ଟେନସା,୧୪।୩(ଡି.ଏନ୍.ଏ.): ସୁନ୍ଦରଗଡ଼ ଜିଲା କୋଇଡ଼ା ବ୍ଲକ ବିଡିଓ ପଲ୍ଲବୀରାଣୀ ରାଜଙ୍କ ବଦଳି ଦାବି ନେଇ ମଙ୍ଗଳବାର ସିଆଇଟିୟୁ ତରଫରୁ କୋଇଡ଼ା ବ୍ଲକ ସମ୍ମୁଖରେ ବିକ୍ଷୋଭ ପ୍ରଦର୍ଶନ ସହ ଧାରଣା ଦିଆଯାଇଛି। ବିଡିଓଙ୍କ ବଦଳି ନ ହେବା ପର୍ଯ୍ୟନ୍ତ ଏହି ବିକ୍ଷୋଭ ଓ ଧାରଣା ଚାଲୁରହିବ ବୋଲି ସିଆଇଟିୟୁ ତରଫରୁ ଚେତାବନୀ ଦିଆଯାଇଛି। ବିଡିଓଙ୍କ ବିରୋଧରେ ସିଆଇଟିୟୁ ତରଫରୁ ବିଭିନ୍ନ ସମୟରେ ବିଭିନ୍ନ ଦାବି ନେଇ ବ୍ଲକ ଅଫିସ ଘେରାଉ, ଧାରଣା, ବିକ୍ଷୋଭ କରାଯାଇଥିଲେ ମଧ୍ୟ ସରକାର କୌଣସି ପଦକ୍ଷେପ ଗ୍ରହଣ କରି ନ ଥିଲେ। ଯାହା ଫଳରେ ବିଡିଓଙ୍କ ମନମୁଖି କାର୍ଯ୍ୟ ଯୋଗୁ ୧୫ଟି ଖପଞ୍ଚାୟରେ ଉନ୍ନୟନ ମୂଳକ କିମ୍ବା କୌଣସି ପ୍ରକଳ୍ପ କାର୍ଯ୍ୟ ହୋଇ ପାରୁନାହିଁ। ଏ ନେଇ ଗତ ୧୨ ତାରିଖରେ ସିଆଇଟିୟୁ ତରଫରୁ ଖବରଦାତା ସମ୍ମିଳନୀ କରାଯାଇ ବିଡିଓଙ୍କ ବିଭିନ୍ନ ଦୁର୍ନୀତି ବିଷୟରେ ଅବଗତ କରାଯାଇଥିଲା। ୧୪ତାରିଖରେ କୋଇଡା ବ୍ଳକ ଅଫିସରେ ବିକ୍ଷୋଭ ଓ ଧାରଣା ଦିଆଯିବ ବୋଲି ସିଆଇଟିୟୁ ତରଫରୁ ବଣାଇ ବିଧାୟକ ଲକ୍ଷ୍ମଣ ମୁଣ୍ଡା ପ୍ରକାଶ କରିଥିଲେ। ପ୍ରଶାସନଙ୍କୁ ଜଣାଇ ଦିଆଯାଇଥିଲେ ମଧ୍ୟ କୌଣସି ପଦକ୍ଷେପ ନିଆଯାଇ ନଥିଲା । ତେଣୁ ମଙ୍ଗଳବାର ସିଆଇଟିୟୁ ଦଳର ବଣାଇ ବିଧାୟକ ଲକ୍ଷ୍ମଣ ମୁଣ୍ଡାଙ୍କ ନେତୃତ୍ୱରେଏହି ବିକ୍ଷୋଭ ହୋଇଛି।
