ରସୁଲପୁର,୨୦।୯(ରଞ୍ଜିତ ରାଉତ): ଯାଜପୁର ଜିଲା ରସୁଲପୁର ବ୍ଲକ ମହିଳା ଓ ଶିଶୁ ବିକାଶ ପ୍ରକଳ୍ପ ଅଧୀନରେ ୨୬୬ ଅଙ୍ଗନୱାଡି କେନ୍ଦ୍ର ରହିଛି।ଏହି କେନ୍ଦ୍ରରେ ପ୍ରି-ସ୍କୁଲ/ପ୍ଲେ-ସ୍କୁଲର ୩ରୁ ୬ବର୍ଷ ପର୍ଯ୍ୟନ୍ତ ୫ହଜାରରୁ ଊର୍ଦ୍ଧ୍ୱ କୋମଳମତି ଶିଶୁ କେନ୍ଦ୍ରରେ ନାମ ଲେଖାଇଛନ୍ତି। ପ୍ରତ୍ୟେକ କେନ୍ଦ୍ର ପକ୍ଷରୁ ପୋଷଣଯୁକ୍ତ ଖାଦ୍ୟ ଦେବାକୁ ସରକାରୀସ୍ତରରେ ବ୍ୟବସ୍ଥା କରାଯାଇଛି। ସକାଳୁ ଜଳଖିଆ, ମଧ୍ୟାହ୍ନରେ ଗରମ ରନ୍ଧାଖାଦ୍ୟ ଜରିଆରେ ପୋଷଣଯୁକ୍ତ ଖାଦ୍ୟ ପରିଷିବା ପାଇଁ ନିର୍ଦ୍ଦେଶ ରହିଛି। ହେଲେ ଖାଦ୍ୟ ସାମଗ୍ରୀର ଦର ଅହେତୁକ ବୃଦ୍ଧି ଯୋଗୁ ପିଲାମାନଙ୍କୁ ସକାଳ ଜଳଖିଆ, ଓ ପୋଷଣଯୁକ୍ତ ଖାଦ୍ୟ ପରିଚାଳନାକୁ ନେଇ ଅଙ୍ଗନୱାଡି କର୍ମୀମାନଙ୍କ ଚିନ୍ତା ବଢିଛି। ଅଣ୍ଡା, ପନିପରିବା, ଡାଲି, ମସଲା ଆଦିର ଦର ହୁ ହୁ ହୋଇ ବଢି ଯାଉଥିବାରୁ ଶିଶୁମାନଙ୍କୁ ପୃଷ୍ଟିକର ଖାଦ୍ୟ ପ୍ରଦାନ ବ୍ୟବସ୍ଥା କେବଳ ପ୍ରହସନ ପାଲଟିଛି। ଅଙ୍ଗନୱାଡି କେନ୍ଦ୍ରରେ ମଧ୍ୟାହ୍ନ ଭୋଜନ କେବଳ ଲୋକ ଦେଖାଣିଆ ଚାଲିଛି ବୋଲି ଅଭିଯୋଗ ହୋଇଛି।
ସୂଚନା ଅନୁଯାୟୀ, ଶିଶୁମାନଙ୍କୁ ମାନସିକ, ଶାରିରୀକ ସୁସ୍ଥ ରଖିବା ସହ ରକ୍ତହୀନତା, ପୃଷ୍ଟିହୀନତା, କମ୍ ଓଜନ, ଉଚ୍ଚତା ବଢ଼ାଇବା ପାଇଁ ଶିଶୁମାନଙ୍କୁ ପୋଷଣଯୁକ୍ତ ଖାଦ୍ୟ ପ୍ରଦାନ କରିବାକୁ ମହିଳା ଓ ଶିଶୁ କଲ୍ୟାଣ ବିଭାଗ ପକ୍ଷରୁ ମାର୍ଗ ଦର୍ଶିକା ଜାରି କରାଯାଇଛି। ଏହି କ୍ରମରେ ଦେଖିଲେ କେନ୍ଦ୍ରକୁ ଆସୁଥିବା ପିଲାମାନଙ୍କୁ ସକାଳ ଜଳଖିଆରେ ଗଜାବୁଟ, ଚୁଡ଼ା ଓ ମୁଢ଼ିମୁଆଁ ପ୍ରଦାନ କରାଯାଉଛି । ମଧ୍ୟାହ୍ନ ଭୋଜନରେ ସୋମବାର ଭାତ, ଡାଲମା, ବାକି ସପ୍ତାହକୁ ୫ଦିନ ଭାତ ଓ ଅଣ୍ଡା ତରକାରୀ ପ୍ରଦାନ କରାଯିବାକୁ ଖାଦ୍ୟ ତାଲିକା ପ୍ରସ୍ତୁତ କରାଯାଇଛି। ସରକାରଙ୍କ ପକ୍ଷରୁ ମୁଣ୍ଡପିଛା ଜଳଖିଆ ପାଇଁ ଟ୨.