କଟକ ଅଫିସ/ ଭୁବନେଶ୍ୱର(ବ୍ୟୁରୋ),୨୦।୫: କଟକ ନୂଆପଡା ବାଲିସାହିଠାରେ ଥିବା ବିସ୍ଥାପିତଙ୍କୁ ତୁରନ୍ତ ବାସଗୃହ, ଖାଦ୍ୟ ଓ ଚିକିତ୍ସା ସୁବିଧା ଯୋଗାଇ ଦେବା ପାଇଁ କଟକ ଜିଲାପାଳ ଓ କଟକ ମହାନଗର ନିଗମ (ସିଏମ୍ସି) କମିଶନରଙ୍କୁ ବୁଧବାର ଓଡ଼ିଶା ମାନବାଧିକାର ଆୟୋଗ (ଓଏଚ୍ଆରସି) ନିର୍ଦ୍ଦେଶ ଦେଇଛନ୍ତି। ଆସନ୍ତା ଜୁନ୍ ୨୨ରେ ଏହାର ପରବର୍ତ୍ତୀ ଶୁଣାଣି ରହିଛି। ଏହି ସମୟ ମଧ୍ୟରେ ଉପରୋକ୍ତ ପ୍ରଶାସନିକ ଅଧିକାରୀ ଦ୍ୱୟ ସବିଶେଷ ତଥ୍ୟ ପ୍ରଦାନ କରିବାକୁ କମିଶନ ନିର୍ଦ୍ଦେଶ ଦେଇଛନ୍ତି। ହ୍ୟୁମାନ ରାଇଟ୍ସ ଫ୍ରଣ୍ଟ ଇଣ୍ଡିଆର ଅଧ୍ୟକ୍ଷ ମନୋଜ ଜେନାଙ୍କ ଅଭିଯୋଗର ଶୁଣାଣି କରି ବୁଧବାର ଓଏଚ୍ଆରସି ଏହି ନିର୍ଦ୍ଦେଶ ଦେଇଛନ୍ତି।
ପ୍ରକାଶଥାଉ କି, କଟକ ସହର ଭିତରେ ରାସ୍ତା ସମ୍ପ୍ରସାରଣ ପାଇଁ ୬୦୦ରୁ ଊର୍ଦ୍ଧ୍ୱ ପରିବାରକୁ ବିଭିନ୍ନ ବସ୍ତିରୁ ବିସ୍ଥାପିତ କରାଯାଇ ପଲିଥିନ ତଳେ ଆଶ୍ରୟ ଦିଆଯାଇଥିଲା। ଗତ ୧୧ ତାରିଖରେ ପ୍ରବଳ ଝଡବର୍ଷା ହେବାରୁ ସେମାନଙ୍କର ଅବସ୍ଥା ଆହୁରି ଦହନୀୟ ହୋଇଯାଇଥିଲା। କରୋନା ମହାମାରୀ ଯୋଗୁ ସେମାନଙ୍କର ଜୀବିକା ଚାଲିଯାଇଛି। ପ୍ରଶାସନ ବିକଳ୍ପ ବ୍ୟବସ୍ଥା ନ କରି ତରବରିଆ ଭାବେ ବିସ୍ଥାପିତ କରିବା ଫଳରେ ତାଙ୍କର ବଞ୍ଚିବାର ରାହା ଚାଲିଯାଇଥିଲା। ସେମାନେ ପ୍ରଶାସନର ଏତାଦୃଶ ଅମାନବୀୟ କାର୍ଯ୍ୟାନୁଷ୍ଠାନକୁ ବିରୋଧ କରିବାରୁ ପୋଲିସ ୬୭ ଜଣଙ୍କୁ ଗିରଫ କରି ଜେଲ ପଠାଇ ଦେଇଥିଲେ, ଯାହାକି ମାନବାଧିକାରର ଘୋର ଉଲ୍ଲଂଘନ ଅଟେ। ଏହା ବିପକ୍ଷରେ ଅଭିଯୋଗକାରୀ ଆୟୋଗଙ୍କୁ ଲିଖିତ ଅଭିଯୋଗ କରି ତୁରନ୍ତ ଉକ୍ତ ଗରିବ ବିସ୍ଥାପିତଙ୍କୁ ବାସଗୃହ, ଖାଦ୍ୟ ଓ ଆବଶ୍ୟକ ଚିକିତ୍ସା ସୁବିଧା ଯୋଗାଇ ଦେବାକୁ ଅନୁରୋଧ କରିଥିଲେ। ଏଥିସହ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ଓ ସମସ୍ତ ମକଦ୍ଦମାକୁ ପ୍ରତ୍ୟାହାର କରିବାକୁ ଅନୁରୋଧ କରିଥିଲେ।
