ଛତ୍ରପୁର,୧ା୪(ସନ୍ତୋଷ ପାଢ଼ୀ/ଦିଲ୍ଲୀପ ସାମଲ): ଗଞ୍ଜାମ ଜିଲାସ୍ତରୀୟ ୮୯ତମ ପୋଲିସ ପ୍ରତିଷ୍ଠା ଦିବସ ଛତ୍ରପୁର ପୋଲିସ ପଡ଼ିଆଠାରେ ସୋମବାର ପାଲିତ ହୋଇଯାଇଛି । ଏଥିରେ ଗଞ୍ଜାମ ଏସ୍ପି ଜଗମୋହନ ମୀନା ଯୋଗଦେଇ ଆଇନଶୃଙ୍ଖଳା ରକ୍ଷା କରିବା ସହ ଅପରାଧ ନିୟନ୍ତ୍ରଣ ପୋଲିସ କରିଆସୁଛି ବୋଲି କହିଥିଲେ। ଲୋକଙ୍କୁ ଉତ୍ତମ ସେବା ଯୋଗାଇବା ହେଉଛି ଆମ୍ଭର ପ୍ରଥମ ଧର୍ମ ବୋଲି ଏସ୍ପି କହିଥିଲେ। ଓଡ଼ିଶାର ରାଜ୍ୟପାଳ ଓ ମୁଖ୍ୟମନ୍ତ୍ରୀଙ୍କ ବାର୍ତ୍ତାକୁ ଏସ୍ପି ପାଠ କରିଥିଲେ। ଏହି ଅବସରରେ ରିଜର୍ଭ ଇନ୍ସପେକ୍ଟର ଅମୂଲ୍ୟ କୁମାର ନାୟକଙ୍କ ତତ୍ତ୍ୱାବଧାନରେ ପରେଡ୍ ପରିଚାଳନା କରାଯାଇଥିଲା। କର୍ତ୍ତବ୍ୟନିଷ୍ଠା ଓ ସାହସିକତା କ୍ଷେତ୍ରରେ ଉଲେଖନୀୟ କାର୍ଯ୍ୟ କରିଥିବା ଗଞ୍ଜାମ ପୋଲିସ ଜିଲାର ୪ ଜଣକୁ ଏସ୍ପି ପୁରସ୍କୃତ କରିଥିଲେ। ସେଥିମଧ୍ୟରେ କୋଟିନାଡ଼ା ଥାନା ସବ୍ଇନ୍ସପେକ୍ଟର ସତ୍ୟବ୍ରତ ସାହୁ, ରମ୍ଭା ଥାନା ହାବିଲଦାର ରାମଚନ୍ଦ୍ର ମୁଦୁଲି, ଜିଲା ମୁଖ୍ୟ କାର୍ଯ୍ୟାଳୟ କାହ୍ନୁଚରଣ ପଣ୍ଡା ଶ୍ରେଷ୍ଠ କନଷ୍ଟେବଳ ଓ ଶ୍ରେଷ୍ଠ ଏପିଆର କନଷ୍ଟେବଳ ଶିଶିର କୁମାର ପ୍ରଧାନଙ୍କୁ ଏସ୍ପି ସମ୍ମାନିତ କରିବା ସହ ପୁରସ୍କୃତ କରିଥିଲେ।
