ରାଉରକେଲା ଅଫିସ,୨୪।୧୨: ସୁନ୍ଦରଗଡ଼ ଜିଲାକୁ ଭାଗ କରି ରାଉରକେଲା ଓ ବଣେଇ ଜିଲା ଗଠନ ପାଇଁ ଉଠିଥିବା ଦାବିକୁ ବିରୋଧ ତେଜିବାରେ ଲାଗିଛି। ଏହି କ୍ରମରେ ରାଉରକେଲା ଉଦିତନଗର ସ୍ଥିତ ପାନପୋଷ ଉପଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ସୁନ୍ଦରଗଡ ଜିଲା ପେସା ଗ୍ରାମସଭା କୋର୍ଡିନେଶନ କମିଟିର ସଭାପତି ବୁଦ୍ଧିଆ ଜୋଜୋଙ୍କ ଅଧ୍ୟକ୍ଷତାରେ ଶୁକ୍ରବାର ବିକ୍ଷୋଭ ପ୍ରଦର୍ଶନ କରାଯାଇଛି। ଏହି କାର୍ଯ୍ୟକ୍ରମରେ ସୁନ୍ଦରଗଡ ଜିଲାର ଲାଠିକଟା, ନୂଆଗାଁ, କୁତ୍ରା ଆଦି ବ୍ଲକର ଶତାଧିକ ଗ୍ରାମବାସୀ ଭାଗ ନେଇ ସୁନ୍ଦରଗଡ ଜିଲାକୁ ଭାଗ ଭାଗ କରିବା ବିରୋଧରେ ସ୍ବର ଉତ୍ତୋଳନ କରିଥିଲେ। ଏଥିସହ ଜିଲାରେ ଥିବା ଜଙ୍ଗଲ ଜମି ବେଆଇନ ଅଧିଗ୍ରହଣ ବନ୍ଦ କରିବା, ସୁନ୍ଦରଗଡ ଜିଲାକୁ ଭାଗ ଭାଗ ନ କରିବା, ପେସା ଆଇନ ୧୯୯୬ର ନିୟମକୁ ପାଳନ କରିବା, ଜମିଗୁଡିକୁ ଲିଜ୍ରେ ଦେବା ବନ୍ଦ କରିବା ଆଦି ଦାବି କମିଟି ପକ୍ଷରୁ କରାଯାଇଥିଲା।
ଏହି ଅବସରରେ ଜିଲା ପେସା ଗ୍ରାମସଭା କୋର୍ଡିନେଶନ କମିଟି ପକ୍ଷରୁ ଶତାଧିକ ଗ୍ରାମବାସୀ ରାଉରକେଲା ବିଶ୍ରା ଛକରୁ ଏକ ଶୋଭାଯାତ୍ରାରେ ବାହାରି ରାଉରକେଲା ରିଂରୋଡ୍ ଦେଇ ପାନପୋଷ ଉପଜିଲାପାଳ କାର୍ଯ୍ୟାଳୟ ସମ୍ମୁଖରେ ପହଞ୍ଚତ୍ ବିକ୍ଷୋଭ ପ୍ରଦର୍ଶନ କରିଥିଲେ। ପରେ ସୁନ୍ଦରଗଡ ଜିଲାକୁ ଭାଗ କରି ରାଉରକେଲା ଓ ବଣେଇ ଜିଲା ଗଠନ ଦାବି ବିରୋଧରେ ପାନପୋଷ ଉପଜିଲାପାଳ ଅଭିମନ୍ୟୁ ମାଝୀଙ୍କୁ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ପ୍ରଦାନ କରାଯାଇଥିଲା। ଆଗାମୀ ଦିନରେ ଉକ୍ତ ଦାବି ପୂରଣ କରା ନ ଗଲେ କମିଟି ପକ୍ଷରୁ ଆନ୍ଦୋଳନକୁ ବ୍ୟାପକ କରାଯିବ ବୋଲି ସଭାପତି ଜୋଜୋ ଚେତାବନୀ ଦେଇଥିଲେ। ଏଥିରେ କମିଟିର ଉପସଭାପତି ପିଟର ଟପ୍ନୋ, ସମ୍ପାଦକ ସନ୍ତୋଷ ଓରାମ, ଶୁଖଦାନ ଉନ୍ଦୁଆର, ବିଳାସି ମୁଣ୍ଡାରୀ, ବନ୍ଦନୀ ଓରାମ, ନିସକେନ ସାମଦ, ମାଙ୍ଗରା ଓରାମ, ବିନୋଦ ଟୋପୋ, ସୁଜିତ ଡୁଙ୍ଗଡୁଙ୍ଗ, ଉଇଲିୟମ ମୁଣ୍ଡା, ଅନୀଲ ଟପ୍ପୋଙ୍କ ସମେତ ଶତାଧିକ ଗ୍ରାମବାସୀ ଉପସ୍ଥିତ ଥିଲେ।