ଭୁବନେଶ୍ୱର,୮।୭(ବ୍ୟୁରୋ): ମାନବପ୍ରେମୀ ଆଦିତ୍ୟ ଦାସଙ୍କ ମୃତ୍ୟୁର ବର୍ଷେ ପରେ ବି କ୍ରାଇମବ୍ରାଞ୍ଚର ତଦନ୍ତ ଶେଷ ହୋଇନାହିଁ। ଏପରି କି କ୍ରାଇମବ୍ରାଞ୍ଚ ଆଦିତ୍ୟଙ୍କ ମୃତ୍ୟୁ ରହସ୍ୟ ଉନ୍ମୋଚନ କରିପାରିନାହିଁ। ତେଣୁ ଏହି ତଦନ୍ତକୁ ନେଇ ପରିବାର ଲୋକେ ପୁଣି ପ୍ରଶ୍ନ ଉଠାଇଛନ୍ତି। ଏନେଇ ଆଦିତ୍ୟଙ୍କ ପରିବାର ପକ୍ଷରୁ ଆଇନଜୀବୀ ନିହାର ରଞ୍ଜନ ଓଝାଙ୍କ ଜରିଆରେ ବୁଧବାର ଭୁବନେଶ୍ୱର ଏସ୍ଡିଜେଏମ୍ କୋର୍ଟରେ ଏକ ପ୍ରୋଟେଷ୍ଟ ପିଟିଶନ୍ ଦାଖଲ କରାଯାଇଛି। ଏଥିରେ ମାମଲାର ପୁନଃ ତଦନ୍ତ ପାଇଁ ନିର୍ଦ୍ଦେଶ ଦେବାକୁ ଅଦାଲତଙ୍କୁ ଅନୁରୋଧ କରାଯାଇଛି।
ଆଇନଜୀବୀ ଓଝା କହିଛନ୍ତି, ସିଆର୍ପିସି ଧାରା ୨୨୦ ବଳରେ ଏହି ପିଟିଶନ ଦାଖଲ ହୋଇଛି। କୋର୍ଟ ଚାହିଁଲେ ନିଜ ଆଡୁ ଏହାର ଶୁଣାଣି କରିପାରିବେ। ଏଥିସହ ସେ କହିଛନ୍ତି, ଜିଆର୍ପି ଥାନା ଭଳି କ୍ରାଇମ୍ବ୍ରାଞ୍ଚର ତଦନ୍ତକାରୀ ଟିମ୍ ଠିକ୍ ଦିଗରେ ତଦନ୍ତ କରିନାହିଁ। ବରଂ ଜିଆର୍ପି ପ୍ରସ୍ତୁତ କରିଥିବା କାଗଜପତ୍ରକୁ ଉପସ୍ଥାପନ କରିଛି ବୋଲି ଅଭିଯୋଗ କରିଛନ୍ତି। ଆଦିତ୍ୟଙ୍କୁ ହତ୍ୟା କରାଯାଇଥିବା ଅଭିଯୋଗକୁ କ୍ରାଇମବ୍ରାଞ୍ଚ ଟିମ୍ ଫାଇନାଲ ଚାର୍ଜଶିଟରେ ଏଡ଼ାଇ ଯାଇଛି। ଏଯାଏ ସୁଇସାଇଡ୍ ନୋଟ୍ରେ କାହାର ହାତଲେଖା ବୋଲି ଟିମ୍ ସାର୍ବଜନୀନ କରୁନାହିଁ। କଲ୍ ଡିଟେଲ୍ସ ଓ ସିସି କ୍ୟାମେରା ଫୁଟେଜ୍ ଯାଞ୍ଚ ଭଳି ଆହୁରି ଅନେକ ଦିଗରେ ତଦନ୍ତ ଉପରଠାଉରିଆ ଭାବେ ହୋଇଥିବା ଜଣାପଡୁଛି। ଆଦିତ୍ୟଙ୍କ ମା’, ବାପା ଓ ସ୍ତ୍ରୀ ବିଧିବଦ୍ଧ ଭାବେ ଥାନାରେ ଅଭିଯୋଗ କରି ନ ଥିଲେ ମଧ୍ୟ ପିପୁଲ ଫର ସେବା ପକ୍ଷରୁ ୭ଜଣ ଅଭିଯୋଗପତ୍ର ଦେଇଥିଲେ। ହେଲେ ଜିଆରପି ପୋଲିସ ପ୍ରୀତମ୍ ମିଶ୍ରଙ୍କ ଅଭିଯୋଗ ଆଧାରରେ ମାମଲା ରୁଜୁ କରିଥିବାବେଳେ ଅନ୍ୟ ୬ ଜଣଙ୍କୁ ତଦନ୍ତ ପରିସରଭୁକ୍ତ କରି ନ ଥିଲା। ଏମାନଙ୍କ ବୟାନ ମଧ୍ୟ ରେକର୍ଡ କରି ନ ଥିଲା। ସେ ଆହୁରି କହିଛନ୍ତି, ହାଇକୋର୍ଟରେ ଦାଖଲ ହୋଇଥିବା ଚୂଡାନ୍ତ ଚାର୍ଜସିଟ୍ ସାର୍ବଜନୀନ ହୋଇ ନ ଥିଲେ ହେଁ, ଫାଇନାଲ ଚାର୍ଜଶିଟ୍ରେ କ୍ରାଇମବ୍ରାଞ୍ଚ ଏହି ମୃତ୍ୟୁକୁ ଆତ୍ମହତ୍ୟା ରୂପ ଦେଇଛି। ଆଦିତ୍ୟଙ୍କୁ ହତ୍ୟା କରାଯାଇଥିବା ନେଇ କୌଣସି ପ୍ରମାଣ ମିଳି ନ ଥିବା କ୍ରାଇମ୍ବ୍ରାଞ୍ଚ ହାଇକୋର୍ଟରେ ରିପୋର୍ଟ ଦାଖଲ କରିଛି। ଅନ୍ୟପକ୍ଷରେ ବିବାହର ମାସେ ପୂରି ନ ଥିବା ବେଳେ ଆଦିତ୍ୟ କାହିଁକି ଆତ୍ମହତ୍ୟା କରିବାକୁ ବାଧ୍ୟ ହେଲେ ତାହା ଏପର୍ଯ୍ୟନ୍ତ ଏହି ତଦନ୍ତକାରୀ ସଂସ୍ଥା ସ୍ପଷ୍ଟ କରିପାରିନାହିଁ।