କରାଚି, ୩୦।୬: ନିକଟରେ ଶେଷ ହୋଇଥିବା ପାକିସ୍ତାନ ସୁପର ଲିଗ୍(ପିଏସ୍ଏଲ୍) ୨୦୨୧ରେ ସର୍ବାଧିକ ଉଇକେଟ ନେଇ ଚମକିଛନ୍ତି ବୋଲର ଶାହାନଓ୍ବାଜ ଡାହାନି। ସେ ଦଳକୁ ଜିତାଇବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ଏହାକୁ ନେଇ ପାକିସ୍ତାନ କ୍ରିକେଟରେ ଏହି ଯୁବ ଦ୍ରୁତ ବୋଲରଙ୍କ ଆଲୋଚନା କରାଯାଉଛି। ବିଶେଷକରି ତାଙ୍କ ସଂଘର୍ଷର କାହାଣୀ ଅନେକଙ୍କୁ ଭାବବିହ୍ବଳ କରୁଛି।
କିଛି ବର୍ଷ ପୂର୍ବଯାଏ ଲାରକଣା ନିକଟ ଏକ ଛୋଟ ଗାଁରେ ରହୁଥିବା ଡାହାନି ଅନ୍ୟ ପାକିସ୍ତାନୀ ବାଳକଙ୍କ ପରି ଥିଲେ। ସୁବିଧା ଅଭାବରୁ ଶାହନାଓ୍ବାଜ ଅନ୍ୟମାନଙ୍କ ଭଳି ଅଧିକ ସୁଯୋଗ ପାଇ ନ ଥିଲେ। ହେଲେ ସେତେବେଳେ ସେ ନିଜକୁ ପ୍ରସ୍ତୁତ କରିଥିଲେ। କ୍ରିକେଟ ଖେଳିବାକୁ ତାଙ୍କ ପାଖରେ ଜୋତା କିଣିବାକୁ ଟଙ୍କା ନ ଥିଲା। ହେଲେ ସେ ଏବେ ପାକିସ୍ତାନ କ୍ରିକେଟର ଭବିଷ୍ୟତ ବୋଲି କୁହାଯାଉଛି।
ପିଏସ୍ଏଲ୍ ୨୦୨୧ ପୂର୍ବରୁ ଶାହନାଓ୍ବାଜଙ୍କୁ ମୁଲତାନ ସୁଲତାନ୍ସ ଏକ ଉଦୀୟମାନ ଖେଳାଳି ଭାବେ ଚୟନ କରିଥିଲେ। ଏହି ନିଷ୍ପତ୍ତି ଫ୍ରାଞ୍ଚାଇଜ୍କୁ ଅନେକ ସଫଳତା ଦେଇଥିଲା। ଟୁର୍ନାମେଣ୍ଟ ଇତିହାସରେ ସେ ସର୍ବାଧିକ ଉଇକେଟ ନେଇଥିବା ଖେଲାଳି ପାଲଟିଥିଲେ। ତେବେ ଜିଓ ପାକିସ୍ତାନ ସହ ସାକ୍ଷାତକାରରେ ଡାହାନି ତାଙ୍କ ଡାକନାମ ‘୩ଜି’ ବିଷୟରେ ମଧ୍ୟ କହିଥିଲେ। ଏହା ତାଙ୍କ ଗାଁ ସାଙ୍ଗମାନେ ଦେଇଥିଲେ।
ଆରମ୍ଭରୁ ଦ୍ରୁତ ବୋଲିଂ ପ୍ରତି ଆଗ୍ରହ ଥିଲା। ଗାଁରେ ସେଭଳି ଖେଳୁଥିଲି। ଏଣୁ ମୋତେ ୩ଜି ବୋଲର ବୋଲି କୁହାଯାଉଥିଲା। କାରଣ ମୋର ଗତି ଇଣ୍ଟରନେଟ୍ ସ୍ପିଡ୍ ସହ ଜଡ଼ିତ କରାଯାଉଥିଲା। ଏବେର ସଫଳତା ଆନନ୍ଦ ଦେଇଛି ସତ, ହେଲେ ମୁଁ ପୂର୍ବର ଡାହାନି ଥିଲି ,ଅଛି ଏବଂ ରହିବି। ଯେତେବେଳେ ଗାଁକୁ ଯିବି ମୋର ନିଜର ଲୋକ ଏବଂ ସାଙ୍ଗମାନଙ୍କ ପାଇଁ ସମାନ ରହିବି। ଯେଉଁମାନେ ମୋତେ ସମର୍ଥନ କରିଛନ୍ତି ତାଙ୍କୁ ନିରାଶ କରିବି ନାହିଁ। ଏବେ ମୋ ଭିତରେ ଆତ୍ମବିଶ୍ୱାସରେ ପରିପୂର୍ଣ୍ଣ ରହିଛି। ନିର୍ଭୟରେ କ୍ରିକେଟ ଖେଳିବାକୁ ଅପେକ୍ଷା କରିଛି ବୋଲି ସେ କହିଛନ୍ତି।
