ଲିସ୍ବନ୍,୨୩।୮(ଏପି): ୟୁନିୟନ ଅଫ୍ ୟୁରୋପିଆନ ଫୁଟବଲ ଆସୋସିଏଶନ (ୟୁଇଏଫ୍ଏ) ଆନୁକୂଲ୍ୟରେ ପ୍ରତିବର୍ଷ ଆୟୋଜିତ ହେଉଥିବା ହାଇପ୍ରୋଫାଇଲ୍ ଚାମ୍ପିୟନ୍ସ ଲିଗ୍ର ଫାଇନାଲ ମୁକାବିଲା ଏଥର ସ୍ପଷ୍ଟ ହୋଇଛି। ରବିବାର ଫାଇନାଲ ମୁକାବିଲାରେ ପ୍ୟାରିସ୍-ସେଣ୍ଟ-ଜର୍ମେନ (ପିଏସ୍ଜି) ଓ ବେୟର୍ନ ମ୍ୟୁନିକ୍ ପରସ୍ପରକୁ ଭେଟିବେ। କୋଭିଡ୍-୧୯ ମହମାରୀ କାରଣରୁ ଲିଗ୍ ଅବଶ୍ୟ କେତେମାସ ସ୍ଥଗିତ ଥିଲା। ଏପରିକି ଫାଇନାଲ ମ୍ୟାଚ୍ର ଭେନ୍ୟୁରେ ମଧ୍ୟ ପରିବର୍ତ୍ତନ ଆଣିବାକୁ ହୋଇଥିଲା।
ସଫଳ ହେଲେ ପିଏସ୍ଜି ପ୍ରଥମଥର ପାଇଁ ଏହି ଲିଗ୍ ଚାମ୍ପିୟନ ହେବାର ଗୌରବ ଅର୍ଜନ କରିବ। ଅନ୍ୟପଟେ ବେୟର୍ନ ଷଷ୍ଠଥର ପାଇଁ ଟାଇଟଲ ହାସଲ କରିବ। ଫାଇନାଲ ମ୍ୟାଚ୍ ଦେଖିବାକୁ ମାତ୍ର କେତେଶହ ଲୋକଙ୍କୁ ସୁଯୋଗ ମିଳିବ। କରୋନା ଭାଇରସ ଟେଷ୍ଟର ସମ୍ମୁଖୀନ ହୋଇଥିବା ଖେଳାଳି ଓ ଅଫିସିଆଲମାନେ ପଡିଆକୁ ପ୍ରବେଶ କରିବେ। ପୂର୍ବରୁ ଏହି ଟାଇଟଲ ମୁକାବିଲା ଇସ୍ତାନବୁଲ୍ରେ ମେ’ରେ ଆୟୋଜନ ହେବାର କାର୍ଯ୍ୟକ୍ରମ ଥିଲା। ତେବେ ମହାମାରୀ କାରଣରୁ ଏହାକୁ ଲିସ୍ବନ୍ର ଇଷ୍ଟାଡିଓ ଡା ଲୁଜ୍ରେ ଆୟୋଜନ ହେବ। ପୂର୍ବରୁ ଏଭଳି କେବେ ଫାଙ୍କା ଷ୍ଟାଡିୟମରେ ଏହି ଫାଇନାଲ ମ୍ୟାଚ୍ ଆୟୋଜନ ହୋଇନାହିଁ।
ପୂର୍ବରୁ ଏହି ଦୁଇ ଦଳ ପରସ୍ପରକୁ ଏହି ଟୁର୍ନାମେଣ୍ଟରେ ୮ଥର ୁ ଭେଟିଛନ୍ତି। ପିଏସ୍ଜି ୫ଥର ଓ ବେୟର୍ନ ୩ ଥର ଗ୍ରୁପ୍ ପର୍ଯ୍ୟାୟରେ ବିଜୟୀ ହୋଇଛି। ପିଏସ୍ଜି ତୃତୀୟଥର ପାଇଁ ଏହି ଟୁର୍ନାମେଣ୍ଟର ଫାଇନାଲରେ ପ୍ରବେଶ କରିଛି। ଅନ୍ୟପଟେ ବେୟର୍ନ ୧୧ଥର ପାଇଁ ଫାଇନାଲକୁ ଉଠିଛି। ଏହି ଲିଗ୍ରେ ରିୟଲ ମାଡ୍ରିଡ୍ ୧୩, ଏସି ମିଲାନ ୭ ଓ ଲିଭରପୁଲ ୬ ଥର ଟାଇଟଲ ହାସଲ କରିଛି। ଚାମ୍ପିୟନ ହେବା ପାଇଁ ଉଭୟଦଳ ଆଶାବାଦୀ ଅଛନ୍ତି
