ପୁରୀ ଅଫିସ,୧୪ା୧୦:ଶ୍ରୀସେତୁ ପ୍ରକଳ୍ପ ନିମନ୍ତେ ଜମି ଅଧିଗ୍ରହଣ ପାଇଁ ବୁଧବାର ଜନଶୁଣାଣି ଆରମ୍ଭ ହୋଇଛି। ଏହି ପ୍ରକଳ୍ପ ଯୋଗୁ ପ୍ରଭାବିତ ହେବାକୁ ଥିବା ୪ଟି ମୌଜା (ସମଙ୍ଗ, ମାଟିତୋଟା, ମାର୍କଣ୍ଡେଶ୍ୱର ସାହି ଓ ଦାଣ୍ଡିମାଳ ସାହି)ର ଲୋକେ ଜନଶୁଣାଣିରେ ଉପସ୍ଥିତ ରହି ଜମି ଅଧିଗ୍ରହଣ ଏବଂ ତଦ୍ଜନିତ ସାମାଜିକ ପ୍ରଭାବ ବିବରଣୀ ଉପରେ ନିଜର ମତ ରଖିବେ। ଏକ କ୍ରମରେ ସମଙ୍ଗ ମୌଜା ପାଇଁ ପୂର୍ବାହ୍ନ ସାଢେ ୧୦ଟାରେ ସମଙ୍ଗ ପଞ୍ଚାୟତ କାର୍ଯ୍ୟାଳୟରେ ଏବଂ ମାର୍କଣ୍ଡେଶ୍ୱର ସାହି ଲାଗି ମଧ୍ୟାହ୍ନ ୧୨ଟାରେ ମା’ ବିଶେଶ୍ୱରୀ ଠାକୁରାଣୀଙ୍କ ପୀଠରେ ଜନଶୁଣାଣି ଆରମ୍ଭ ହୋଇଛି। ସେହିପରି ମାଟିତୋଟା କୋଠଘରେ ଅପରାହ୍ନ ୨ଟାରେ ମାଟିତୋଟା ଏବଂ ଜଗନ୍ନାଥବଲ୍ଲଭ ମଠ ପରିସରରେ ଅପରାହ୍ନ ସାଢେ ୩ଟାରେ ଦାଣ୍ଡିମାଳ ସାହି ପାଇଁ ଜନଶୁଣାଣି କରାଯିବ ବୋଲି ପ୍ରଶାସନ ସ୍ଥିର କରିଛି।
ରାଜ୍ୟର ଏହି ପ୍ରଥମ ଟ୍ରମ୍ପେଟ ସେତୁ ପୁରୀ-ଭୁବନେଶ୍ୱର ୩୧୬ ନମ୍ବର ଜାତୀୟ ରାଜପଥର ବାଇପାସ୍ଠାରୁ ଜଗନ୍ନାଥ ବଲ୍ଲଭ ମଠ ପରିସରରେ ହେବାକୁ ଥିବା ପିଲିଗ୍ରିମ ସେଣ୍ଟରକୁ ସଂଯୋଗ କରାଯିବ। ଏଥିପାଇଁ ୧୯୦ କୋଟି ଟଙ୍କା ଖର୍ଚ୍ଚ ହେବ। ରାସ୍ତା ଓ ବ୍ରିଜ୍ର ଲମ୍ବ ପ୍ରାୟ ୨.୩ କିମି ହେବ। ଏଥିପାଇଁ ପୁରୀର ଉପରୋକ୍ତ ୪ଟି ମୌଜାର ବେସରକାରୀ ଓ ସରକାରୀ ଜମି ମିଶି ୩୭ ଏକର ୯୮୪ ଡେସିମିଲ ଅଧିଗ୍ରହଣ କରାଯିବ। ମୋଟ ଜମି ମଧ୍ୟରୁ ବେସରକାରୀ ଜମି ୩୪ ଏକର ୨୪୬ ଡେସିମିଲ ଥିବାବେଳେ ସରକାରୀ ଜମି ୩ ଏକର ୭୩୮ ଡେସିମିଲ ରହିଛି। ଇତିମଧ୍ୟରେ ରାଜ୍ୟ ସରକାର କିଛି ବେସରକାରୀ ଜମି କିଣିସାରିଥିବା ଜଣାପଡ଼ିଛି।