ବସ୍ତିବାସିନ୍ଦାଙ୍କ ଉପରେ ଦମନଲୀଳା ବନ୍ଦ ହେଉ
କଟକ ବାଲିସାହିରେ ଥିବା ବିସ୍ଥାପିତ ବସ୍ତିବାସିନ୍ଦାଙ୍କ ଉପରେ ଦମନ ଲୀଳା ବନ୍ଦ କରାଯାଉ। ୨୪ ଘଣ୍ଟା ମଧ୍ୟରେ ପଦକ୍ଷେପ ନ ନେଲେ ମା’ଘର ସଦସ୍ୟାମାନେ ଧାରଣାରେ ବସିବା ସହ ଆଇନର ଆଶ୍ରୟ ନିଆଯିବ ବୋଲି ସାମାଜିକ କର୍ମୀ ଋତୁପର୍ଣ୍ଣା ମହାନ୍ତି ଏକ ପ୍ରେସ୍ ବିବୃତିରେ କହିଛନ୍ତି। ଭୋକିଲା ବାସଗୃହହୀନ ମଣିଷମାନଙ୍କର ଆକ୍ରୋଶର କାରଣ ନ ବୁଝି ସେମାନଙ୍କୁ ଦମନ କରିବାର ଚେଷ୍ଟାକରି ୬୭ ବସ୍ତିବାସିନ୍ଦାଙ୍କୁ ଗିରଫ କରାଯାଇଛି। କୋଭିଡ୍ କଟକଣାକୁ ପଛରେ ପକାଇ ନିରୀହ ବସ୍ତିବାସିନ୍ଦାଙ୍କୁ ଗିରଫ କରି ସରକାରୀ ଅଧିକାରୀମାନେ କେଉଁ ଶାସନ ବ୍ୟବସ୍ଥାର ଉଦାହରଣ ସୃଷ୍ଟି କରିବାକୁ ଚାହୁଁଛନ୍ତି। ଏଭଳି ବିଭିନ୍ନ ଘଟଣାକୁ ମା’ ଘର ପକ୍ଷରୁ ଦୃଢ଼ ନିନ୍ଦା କରାଯାଇଛି। ୨୪ ଘଣ୍ଟା ମଧ୍ୟରେ କୌଣସି ସ୍କୁଲ କଲେଜ ବା କମ୍ୟୁନିଟି ସେଣ୍ଟରରେ ଏହି ପରିବାରଗୁଡିକୁ ସୁରକ୍ଷିତ ଗୃହ ଯୋଗାଇବା ଯାଏ ଥଇଥାନ କରାଯାଉ ବୋଲି ମା’ଘର ପକ୍ଷରୁ ଦାବି କରାଯାଇଛି। ସେହିଭଳି ସେମାନଙ୍କ ଲାଗି ୩୬୫ ଦିନ ଖାଦ୍ୟ ବ୍ୟବସ୍ଥା ସହ ପିଲାମାନଙ୍କ ପାଇଁ ପୁଷ୍ଟିକର ଖାଦ୍ୟ ଏବଂ ବୟସ୍କଙ୍କ ପାଇଁ ସୁଷମ ଖାଦ୍ୟର ବ୍ୟବସ୍ଥା, ସମସ୍ତଙ୍କ ସ୍ବାସ୍ଥ୍ୟ ପରୀକ୍ଷା, ଚିିକିତ୍ସା ବ୍ୟବସ୍ଥା, ଗିରଫ ହୋଇଥିବା ଲୋକଙ୍କୁ ଖଲାସ କରି ମାମଲା ପ୍ରତ୍ୟାହାର ପାଇଁ ଦାବିରେ କୁହାଯାଇଛି। ଲୋକମାନଙ୍କ ପ୍ରତି ଏଭଳି ଅମାନବୀୟ ବ୍ୟବହାର କଲେ ଏହା ବିରୋଧରେ ଧାରଣା ଦିଆଯିବା ସହ କୋର୍ଟର ଦ୍ୱାରସ୍ଥ ହେବାକୁ ମା’ଘର ପକ୍ଷରୁ କୁହାଯାଇଛି। ମୁଖ୍ୟମନ୍ତ୍ରୀ ଏହି ମାମଲାରେ ହସ୍ତକ୍ଷେପକରି ଲୋକଙ୍କୁ ଶୀଘ୍ର ନ୍ୟାୟ ପ୍ରଦାନ କରନ୍ତୁ ବୋଲି ଦାବି କରାଯାଇଛି।