କେନ୍ଦ୍ରାପଡ଼ା ଅଫିସ,୩୦।୧୦: ସୂଚନା ଅଧିକାର ଆଇନ ଅମାନ୍ୟ କରିଥିବାରୁ କେନ୍ଦ୍ରାପଡ଼ା ଜିଲା ମାର୍ଶାଘାଇ ବ୍ଲକର ପୂର୍ବତନ ଜେଇ (କନିଷ୍ଠ ଯନ୍ତ୍ରୀ) ସ୍ବରୂପ ଦାସ ୨୫ ହଜାର ଟଙ୍କା ଜରିମାନା ଦେବେ। ଓଡିଶା ସୂଚନା କମିଶନର ବି.କେ. ମହାପାତ୍ର ମାର୍ଶାଘାଇ ବ୍ଲକ ମଣିକୁଣ୍ଡା ଗ୍ରାମର ଅଭିରାମ ଜେନାଙ୍କ ସୂଚନା ଅଧିକାର ଆଇନର ଦ୍ୱିତୀୟ ଆବେଦନ ମାମଲା (ନଂ.୧୫୨୧/୧୬)ର ଶୁଣାଣି କରି ଗତ ସେପ୍ଟେମ୍ବର ୩୦ରେ ଏହି ଆଦେଶ ଦେଇଛନ୍ତି। ଅଭିରାମ ୨୦୧୬ ଫେବୃୟାରୀ ୨୫ରେ ମାର୍ଶାଘାଇ ପଞ୍ଚାୟତ ସମିତିର ପିଆଇଓଙ୍କୁ ଏନ୍ଏଚ୍ ୫ (କ)ରୁ ମଣିକୁଣ୍ଡା ପର୍ଯ୍ୟନ୍ତ ରାସ୍ତା ଉନ୍ନତୀକରଣ ସମ୍ପର୍କରେ କେତେକ ତଥ୍ୟ ସହ ମେଜରମେଣ୍ଟ ବୁକ ୪୦୬ର ୧୯୧ରୁ ୧୯୩ ପର୍ଯ୍ୟନ୍ତ ପୃଷ୍ଠାର ନକଲ ପାଇବା ପାଇଁ ସୂଚନା ଅଧିକାର ଆଇନ ଅନୁଯାୟୀ ତଥ୍ୟ ମାଗିଥିଲେ। ତେବେ ସମୟ ଅବଧି ସରିଥିଲେ ମଧ୍ୟ ସେ ଏହି ସୂଚନା ପାଇ ନ ଥିଲେ। ଏହି ତଥ୍ୟ ତତ୍କାଳୀନ ଜେଇ ସ୍ବରୂପ ଦାସଙ୍କ ନିକଟରେ ଥିବା ଦର୍ଶାଇଥିଲେ। ଏ ନେଇ ରାଜ୍ୟ ସୂଚନା କମିଶନଙ୍କ ନିକଟରେ ଅଭିଯୋଗ ପରେ ଜିଲାପାଳଙ୍କୁ ତଦନ୍ତ ପାଇଁ ନିର୍ଦ୍ଦେଶ ହୋଇଥିଲା। ତଦନ୍ତ ସମୟରେ ଜେଇ ଦାସ ଏହାକୁ ଅଣଦେଖା କରିବାରୁ ଜରିମାନା ଅର୍ଥ ଦରମାରୁ କାଟିବା ପାଇଁ ନିର୍ଦ୍ଦେଶ ଦିଆଯାଇଛି। ସୂଚନାଯୋଗ୍ୟ ଯେ, ଜେଇ ଦାସ ଏବେ କେନ୍ଦ୍ରାପଡ଼ା ପଞ୍ଚାୟତ ସମିତି ଅଧୀନରେ କାର୍ଯ୍ୟରତ ଅଛନ୍ତି।