କେନ୍ଦୁଝର,୪।୧(ସ୍ବ.ପ୍ର.): ହରିଚନ୍ଦନପୁର ବ୍ଲକ ଧଳପୁର ଗ୍ରାମର ଗୋପବନ୍ଧୁ ପ୍ରାଥମିକ ବିଦ୍ୟାଳୟକୁ ବନ୍ଦ ନ କରିବା ଦାବିରେ ଏବଂ ବିଦ୍ୟାଳୟ ମିଶ୍ରଣ ପ୍ରତିବାଦରେ ଧଳପୁର ଗ୍ରାମର ଅଭିଭାବକ ଓ ଗ୍ରାମବାସୀ ସୋମବାର ଜିଲାପାଳଙ୍କ ଅଭିଯୋଗ ପ୍ରକୋଷ୍ଠରେ ଲିଖିତ ଅଭିଯୋଗ କରିଛନ୍ତି। ଏନେଇ ବ୍ୟାନର ଧରି ଏକ ଶୋଭାଯାତ୍ରାରେ ଜିଲାପାଳଙ୍କ ଅଫିସ ସମ୍ମୁଖରେ ଏକାଠି ହୋଇ ଦାବିପତ୍ର ପ୍ରଦାନ କରିଛନ୍ତି। ଏହି ବିଦ୍ୟାଳୟଟି ଦେଢ଼ କିମି ଦୂର ପାଖ ଗ୍ରାମରେ ଥିବା ଧୋଗୋଠ ପ୍ରାଥମିକ ବିଦ୍ୟାଳୟରେ ମିଶ୍ରଣ ପାଇଁ ବ୍ଲକ ଶିକ୍ଷା ଅଧିକାରୀଙ୍କ ଠାରୁ ଜାଣିବା ପରେ ଏଭଳି ଆନ୍ଦୋଳନ କରୁଥିବା କହିଛନ୍ତି। ଏହାଦ୍ୱାରା ତିନୋଟି ପଡ଼ାର ପିଲାମାନେ ଅସୁବିଧାର ସମ୍ମୁଖୀନ ହେବେ। ପୁନିଆଁ ଡିହରୁ ତିନି କିମି, ସନ୍ତୋଷପୁର ହଳ ସହିରୁ ଅଢ଼େଇ କିମି, ଧଳପୁର ସାହିରୁ ଦେଢ଼ କିମି ଦୂରରେ ରହିଥିବାରୁ ପିଲାମାନେ ନାନା ସମସ୍ୟାର ସମ୍ମୁଖୀନ ହେବେ ବୋଲି ସେମାନେ କହିଛନ୍ତି। ୨୦୧୯-୨୦ ଶିକ୍ଷା ବର୍ଷରେ ୧୫ ଜଣ ଓ ୧୯୨୦-୨୧ ଶିକ୍ଷାବର୍ଷରେ ୨୬ ଜଣ ପିଲା ପଢୁଛନ୍ତି। ସମସ୍ତେ ଗରିବ ଆଦିବାସୀ ପରିବାରର ହୋଇଥିବାରୁ ଯାତାୟାତ ସୁବିଧାଜନକ ନୁହେଁ ବୋଲି କହିଛନ୍ତି। ଏଣୁ ବିଦ୍ୟାଳୟ ମିଶ୍ରଣ ନ କରିବାକୁ ନିବେଦନ କରିଛନ୍ତି। ଶୁକଦେବ ମହାନ୍ତ, ରମଣୀ ମହାନ୍ତ, ଡମ୍ବରୁ ମହାନ୍ତ, ବୁଧଦେବ ମହାନ୍ତ ପ୍ରମୁଖ ଦାବି କରିଛନ୍ତି।