ୍ରିୟା ଆରମ୍ଭ ହୋଇଛି। ସରକାରଙ୍କ ବିରୋଧରେ ପୁଣି ଲଢେଇ ଆରମ୍ଭ ହେବ ବୋଲି ସେ ଆହ୍ବାନ ଦେଇ ଓଡିଶା ଓ ଆନ୍ଦ୍ରରେ ଖଣି ଖାଦାନ ନାମରେ ସରକାର କମ୍ପାନୀ ହାତକୁ ଏହି ଅଞ୍ଚଳର ପ୍ରାକୃତିକ ସମ୍ପଦକୁ ଟେକି ଦେଉଛନ୍ତି। ଫଳରେ ଲକ୍ଷ ଲକ୍ଷ ଆଦିବାସୀ ବେସାହାରା ହେଉଛନ୍ତି। ବିଶେଷ କରି ଓଡିଶା କୋରାପୁଟ ଜିଲାର ଦେଓମାଳି ଏବଂ ନାଗେଶ୍ୱରୀ ପର୍ବତ ସମେତ ମାଲକାନଗିରି ଜିଲାର ବଣ୍ଡାଘାଟି ଅଞ୍ଚଳର ମାଝିଗୁଡା ଗ୍ରାମ ନିକଟରେ ଥିବା ଗ୍ରାନାଇଟ ଖଣିକୁ ତୀବ୍ର ବିରୋଧ କରାଯାଇଛି। ସୂଚନାଯୋଗ୍ୟ, କିଛିଦିନ ତଳେ ମାଝିଗୁଡାଠାରେ ଥିବା ଗ୍ରାନାଇଟ ଖଣି ପାଇଁ ପ୍ରଶାସନ ପକ୍ଷରୁ ଏକତରଫା ଜନ ଶୁଣାଣି କରାଯାଇଥିଲା। ବିରୋଧୀଙ୍କୁ ସଭା ମଧ୍ୟକୁ ଛଡାଯାଇ ନଥିଲା ବୋଲି ଅଭି ଯୋଗ ହୋଇଥିଲା। ବେଆଇନ ଭାବେ ରାଜ୍ୟ ସରକାର ଓ ପ୍ରଶାସନକୁ ହାତବାରିସି କରି ଜନ ଶୁଣାଣିକୁ ନିଜ ସପକ୍ଷରେ ନେବା ପାଇଁ ଆନ୍ଧ୍ରର ତ୍ରିବେଣୀ ମାଇନ୍ସ କମ୍ପାନୀ ସକ୍ଷମ ହୋଇଥିଲା। ଏହି କମ୍ପାନୀ ହେଲେ ଆଦିମ ଜନଜାତି ବଣ୍ଡାଙ୍କ ଜୀବନ ଜୀବିକା ଓ ଭିଟାମାଟି ହରାଇବା, ପୁରାଣ ପ୍ରସିଦ୍ଧ ଆମାକୁଣ୍ଡ ବିଲୁପ୍ତ ହେବାର ଆଶଙ୍କା ରହିଛି ବୋଲି ଅଭିଯୋଗ ହେଉଛି।