ଭୁବନେଶ୍ୱର,୨୯ା୧୦(ଶର୍ମିଷ୍ଠା ପାଣିଗ୍ରାହୀ)କିଛି ଦିନଧରି ଓଡ଼ିଆ ଚଳଚ୍ଚିତ୍ର ଜଗତରେ ଚାଲିଥିବା ବିବାଦ ଥମିବାର ନାଁ ନେଉନି। ପ୍ରଯୋଜକ-ପ୍ରଯୋଜକ ମଧ୍ୟରେ କଳି ପରେ ଏବେ ଅଭିନେତା ଏବଂ ଅଭିନେତା କଳି ଚର୍ଚ୍ଚାର ବିଷୟ ପାଲଟିଛି। ବିବାଦ ଏତେ ବଢିଛି ଯେ, ଏହା ଏବେ ରାଜନୀତିର ରୂପ ନେଲାଣି। ଏପରି କି ଓଡ଼ିଶାକୁ ୨ଭାଗ କରିବାର କଥା ମଧ୍ୟ ଉଠିଲାଣି। କରୋନା ପୂର୍ବରୁ ଓଡିଆ ଚଳଚ୍ଚିତ୍ରର ସ୍ଥିତି ଯାହା ଥିଲା ସମସ୍ତେ ଜାଣିଛନ୍ତି। କୋଭିଡ୍ ପରେ ଚଳଚ୍ଚିତ୍ର ଶିଳ୍ପ ଧୀରେଧୀରେ ଅଣ୍ଟା ସଳଖି ଉଠୁଥିବାବେଳେ ଏବେ ବିବାଦ ସୃଷ୍ଟି ହେବା ଚଳଚ୍ଚିତ୍ରକୁ ଏକ ଭିନ୍ନ ମୋଡ଼ରେ ଆଣିଦେଇଛି। ତେବେ ସମ୍ବଲପୁରରେ ରାମ୍ ଚଳଚ୍ଚିତ୍ର ଚଲାଇ ନ ଦେବାକୁ ନେଇ ଯେଉଁ ବିବାଦ ଉପୁଜିଛି, ସେଥିରେ ରାଜନୈତିକ ମତବାଦ ପ୍ରବେଶ ନ କରୁ ବୋଲି ସିନେପ୍ରେମୀ ମତ ଦେଇଛନ୍ତି।
ଗତ ୨୪ତାରିଖରେ ସ୍ଥାନୀୟ ପ୍ରେସକ୍ଲବଠାରେ ଉତ୍କଳ ସିନେ ଚାମ୍ବର୍ସ ଅଫ୍ କମର୍ସ(ୟୁସିସି) ପକ୍ଷରୁ ଏକ ଖବରଦାତା ସମ୍ମିଳନୀ ଆୟୋଜନ କରାଯାଇଥିଲା। ଅଭିନେତା ଅରିନ୍ଦମ ରାୟଙ୍କ ଅଭିନୀତ ରାମ୍ ସିନେମାକୁ ମନୋଜ ମିଶ୍ରଙ୍କ ସମର୍ଥକମାନେ ବିରୋଧ କରିଥିବା ଅଭିଯୋଗ କରିଥିଲେ। ଉକ୍ତ ଅଭିଯୋଗ କ୍ରମେ ସମ୍ମିଳନୀରେ ଉପସ୍ଥିତ ଥିବା ପ୍ରଯୋଜକ ଓ ୟୁସିସିସି କର୍ମକର୍ତ୍ତା ମନୋଜ ମିଶ୍ରଙ୍କୁ ୨ବର୍ଷ ପାଇଁ ବାସନ୍ଦ ନିଷ୍ପତ୍ତି ଶୁଣାଇଥିଲେ। ଏପରି କି ୟୁସିସିସିର ନୂତନ ସଭାପତି ସଞ୍ଜୟ ନାୟକ ମଧ୍ୟ ମନୋଜଙ୍କୁ ୨ ବର୍ଷ ପାଇଁ କୌଣସି ପ୍ରଯୋଜକ ସିନେମାରେ ନେବେ ନାହିଁ। ଯଦି ଏହି ନିର୍ଦ୍ଦେଶକୁ ଅବମାନନା କରି କୌଣସି ବ୍ୟକ୍ତି ଫିଲ୍ମ ନିର୍ମାଣ କରନ୍ତି, ତାହାହେଲେ ସେହି ଫିଲ୍ମକୁ ଓ କୌଣସି ଫିଲ୍ମ ହଲ୍ରେ ରିଲିଜ କରାଇ ଦିଆଯିବ ନାହିଁ ବୋଲି କହିଥିଲେ। ଉକ୍ତ ନିଷ୍ପତ୍ତି ପରେ ଅଭିନେତାମାନେ ସୋସିଆଲ ମିଡିଆରେ ପରସ୍ପର ଭିଡିଓ ଜାରି କରି ବିବାଦକୁ ବଢ଼ାଇଥିଲେ। ତେବେ ଶୁକ୍ରବାର କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ରଙ୍କ ମନ୍ତବ୍ୟ ପରେ ବିବାଦ ଅଧିକ ବଢ଼ିବାରେ ଲାଗିଛି। ସେ କହିଛନ୍ତି, ମନୋଜ ମିଶ୍ରଙ୍କ ବାସନ୍ଦକୁ ପ୍ରତ୍ୟାହାର ନ କଲେ ଓଡ଼ିଶା ଦୁଇ ଭାଗ ହୋଇଯିବ। ତାଙ୍କୁ ବାସନ୍ଦ କରିବାର ଅର୍ଥ ପଶ୍ଚିମ ଓଡ଼ିଶା ପ୍ରତି ଏକ ବୈମାତୃକ ମନୋଭାବ ଦର୍ଶାଉଛି। ସେ ଶନିବାର ମଧ୍ୟ ତାଙ୍କ ବୟାନକୁ ଦୋହରାଇଛନ୍ତି। ସେ କହିଛନ୍ତି, ଓଡ଼ିଶା ଭାଗ ହେଲେ ସରକାର ଦାୟୀ ରହିବେ। ପଶ୍ଚିମ ଓଡ଼ିଶା ସବୁବେଳେ ଅବହେଳିତ ହୋଇ ରହୁ ବୋଲି ସରକାର ଚାହୁଁଛନ୍ତି। ସ୍ବତନ୍ତ୍ର ରାଜ୍ୟ ଦାବି କରିବା ନେଇ ଲୋକଙ୍କୁ ବାଧ୍ୟ କରାଯାଉଛି। ସ୍ବତନ୍ତ୍ର କୋଶଳ ରାଜ୍ୟ ପ୍ରତିଷ୍ଠା ସପକ୍ଷରେ ମୁଁ ନ ଥିଲି, କି ଆଜି ବି ନାହିଁ। ସରକାରଙ୍କ ମନୋବୃତ୍ତି କିନ୍ତୁ ଓଡ଼ିଶାକୁ ଭାଗ ଭାଗ କରିବାକୁ ବାଧ୍ୟ କରୁଛି ବୋଲି ମିଶ୍ର କହିଛନ୍ତି। ମିଶ୍ରଙ୍କ ଏଭଳି ମନ୍ତବ୍ୟ ପରେ ଏବେ ବିବାଦ ତେଜିବାରେ ଲାଗିଛି।
ଅଭିନେତା ମନୋଜ ମିଶ୍ର କହିଛନ୍ତି, ମୁଁ ଜାଣିନି ମୋତେ କ’ଣ ପାଇଁ ବ୍ୟାନ୍ କରାଯାଇଛି। ମୁଁ କେବେ କୌଣସି ସିନେମାର ବିରୋଧରେ ନୁହେଁ। ସବୁବେଳେ ଓଡ଼ିଆ ସିନେମାର ସପକ୍ଷରେ କହି ଆସିଛି। ରାମ୍ ସିନେମା ଦେଖ ନାହିଁ ବୋଲି ମୁଁ ମଧ୍ୟ କାହାକୁ କହିନାହିଁ। ମୋ ନଁା ନେଇ କିଏ ବି କିଛି କହିଥାଇପାରେ, ମାତ୍ର ମୁଁ କାହାକୁ କିଛି କହିନାହିଁ। କେହି