ନୂଆଦିଲ୍ଲୀ,୨୦।୧୨: ଦକ୍ଷିଣ ଦିଲ୍ଲୀ ନଗର ନିଗମ (ଏସ୍ଡିଏମ୍ସି) କୁକୁରଙ୍କ ପାଇଁ ଏକ ସର୍ବସାଧାରଣ ଶ୍ମଶାନ ନିର୍ମାଣ ପ୍ରକ୍ରିୟା ଆରମ୍ଭ କରିଛି। ଏହି ଶ୍ମଶାନରେ କୁକୁରଙ୍କ ଅନ୍ତିମ ସଂସ୍କାର ପରେ ୧୫ ଦିନ ପର୍ଯ୍ୟନ୍ତ ଅସ୍ଥି ରଖିବା ପାଇଁ ବ୍ୟବସ୍ଥା ହେବ। ନଗର ନିଗମ ଅଧିକାରୀମାନେ ରବିବାର ଏହି ସୂଚନା ଦେଇଛନ୍ତି। ଦ୍ୱାରକାଠାରେ ଶ୍ମଶାନ ନିର୍ମାଣ କରାଯିବ ଏବଂ ୭୦୦ ବର୍ଗ ମିଟର ଅଞ୍ଚଳରେ ବିସ୍ତାର ହେବ। କୁକୁରଙ୍କ ମାଲିକମାନେ ଏହି ପ୍ରକଳ୍ପକୁ ସ୍ବାଗତ କରିଛନ୍ତି। ଦିଲ୍ଲୀ ନଗର ନିଗମର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, ନିକଟରେ ଏହି ପ୍ରକଳ୍ପକୁ ଚୂଡ଼ାନ୍ତ ସରକାରୀ ଅନୁମୋଦନ ମିଳିଛି। ଖୁବ୍ଶୀଘ୍ର ଟେଣ୍ଡର ଡକାଯିବ। ଏହା ଏକ ପବ୍ଲିକ ପ୍ରାଇଭେଟ ପାର୍ଟନରଶିପ (ପିପିପି) ପ୍ରକଳ୍ପ ହେବ। ମାନବ-ପଶୁ ସମ୍ପର୍କ ଅତ୍ୟନ୍ତ ସ୍ବତନ୍ତ୍ର। ଗୃହପାଳିତ ପଶୁ ପରିବାର ସଦସ୍ୟଙ୍କ ପରି। ତେଣୁ ସେମାନଙ୍କ ମୃତ୍ୟୁ ପରିବାରର ସଦସ୍ୟଙ୍କୁ ହରାଇବା ସହିତ ସମାନ। ସମ୍ମାନଜନକ ଭାବରେ ଏମାନଙ୍କ ଶବଦାହ କରାଯାଇପାରିବ। ତେଣୁ ପାରମ୍ପରିକ ଢଙ୍ଗରେ ଏକ ମୃତ ଗୃହପାଳିତ ପଶୁଙ୍କ ଶେଷ ରୀତିନୀତି କରିବା ପାଇଁ ଶବଦାହରେ ପୂଜକ ରହିବା ପାଇଁ ବ୍ୟବସ୍ଥା ମାଗିଛୁ ବୋଲି ସେ କହିଛନ୍ତି।