ନୂଆଦିଲ୍ଲୀ, ୧୦।୨: ବରିଷ୍ଠ କଂଗ୍ରେସ ନେତା ତଥା ରାଜ୍ୟ ସଭାରେ ବିରୋଧୀ ଦଳ ନେତା ଗୁଲାମ ନବୀ ଆଜାଦ୍ ମଙ୍ଗଳବାର ଉଚ୍ଚ ସଦନରୁ ଅବସର ଗ୍ରହଣ କରିଛନ୍ତି। ହିନ୍ଦୁସ୍ଥାନୀ ମୁସଲମାନ ଭାବେ ଗର୍ବ ଅନୁଭବ କରନ୍ତି। ପାକିସ୍ତାନ ଚାଲିଯାଇ ନ ଥିବା କେତେଜଣ ଭାଗ୍ୟବାନଙ୍କ ମଧ୍ୟରେ ସେ ନିଜକୁ ଗଣିଥାନ୍ତି ଓ ସବୁବେଳେ ଭାରତକୁ ସ୍ବର୍ଗ ଭାବେ ଅନୁଭବ କରିଥାନ୍ତି ବୋଲି ଭାବବିହ୍ବଳ ଆଜାଦ ବିଦାୟୀ ଭାଷଣରେ କହିଥିଲେ।
ତାଙ୍କ ମୁଖ୍ୟମନ୍ତ୍ରିତ୍ୱ ସମୟରେ ଜମ୍ମୁ-କଶ୍ମୀରରେ ହୋଇଥିବା ଆତଙ୍କବାଦୀ ଆକ୍ରମଣ କଥା ମନେ ପକାଇ ଆଜାଦ ଦେଶରୁ ଆତଙ୍କବାଦ ଶେଷ ହେବା ନେଇ ଆଲ୍ଲାଙ୍କ ପାଖରେ ପ୍ରାର୍ଥନା କରିଥିଲେ। ବିଶ୍ୱର ମୁସଲମାନ ସମାଜଗୁଡ଼ିକ ଅନ୍ତର୍ଦ୍ୱନ୍ଦ୍ୱରେ ଲିପ୍ତ ଥିବାବେଳେ ଭାରତୀୟ ମୁସଲମାନ ସେଥିରେ ପ୍ରଭାବିତ ନ ହୋଇ ଏକତ୍ର ବସବାସ କରୁଛନ୍ତି ଓ ଏହା ଜାରି ରହିବା ଉଚିତ ବୋଲି ବରିଷ୍ଠ କଂଗ୍ରେସ ନେତା କହିଥିଲେ। ତାଙ୍କ କାର୍ଯ୍ୟକୁ ପ୍ରଶଂସା କରିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଅନ୍ୟ ସହକର୍ମୀମାନଙ୍କୁ ଆଜାଦ୍ ଧନ୍ୟବାଦ ଜଣାଇଥିଲେ।
ସପ୍ତାହରେ ରାଜ୍ୟ ସଭା କାର୍ଯ୍ୟକାଳ ପୂରଣ ହେଉଥିବା ଆଜାଦଙ୍କୁ ବିଦାୟ ଦେବାବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାବବିହ୍ବଳ ହୋଇ କାନ୍ଦିପକାଇଥିଲେ। ପ୍ରଧାନମନ୍ତ୍ରୀ କହିଥିଲେ, ଗୃହରେ ଆଜାଦଙ୍କ ସ୍ଥାନ ପୂରଣ କଲା ଭଳି ନେତା ମିିଳିବା କଷ୍ଟକର ହେବ। ସେ ନିଜ ଦଳ ଅପେକ୍ଷା ଦେଶ ପାଇଁ ଅଧିକ ଚିନ୍ତା କରୁଥିଲେ। କରୋନା ମହାମାରୀ ସମୟରେ ସର୍ବଦଳୀୟ ବୈଠକ ଡାକିବା ପାଇଁ ସେ ପରାମର୍ଶ ଦେଇଥିଲେ। ଶାସନରେ ଓ ବିରୋଧୀ ଦଳରେ ରହିବାର ୨୮ ବର୍ଷର ଅଭିଜ୍ଞତା ବହୁତ ବଡ଼ କଥା ବୋଲି ମୋଦି କହିଛନ୍ତି।
ଆଜାଦ ଜମ୍ମୁ-କଶ୍ମୀର ମୁଖ୍ୟମନ୍ତ୍ରୀ ଥିବାବେଳେ ମୋଦି ଗୁଜରାଟ ମୁଖ୍ୟମନ୍ତ୍ରୀ ଥିଲେ। ଉଭୟଙ୍କ ମଧ୍ୟରେ ଘନିଷ୍ଠ ସମ୍ପର୍କ ରହିଥିଲା। ଜମ୍ମୁ-କଶ୍ମୀରରେ ଗୁଜରାଟୀ ତୀର୍ଥଯାତ୍ରୀଙ୍କ ଉପରେ ଆତଙ୍କବାଦୀ ଆକ୍ରମଣ ହୋଇଥିଲା। ଏଥିରେ ୪ ଜଣଙ୍କ ମୃତ୍ୟୁ ହେବା ସହ ଅନ୍ୟ ୬ ଗୁରୁତର ଆହତ ହୋଇଥିଲେ। ଏ ସମ୍ପର୍କରେ ପ୍ରଥମେ ଆଜାଦ ତାଙ୍କୁ ଫୋନ୍ କରି ଜଣାଇଥିଲେ ବୋଲି ମୋଦି କହିଛନ୍ତି। ଏହି ସମୟରେ ଆଜାଦ କାନ୍ଦୁଥିଲେ ବୋଲି କହିବାବେଳେ ମୋଦିଙ୍କ ଆଖିରେ ଲୁହ ଆସିଯାଇଥିଲା।
