ଡେମୋକ୍ରାଟ୍ କମଲା ହାରିସ୍ ଏକକାଳୀନ ୩ ବିରଳ ରେକର୍ଡର ଅଧିକାରିଣୀ ହେବାର ଗୌରବ ଅର୍ଜନ କରିଛନ୍ତି। ସେ ହେଉଛନ୍ତି ଆମେରିକାର ପ୍ରଥମ ମହିଳା ଉପରାଷ୍ଟ୍ରପତି। ଦକ୍ଷିଣ ଏସୀୟ ତଥା କୃଷ୍ଣକାୟ ଭାବେ ଏହି ପଦରେ ଆସୀନ ହେବାରେ ମଧ୍ୟ କମଲା ପ୍ରଥମ । ତେବେ ଭାରତୀୟ ବଂଶୋଭବ ଭାବେ କମଲା କୌଣସି ଅବସରରେ ନିଜର ପରିଚୟ ଦେଇ ନ ଥାଆନ୍ତି, ବରଂ ଆମେରିକୀୟ ରୂପେ ସେ ଗର୍ବିତ ।
କମଲାଙ୍କ ବିଜୟକୁ ନେଇ ତାମିଲନାଡୁସ୍ଥିତ ତାଙ୍କ ମା’ଙ୍କ ଗଁା ଥୁଲାସେନ୍ଦ୍ରପୁରମ୍ ସମେତ ସାରା ଭାରତ ଉଲ୍ଲସିତ ହୋଇ ଉତ୍ସବ ମନାଉଥିବାବେଳେ କମଲାଙ୍କ ଏଭଳି ଆଭିମୁଖ୍ୟ ଭାରତୀୟଙ୍କୁ ନିରାଶ କରିଛି।
ଉପରାଷ୍ଟ୍ରପତି ଭାବେ ନିର୍ବାଚିତ ହେବା ପରେ ନଭେମ୍ବର ୮ ରାତିରେ ଡେଲାଓ୍ବେରସ୍ଥିତ ଓ୍ବିଲ୍ମିଂଟନର ଚେସ୍ ସେଣ୍ଟରରେ କମଲା ହାରିସ୍ ଜାତି ଉଦ୍ଦେଶ୍ୟରେ ସମ୍ବୋଧିତ କରିଥିଲେ। ସେ କହିଥିଲେ, ଆମେରିକାରେ ମହିଳାଙ୍କୁ ଭୋଟ ପାଇବା ପାଇଁ ୧୦୦ ବର୍ଷ ଧରି ସଂଗ୍ରାମ କରିବାକୁ ପଡ଼ିଛି। ସେମାନଙ୍କ ମଧ୍ୟରେ ଥିବା କୃଷ୍ଣକାୟ ମହିଳାଙ୍କୁ ଅଣଦେଖା କରାଯାଇଛି। କିନ୍ତୁ ସେମାନେ ଆମ ଗଣତନ୍ତ୍ରର ମେରୁଦଣ୍ଡ ବୋଲି ଅନେକ ସମୟରେ ପ୍ରମାଣିତ କରିଛନ୍ତି। କୃଷ୍ଣକାୟ ରାଷ୍ଟ୍ରପତି ଭାବେ ମୁଁ ପ୍ରଥମ ହୋଇପାରେ। କିନ୍ତୁ ଶେଷ ମହିଳା ନୁହେଁ। ଏହି ଅବସରରେ କମଲା ହାରିସ୍ ତାଙ୍କ ମା’ ଶ୍ୟାମଲା ଗୋପାଲନ୍ ହାରିସ୍ଙ୍କୁ ମନେପକାଇ ଶ୍ରଦ୍ଧାଞ୍ଜଳି ଦେଇଥିଲେ। ଶ୍ୟାମଲାଙ୍କୁ ୧୯ ବର୍ଷ ହେଉଥିବାବେଳେ ସେ ଡାକ୍ତରୀ ପଢ଼ିବା ପାଇଁ ଆମେରିକା ଯାଇଥିଲେ। ୨୦୦୯ରେ ଆର ପାରିକୁ ଚାଲିଯାଇଥିବା ମା’ଙ୍କୁ କମଲା ତାଙ୍କ ସଫଳତାର ଶ୍ରେୟ ଦେଇ ସେ ସବୁବେଳେ ଆମ ହୃଦୟରେ ରହିବେ ବୋଲି କହିଥିଲେ।
୧୯୬୪ ଅକ୍ଟୋବର ୨୦ରେ କାଲିଫର୍ନିଆର ଅକ୍ଲାଣ୍ଡରେ ଜନ୍ମିତ କମଲା ହେଲେ କର୍କଟ ଗବେଷକ ଶ୍ୟାମଲା ଗୋପାଲନ୍ (ଭାରତୀୟ) ଓ ଜାମାଇକା ଅର୍ଥନୀତିଜ୍ଞ ଡୋନାଲ୍ଡ ହାରିସ୍ଙ୍କ ବଡ଼ଝିଅ।
କମଲାଙ୍କୁ ମାତ୍ର ୭ ବର୍ଷ ହେଉଥିବାବେଳେ ମା’ବାପାଙ୍କ ମଧ୍ୟରେ ବିଚ୍ଛେଦ ହୋଇଥିଲା।
୧୯୯୦ରେ କମଲା ଆଇନ ଶିକ୍ଷା ଶେଷ କରି ଆଲାମେଡା କାଉଣ୍ଟି ପ୍ରୋସିକ୍ୟୁଟର ଅଫିସ୍ରେ ଆସିଷ୍ଟାଣ୍ଟ ଡିଷ୍ଟ୍ରିକ୍ଟ ଆଟର୍ନି ଭାବେ କ୍ୟାରିୟର ଆରମ୍ଭ କରିଥିଲେ।
୨୦୦୪ରେ ସେ ଡେମୋକ୍ରାଟିକ୍ ପାର୍ଟିରୁ କାଲିଫର୍ନିଆରୁ ସିନେଟ୍କୁ ନିର୍ବାଚିତ ହୋଇଥିଲେ।
୨୦୧୪ରେ କମଲା ହାରିସ୍ କର୍ପୋରେଟ୍ ଲୟର ଡୋଉଗ୍ ଏମ୍ହୋଫ୍ଙ୍କୁ ବିବାହ କରିଥିଲେ।