କୋରୁକୋଣ୍ଡା,୧୫ା୯(ଡି.ଏନ୍.ଏ.): ମାଲକାନଗିରି ଜିଲା କୋରୁକୋଣ୍ଡା ବ୍ଲକ ସଦର ସରକାରୀ ସାମୀ ଶିବାନନ୍ଦ ମାଧ୍ୟମିକ ବିଦ୍ୟାଳୟରେ ବୁଧବାର ପିଲାଙ୍କୁ ଶିକ୍ଷୟିତ୍ରୀ ମାଡ଼ ମାରିବା ଘଟଣାକୁ ନେଇ ଗୁରୁବାର ୧୦ମ ଶ୍ରେଣୀର ସମସ୍ତ ଛାତ୍ରୀଛାତ୍ର ବିଦ୍ୟାଳୟକୁ ନ ଯାଇ ଗେଟ୍ ବାହାରେ ବସି ପ୍ରତିବାଦ କରିଛନ୍ତି। ଛାତ୍ରୀଛାତ୍ରଙ୍କ କହିବା ଅନୁଯାୟୀ, ଶ୍ରେଣୀଗୃହରେ ପିଲାଙ୍କ ବସିବା ବେଞ୍ଚରେ କେହି ଜଣେ ଛାତ୍ର ନିଜ ନାମ ଲେଖିଥିଲେ। ଏହାକୁ ଖେଳ ଶିକ୍ଷୟିତ୍ରୀ ଜୋତ୍ସ୍ନାରାଣୀ ପ୍ରଧାନ ଦେଖିଥିଲେ। ବେଞ୍ଚରେ କାହିଁକି ନାମ ଲେଖିଛୁ କହି ଶିକ୍ଷୟିତ୍ରୀ ଜଣକ ୧୦ମ ଶ୍ରେଣୀ ଛାତ୍ର କାର୍ତ୍ତିକ ଗଉଡଙ୍କୁ ମାଡ଼ ମାରିଥିଲେ। ଛାତ୍ର ଜଣକ ମୁଁ ଲେଖି ନାହିଁ କହିବା ପରେ ମଧ୍ୟ ଶିକ୍ଷୟିତ୍ରୀ ପିଲାଙ୍କ କଥାକୁ ଗୁରୁତ୍ୱ ନ ଦେଇ ଛାତ୍ରକୁ ମାରିଥିଲେ। ପୂର୍ବରୁ ମଧ୍ୟ ଏହିପରି ଭାବେ ଅନ୍ୟ ଏକ ଛାତ୍ରଙ୍କୁ ମାଡ଼ ମାରିଥିବାବେଳେ ଉକ୍ତ ମାଡ଼ ଖାଇଥିବା ଛାତ୍ର ପ୍ରଧାନଶିକ୍ଷକଙ୍କୁ ଜଣାଇଥିଲେ। କିନ୍ତୁ ପ୍ରଧାନଶିକ୍ଷକ କୌଣସି ପଦକ୍ଷେପ ନେଇ ନ ଥିବାରୁ ଆଜି ଶ୍ରେଣୀର ସମସ୍ତ ଛାତ୍ରୀଛାତ୍ର ଶ୍ରେଣୀଗୃହକୁ ନ ଯାଇ ବିଦ୍ୟାଳୟର ଗେଟ୍ ସମ୍ମୁଖରେ ବସି ରହିବା ସହ ଉକ୍ତ ଶିକ୍ଷୟିତ୍ରୀଙ୍କ ବଦଳି ଦାବି କରିଥିଲେ। ଖବର ପାଇ କୋରୁକୋଣ୍ଡା ବ୍ଲକ ଶିକ୍ଷାଧିକାରୀ ଅଶୋଭ ରଞ୍ଜନ ମାଳି ଏବଂ କୋରୁକୋଣ୍ଡା ପଞ୍ଚାୟତ ସମିତି ଡବ୍ଲ୍ୟୁଓ ପ୍ରଶାନ୍ତ କୁମାର ବାଉରୀ ଓ ସିପି ସତ୍ୟ ଦାସ କୋରୁକୋଣ୍ଡା ଗୋଷ୍ଠୀ ଉନ୍ନୟନ ଅଧିକାରୀଙ୍କ ନିର୍ଦ୍ଦେଶ କ୍ରମେ ଘଟଣାସ୍ଥଳରେ ପହଞ୍ଚି ପିଲାଙ୍କ ଠାରୁ ସବୁ ଶୁଣି ସାରିଲା ପରେ ଛାତ୍ରୀଛାତ୍ର ବୁଝାଶୁଝା କରିବା ସହ ଘଟଣାର ତଦନ୍ତ କରି ପଦକ୍ଷେପ ନିଆଯିବ ବୋଲି କହିବା ସହ ଛାତ୍ରୀଛାତ୍ରଙ୍କୁ ଶ୍ରେଣୀଗୃହକୁ ଯିବା ପାଇଁ କହିଥିଲେ। ପରେ ପିଲାମାନେ କ୍ଲାସକୁ ଯାଇଥିଲେ। ଏହାର ତଦନ୍ତ କରି ଉଚିତ୍ ପଦକ୍ଷେପ ନିଆଯିବ ବୋଲି ବ୍ଲକ ଶିକ୍ଷାଧିକାରୀ କହିଛନ୍ତି।
