ହାଇଦ୍ରାବାଦ,୨୫।୫: ଆନ୍ଧ୍ରପ୍ରଦେଶର ନବଗଠିତ ଜିଲା କୋନାସୀମା ନଁା ବଦଳାଇ ଏହାକୁ ବି.ଆର୍. ଆମ୍ବେଡ୍କର କୋନାସୀମା କରିବା ପ୍ରସ୍ତାବ ବିରୋଧରେ ଆନ୍ଦୋଳନ ମଙ୍ଗଳବାର ହିଂସାତ୍ମକ ରୂପ ନେଇଛି। ଅମଲାପୁରମ୍ ସହରରେ ଉତ୍ତ୍ୟକ୍ତ ବିକ୍ଷୋଭକାରୀ ରାଜ୍ୟ ପରିବହନ ମନ୍ତ୍ରୀ ପି. ବିଶ୍ୱରୂପଙ୍କ ଘରେ ନିଆଁ ଲଗାଇଦେବା ସହ ଭଙ୍ଗାରୁଜା କରିଛନ୍ତି। ପୋଲିସ ମନ୍ତ୍ରୀ ଓ ତାଙ୍କ ପରିବାର ସଦସ୍ୟଙ୍କୁ ନିରାପଦ ସ୍ଥାନକୁ ନେଇଯାଇଛି। ଆନ୍ଦୋଳନକାରୀମାନେ ପୋଲିସ ଭ୍ୟାନ୍ ଏବଂ ଏକ ସ୍କୁଲ୍ ବସ୍କୁ ଜାଳିଦେଇଛନ୍ତି। ସେମାନଙ୍କ ଢେଲାମାଡ଼ରେ ୨୦ ଜଣ ପୋଲିସ ଆହତ ହୋଇଛନ୍ତି। ଜିଲା ସହ ବି.ଆର୍. ଆମ୍ବେଡ୍କରଙ୍କ ନାଁ ଯୋଡ଼ାଯିବା ଘଟଣାରେ ଗର୍ବ ଅନୁଭବ କରିବା କଥା। ଏହା ବଦଳରେ ଅସାମାଜିକ ତତ୍ତ୍ୱମାନେ ହିଂସା ଘଟାଉଛନ୍ତି ବୋଲି ରାଜ୍ୟ ଗୃହମନ୍ତ୍ରୀ ତନେତି ବନିଥା କହିଛନ୍ତି। ଘଟଣାର ଉପଯୁକ୍ତ ତଦନ୍ତ ପରେ ଅପରାଧୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ ଚେତାବନୀ ଦେଇଛନ୍ତି।
ସୂଚନାଯୋଗ୍ୟ, ଗତ ଏପ୍ରିଲ ୪ରେ ପୂର୍ବ ଗୋଦାବରୀ ଜିଲାରୁ ଅଲଗା ହୋଇ କୋନାସୀମା ନୂଆ ଜିଲା ଗଠନ ହୋଇଥିଲା। ଉକ୍ତ ଜିଲାକୁ ବି.ଆର୍. ଆମ୍ବେଡ୍କର କୋନାସୀମା ଜିଲା ଭାବେ ନାମିତ କରିବାକୁ ଗତ ସପ୍ତାହରେ ରାଜ୍ୟ ସରକାର ବିଜ୍ଞପ୍ତି ଜାରି କରିଥିଲେ। ଏଥିରେ କାହାର ଯଦି ଆପତ୍ତି ଥାଏ ତେବେ ଜଣାଇବାକୁ କୁହାଯାଇଥିଲା। କୋନାସୀମା ସାଧନା ସମିତି ଏହାକୁ ବିରୋଧ କରିଥିଲା। ମଙ୍ଗଳବାର ସମିତି ପକ୍ଷରୁ ବିକ୍ଷୋଭ କରାଯିବା ସହ ଜିଲାପାଳଙ୍କୁ ସ୍ମାରକପତ୍ର ଦେବାକୁ ଯାଉଥିବାବେଳେ ପୋଲିସ ଅଟକାଇବାରୁ ହିଂସାକାଣ୍ଡ ସୃଷ୍ଟି ହୋଇଥିଲା।