ସିନେମାର ବିରୋଧ କରୁ ମୁଁ ଏହା ସପକ୍ଷରେ ନୁହେଁ। ମୁଁ କହିଦେବି ଆଉ ଯଦି ସିନେମା ବନ୍ଦ ହୋଇଯିବ ତାହାହେଲେ ଏହାଠୁ ବଡ଼ ଦୁଃଖଦ କଥା କିଛିନାହିଁ। ଫିଲ୍ମ ଭଲ ଥିଲେ ଯେତେ ଅସୁବିଧା ଆସିଲେ ବି ତାହା ହଲ୍ରେ ଚାଲିବ। ଏଥିସହ ସେ ଏକ ଖବରଦାତା ସମ୍ମିଳନୀରେ କହିଛନ୍ତି, ସଞ୍ଜୟ(ଟୁଟୁ) ନାୟକ କ’ଣ ମୋତେ ବ୍ୟାନ୍ କରିବେ ମୁଁ ତାଙ୍କୁ ବ୍ୟାନ୍ କରୁଛି। ତାଙ୍କ ସହ କୌଣସି ଫିଲ୍ମ କରିବି ନାହିଁ।
ଏହି ପ୍ରସଙ୍ଗରେ ଓଡ଼ିଶା ଚଳଚ୍ଚିତ୍ର ଉନ୍ନୟନ ନିଗମ(ଓଏଫ୍ଡିସି) ଅଧ୍ୟକ୍ଷ ତଥା ଅଭିନେତା କୁନା ତ୍ରିପାଠୀ କହିଛନ୍ତି, ଏହି ବିବାଦରେ ରାଜନୀତି ହେବା କଥା ନୁହେଁ। ପରିବାର କଥା ବାହାରକୁ ଯିବା ଆବଶ୍ୟକ ନାହିଁ। ୨ରୁ ୩ଦିନ ମଧ୍ୟରେ ଉଭୟଙ୍କୁ ଡାକି ଆଲୋଚନା ମାଧ୍ୟମରେ ସମାଧାନ କରିବି। ବ୍ୟାନ କୌଣସି ସମସ୍ୟାର ସମାଧାନ ନୁହେଁ ବୋଲି ସେ କହିଛନ୍ତି। ଏହାର ପ୍ରତ୍ୟୁତ୍ତରରେ ମନୋଜ କହିଛନ୍ତି, ମୋତେ ବାସନ୍ଦ କଥା ଶୁଣିବା ପରେ କୁନା ତ୍ରିପାଠୀ କେଉଁଠି ଥିଲେ। ସେତେବେଳେ ସେ କାହିଁ କିଛି ମୁହଁ ଖୋଲିଲେନି। ସେପଟେ ଅଭିନେତା ଶ୍ରୀତମ ଦାସ ବି କହିଛନ୍ତି ପଶ୍ଚିମ ଓଡିଶାରୁ ଆସି ମନୋଜ ଏଠି ନମ୍ବର ୱାନ କଳାକାର ହୋଇଛନ୍ତି, ବହୁ ବଡ ବଡ଼ ଜାଗାରେ ଅଛନ୍ତି। ସେମାନେ ସମସ୍ତେ ଓଡିଶାର ସୁପୁତ୍ର। ଆମ ପରିବାର ଭିତରେ ଟିକେ ମନୋମାଳିନ୍ୟ ହୋଇଛି। ଆମ ପରିବାର ଭିତର କଥା ବାହାରକୁ ପଳେଇ ଆସିଛି ତାହା ବଡ଼ ଭଳି ଲାଗୁଛି, କିଛି ଦିନ ଭିତରେ ସମାଧାନ ହୋଇଯିବ। ଏହାକୁ ନେଇ ରାଜନୀତି ହେବା କଥା ନୁହେଁ। ଗଣମାଧ୍ୟମ ଆଗରେ ସମସ୍ତ ରାଜନେତାଙ୍କୁ ଅନୁରୋଧ କରିବି ଏହା ଭିତରେ କେହି ମୁଣ୍ଡ ପୂରାନ୍ତୁ ନାହିଁ।