ନୂଆଦିଲ୍ଲୀ,୮।୭(ପି.ଟି.): ଭାରତୀୟ ମହିଳା ସ୍କ୍ବାଶ୍ ତାରକା ଜ୍ୟୋତ୍ସ୍ନା ଚିନାପ୍ପା ସଦ୍ୟ ପ୍ରକାଶିତ ପ୍ରଫେଶନାଲ ସ୍କ୍ବାଶ୍ ଆସୋସିଏଶନ ବିଶ୍ୱ ର଼୍ୟାଙ୍କିଙ୍ଗ୍ର ଟପ୍-୧୦ରେ ସ୍ଥାନ ହାସଲ କରିଛନ୍ତି। ଇଜିପ୍ଟର ୧ ନମ୍ବର ଖେଳାଳି ରାନୀମ ଏଲ ଓ୍ବେଲିଲି ହଠାତ୍ ଅବସର ଘୋଷଣା କରିବା ପରେ ଜ୍ୟୋତ୍ସ୍ନାଙ୍କୁ ଏହି ସୁଯୋଗ ମିଳିଛି।
କୋଭିଡ୍-୧୯ ମହମାରୀ କାରଣରୁ ଜ୍ୟୋତ୍ସ୍ନା ଗତ ମାର୍ଚ୍ଚରୁ ଖେଳିନାହାନ୍ତି। ତେବେ ସେ ଗୋଟିଏ ସ୍ଥାନ ଉପରକୁ ଉଠି ଦଶମ ସ୍ଥାନରେ ରହିଛନ୍ତି। ୨୦୧୬ ବର୍ଷ ପରେ ୩୩ ବର୍ଷୀୟା ଜ୍ୟୋତ୍ସ୍ନା ପ୍ରଥମଥର ପାଇଁ ଶ୍ରେଷ୍ଠ ୧୦ରେ ସ୍ଥାନ ପାଇଛନ୍ତି। ପୂର୍ବରୁ ଅବଶ୍ୟ ଦୀପିକା ପାଲିକାଲ ଅନ୍ୟତମ ଭାରତୀୟ ଖେଳାଳିଭାବେ ଏହି ସଫଳତା ହାସଲ କରିଛନ୍ତି। ରାନୀମ ଅବସର ଗ୍ରହଣ କରିବା ପରେ ଇଜିପ୍ଟର ଅନ୍ୟତମ ଖେଳାଳି ଗୋହର ବିଶ୍ୱର ନୂଆ ୧ ନମ୍ବର ଖେଳାଳି ସାବ୍ୟସ୍ତ ହୋଇଛନ୍ତି। ଅବସର ଘୋଷଣା କରିବା ପୂର୍ବରୁ ରାନୀମ୍ ୧୯ ମାସ ଧରି ୧ ନମ୍ବର ସ୍ଥାନରେ ରହିଆସୁଥିଲେ।
ଅପରପକ୍ଷରେ ପୁରୁଷ ବିଭାଗରେ ଭାରତର ସୌରଭ ଘୋଷାଲ ସଦ୍ୟ ପ୍ରକଶିତ ର଼୍ୟାଙ୍କିଙ୍ଗ୍ରେ ପୂର୍ବପରି ୧୩ତମ ସ୍ଥାନ ବଜାୟ ରଖିଛନ୍ତି। କରୋନା ଭାଇରସ୍ ସଂକ୍ରମଣ କାରଣରୁ ପିଏସ୍ଏ ଟୁରକୁ ଅଗଷ୍ଟ ମଧ୍ୟଭାଗ ପର୍ଯ୍ୟନ୍ତ ବାତିଲ କରାଯାଇଛି।