ଗୁଣପୁର,୧୨।୧(ଡି.ଏନ୍.ଏ.) – ରାୟଗଡା ଜିଲା ଗୁଣପୁର ସହର ମହିମା ନଗରଠାରେ ପାନୀୟ ଜଳ ସମସ୍ୟା ଦେଖାଦେଇଛି। ଏହା ବିରୋଧରେ ଲୋକମାନେ ମଙ୍ଗଳବାର ଉପଜିଲାପାଳଙ୍କ କାର୍ଯ୍ୟାଳୟକୁ ଯିବା ସହ ସେଠାରେ ପ୍ରତିବାଦ ଜଣାଇଛନ୍ତି। ଉପଜିଲାପାଳଙ୍କ ଉଦ୍ଦେଶ୍ୟରେ ଏକ ଦାବିପତ୍ର ଅଭିଯୋଗ ବାକ୍ସରେ ପକାଇଛନ୍ତି। ମହିମା ନଗରଠାରେ ଦୁଇଟି ନଳକୂପ ଏବଂ ଗୋଟିଏ କୂଅ ରହିଛିା ନଳକୂପରୁ ଗୋଳିଆ ପାଣି ଆସୁଥିବାବେଳେ କୁଅଟି ଶୁଖି ଯାଇଛି। ଲୋକଙ୍କୁ ପାନୀୟ ଜଳ ଠିକ୍ଭାବେ ମିଳୁନି। ଅପରପକ୍ଷେ ଜନସ୍ବାସ୍ଥ୍ୟ ବିଭାଗ ପକ୍ଷରୁ ଯେଉଁ ଜଳଯୋଗାଣ ବ୍ୟବସ୍ଥା ହୋଇଛି ତାହା ସଠିକ ଭାବେ ମିଳୁନି। ଏହାର ପ୍ରତିବାଦରେ ଲୋକମାନେ ଜନସ୍ବାସ୍ଥ୍ୟବିଭାଗ କାର୍ଯ୍ୟାଳୟ ଆଗରେ ହାଣ୍ଡିମାଠିଆ ଧରି ଧାରଣା ଦେଇଥିଲେ। ନିୟମିତ ଏବଂ ସଠିକ ସମୟରେ ଜଳ ଯୋଗାଣ କରାଯାଉ ବୋଲି ସହକାରୀ ଯନ୍ତ୍ରୀ ବିଷ୍ଣୁ ପ୍ରସାଦ ଅଗ୍ରଓ୍ବାଲଙ୍କୁ ଦାବି ଜଣାଇଥିଲେ। ସାହିକୁ ଯାଇ ସମସ୍ୟା ବୁଝି ସମାଧାନ କରିବି ବୋଲି ସହକାରୀ ଯନ୍ତ୍ରୀ ପ୍ରତିଶ୍ରୁତି ଦେଇଥିଲେ।