୪୦ପ. ଓ ମଧ୍ୟାହ୍ନ ଭୋଜନ ପାଇଁ ଟ୬.୪୦ପ. ଅନୁଦାନ ମିଳୁଛି। ସରକାରଙ୍କ ପକ୍ଷରୁ ମିଳୁଥିବା ଆର୍ଥିକ ସହାୟତାରେ ଯେନତେନ ଉପାୟରେ ସକାଳ ଜଳଖିଆ ପରିଚାଳନା ହୋଇଯାଉଛି ା ମାତ୍ର ଗରମ ରନ୍ଧାଖାଦ୍ୟ ପରିଚାଳନା କରିବା ଏକପ୍ରକାର ଅସମ୍ଭବ ବୋଲି ସାଧାରଣରେ ମତ ପ୍ରକାଶ ପାଇଛି। ଅଣ୍ଡା ଗୋଟାକୁ ସରକାର ଟ୫.୫୦ପ. ଦେଉଥିବା ବେଳେ ବଜାର ଦର ୭ଟଙ୍କା ଓ ଡାଲି କେଜି ପ୍ରତି ୧୦୦ଟଙ୍କା ମିଳୁଥିବା ବେଳେ ବଜାର ଦର ୧୫୦ରୁ ଊର୍ଦ୍ଧ୍ୱ ରହିଛି ା ତା’ଉପରେ ଆହୁରି ଦର ବଢିବାରେ ଲାଗିଛି। ମସଲା ଓ ରନ୍ଧନ ଗ୍ୟାସ ଦର ବି ବଢୁଛି। ଏଭଳି ପରିସ୍ଥିତିରେ ଅଣ୍ଡା, ରନ୍ଧନ ଗ୍ୟାସ, ମସଲା, ଡାଲି, ପନିପରିବା, ଆଳୁ ଆଦି ସାମଗ୍ରୀ କ୍ରୟ କରି ମଧ୍ୟାହ୍ନ ଭୋଜନ ପରିଚାଳନା କେମତି କରାଯିବ ତା’ଉପରେ ପ୍ରଶ୍ନବାଚୀ ସୃଷ୍ଟି ହେଉଛି।
ଘରେ ରହିଥିବା ପିଲାମାନଙ୍କ ପାଇଁ ଟିଏଚ୍ଆର(ଟେକ୍ ହୋମ ରାଶନ) ଜରିଆରେ ଘରକୁ ଅଣ୍ଡା ଓ ଛତୁଆ ପ୍ରଦାନ କରାଯାଉଛି। ସେହି ବର୍ଗର ପିଲାମାନଙ୍କ ଘରକୁ ମୁଣ୍ଡପିଛା ୧୨ଟି ଅଣ୍ଡା ପ୍ରଦାନ କରିବାର ନିୟମ ରହିଛି। ଅଣ୍ଡାଦର ବଢି ଯାଇଥିବାରୁ କର୍ମୀମାନେ ମୁଣ୍ଡପିଛା ୧୦ଟି ଲେଖାଏ ଅଣ୍ଡା ଦେଉଛନ୍ତି। ସ୍ଥଳ ବିଶେଷରେ ୯ଟି ଲେଖାଏ ଅଣ୍ଡା ପ୍ରଦାନ କରାଯାଉଛି। ଏହାକୁ ନେଇ ଅଭିଭାବକମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି। ଅଭିଭାବକମାନେ ପଞ୍ଚାୟତଠାରୁ ଆରମ୍ଭ କରି ବ୍ଲକ ଓ ଜିଲାସ୍ତରୀୟ ଅଧିକାରୀଙ୍କ ନିକଟରେ ଅଭିଯୋଗ କରୁଛନ୍ତି ା ଉକ୍ତ ଅଭିଯୋଗ ସତ୍ତ୍ୱେ ଏଭଳି ଅବ୍ୟବସ୍ଥାର କୌଣସି ସମାଧାନର ସୂତ୍ର ବାହାରି ପାରୁନାହିଁ। ସରକାରୀସ୍ତରରେ ଦରଦାମ ବୃଦ୍ଧି ଅନୁସାରେ ଆର୍ଥିକରାଶି ବୃଦ୍ଧି ନ ଘଟାଇବା ପର୍ଯ୍ୟନ୍ତ ସମସ୍ୟାର ସମାଧାନ ହୋଇପାରିବ ନାହିଁ ବୋଲି ମତ ପ୍ରକାଶ ପାଇଛି। ଏହି ସମସ୍ୟାକୁ ଦୂର କରିବାକୁ ହେଲେ ଅଙ୍ଗନୱାଡି କର୍ମୀମାନଙ୍କୁ ହାତପାଣ୍ଠି ପ୍ରଦାନ କରିବାକୁ କର୍ମୀମାନେ ଦାବି କରୁଛନ୍ତି। ଖାଦ୍ୟ ସାମଗ୍ରୀର ବଜାର ଦର କମ୍ବେଶୀ ହେଲେ ହାତପାଣ୍ଠିରୁ ଭରଣା କରାଯାଇ ପାରିବା ସହ ସରକାରଙ୍କ ବିଧିବ୍ୟବସ୍ଥାକୁ ସୁପରିଚାଳନା କରାଯାଇ ପାରିବ ବୋଲି କର୍ମୀମାନେ ମତ ରଖିଛନ୍ତି।
ଏ ଦିଗରେ ଅଙ୍ଗନୱାଡି ସୁପରଭାଇଜର ବିଷ୍ଣୁପ୍ରିୟା ଦାସଙ୍କୁ ପଚାରିବାରୁ ଯାହା ସରକାରୀ ବିଧି ବ୍ୟବସ୍ଥା ରହିଛି ତାକୁ ମାନି ଚାଲିବାକୁ ପଡିବ। ଦରଦାମ ବୃଦ୍ଧି ଯୋଗୁ ମଧ୍ୟାହ୍ନ ଭୋଜନ ପରିଚାଳନା, ବିଶେଷକରି ଘରକୁ ଅଣ୍ଡା ପ୍ରଦାନ ହେଉ ଅବା ମଧ୍ୟାହ୍ନ ଭୋନରେ ଅଣ୍ଡା ତରକାରୀ ପରଷିବାରେ ଅସୁବିଧା ହେଉଛି। ଏହି ସମସ୍ୟା ସମ୍ପର୍କରେ ଅଭିଭାବକମାନଙ୍କୁ ଅବଗତ କରାଇବା ପାଇଁ ମାତୃ କମିଟି ଓ ଯାଞ୍ଚ କମିଟି କର୍ମକର୍ତ୍ତାଙ୍କୁ ବସାଇ ଆଲୋଚନା କରିବାକୁ କେନ୍ଦ୍ରର କର୍ମୀମାନଙ୍କୁ ନିର୍ଦ୍ଦେଶ ଦିଆଯାଇଛି। ବ୍ୟବସ୍ଥାରେ କିଛି ବି ପରିବର୍ତ୍ତନ କରାଇଲେ କର୍ମୀମାନେ କମିଟିରେ ଆଲୋଚନା କରି ରିଜୋଲେଶନରେ ଉଲ୍ଲେଖ କରି କରିପାରିବେ ବୋଲି ମତ ରଖିଛନ୍ତି।